MARAKO 10

1Eri nga enga 'dasi, eri nga di emu angᴜ Yudiaari ma tia azini Yoridania 'aa'dasi; 'ba ongᴜlᴜmᴜrᴜ nga yi okᴜ vᴜnia dika, eri nga yi imba dika erini adrile 'yelerile. 2'Ba Farisaini nga emu vᴜnia, nga zi tinia, eri o'bizᴜ, kini, Azita a'i aguni i ma okᴜ drozᴜ ra ya? 3Eri nga e'yo omvi, nga 'yo yi tia kini, Musa azi ndra emi dri ngoni ya? 4Yi nga 'yo kini, Musa a'i ndra 'bani waraga okᴜ drozᴜri sizᴜ eri ti pezᴜ ra. 5Te Yesu nga 'yo yi tia kini, Eri si ndra azita 'diri asi mbaza eminirisi. 6Te ewu okokele e'dozᴜ 'ba 'bazᴜrisi, eri 'ba ndra agupi pi okᴜ be. 7E'yo 'dirisi 'ba ma kᴜ ati pi andri be, ma ebi i okᴜ ini be, 8yi iri tro ma ovᴜ rua alᴜ. 'Dini yi ovᴜni iri dika kᴜ, te rua alᴜ. 9'Ba Munguni a'dileniri, 'ba ndi ma co eselenini kᴜ. 10Ka ovᴜ joa, 'ba erini imbale 'diyi nga zi tinia dika e'yo 'dirisi. 11Eri nga di 'yo yi tia kini, 'Ba azini ka okᴜ erini dro ra, ka okᴜ andini je, eri di ali 'ba eri be; 12te okᴜ nde agupi ini kᴜpi rari ka ovᴜ okᴜrᴜ 'ba azini dri, eri di ali 'ba indi. 13Yi eji anzi nyiri nyiri vᴜnia, eri ma elo yi rua; 'ba erini imbale 'diyi nga di ega yi dria. 14Yesu ka ndre ra, eri nga ovᴜ ombasi yi be, nga 'yo yi tia kini, Emi kᴜ anzi nyiri nyiri ma emu ma vᴜ, emi ma oga yi si kᴜ; te suru Munguniri ovᴜ 'ba 'dini 'diyini. 15Ma 'yo emi tia ndi ndi, 'ba azini ka suru Munguni a'i mva werearile kᴜ, eri ngani fi alenia alᴜni 'de kᴜ. 16Eri nga yi okᴜ i ma wua, nga asi ndriza fe yi dri, erini dri otiria yi dria. 17Erini fᴜria geria, 'ba azini nga enzᴜ vᴜnia, nga kᴜmᴜti osi, nga zi tinia kini, 'Ba 'ba Imbapi bari, ma nga a'di 'ye, mani idri 'dani 'daniri isuzᴜ beni ya? 18Yesu nga 'yo tinia kini, Mi omve ma barᴜ a'disi ya? 'Ba barᴜni yo, kiri alᴜ Mungu'i. 19Mi ni azita ra, kini : Mi 'di 'ba kᴜ, Mi ogᴜ kᴜ, Mi li inzo ‘ba azini ma dria kᴜ, Mi 'du 'ba azini ma afa lokirisi kᴜ, Mi inzi mi ati pi mi andri be. 20Eri nga 'yo tinia kini, 'Ba 'ba Imbapiri, ma mba e'yo 'diyi ma ta dria gbu mvasi. 21Yesuni eri luria, eri ma ava nga eri va, eri nga 'yo tinia kini, Afa ace nga mi dri alᴜ indi; mi mu, afa mini fe je dria, mi awa 'ba aliorᴜ 'diyi dri, te mi nga lonyi isu 'bua; mi ma emu di ma vᴜti bi ndo. 22Te e'yo 'yoza 'dirisi eri nga i ma mile sᴜ va, eri nga mvi candi be, erini ovᴜle afa be tᴜrisi. 23Yesu nga angᴜ olu i ageia, nga 'yo 'ba erini imbale 'diyi ma tia kini, 'Ba afa e'irᴜ 'diyini fizᴜ suru Munguniria ewani 'doni! 24'Ba erini imbale 'diyi nga osu tᴜ e'yo erini 'yolerisi. Te Yesu nga e'yo omvi dika, nga 'yo yi tia kini, Anzi la, 'ba a'ita 'bapi lonyi dria 'diyini fizᴜ suru Munguniria ewani 'doni! 25Ngamiani fizᴜ sindani ma 'bile talaasiri bani ewa kokorᴜni aga 'ba afa e'ini fizᴜ suru Munguniriari ra. 26Yi nga osu osu tᴜ, nga 'yo tinia kini, Ka'dini a'dini nga te i pani ya? 27Yesuni mile sᴜria yi ruaa, nga 'yo kini, Econi 'ba ndini kᴜ, te Munguni 'dinini yo; afa dria eco Mungu dri ra. 28Petero 'ba 'yo tinia kini, Mi ndre, ama kᴜ ndra afa dria, ama bi mi vᴜti. 29Yesu nga 'yo kini, Ma 'yo emi tia ndi ndi, 'ba azini ka jo pi kᴜ, adripi pie, amvipi pie, andri pie, ati pie, anzi pie, angᴜ pie, dria ma rᴜsi, e'yo barisi indi, 30eri nga afa isu paleko tᴜrᴜ curu'do ewu 'dorisi, jo piyi, adripi pie, amvipi pie, andripi pie, anzi pie, angᴜ pie dria, tualᴜ inzata be; azini ewu emupi vileria idri 'dani 'daniri. 31'Ba karakaraᴜ ndra ovᴜpi oko 'diyi nga eca 'ba vile 'diyirᴜ, 'ba vile 'diyi 'ba oko 'diyirᴜ. 32Yi ovᴜ de geria turia Yerᴜsalemua, Yesu ce de dri yi drilia; yi nga osu osu, 'ba vᴜtini bipi 'diyi nga ovᴜ urisi. Eri nga 'ba mᴜdri drini iri 'diyi 'du kalaa dika, nga 'ba e'yo ngapi i 'yepi eri ruaari olᴜ yi tia, 33kini, Emi lu, ama tu Yerusalemua; yi nga Mvi 'bani 'du fe kuhani amborᴜ piyi dri, karani pie; yi nga eri ma e'yo li ma dra ra, yi nga eri fe 'ba jururᴜ dri; 34yi nga eri ede ede ogutasi, nga cucu wᴜ milenia, nga eri co ninisi, nga eri fu ndo; te o'du na ma vᴜtia eri nga enga dika. 35Zebedayo anzipi Yakobo pi Yohana be, nga emu vᴜnia, nga 'yo tinia kini, 'Ba 'ba Imbapiri, ama le mi 'ye ama dri e'yo dria amani zile mi tiari. 36Eri nga 'yo yi tia kini, Emi le ma 'ye emi dri a'dini ya? 37Yi 'yo tinia kini, Mi fe ama ma ri, alᴜ mi dri ndiria, alᴜ mi dri ejiria, diza mini ma alia. 38Te Yesu nga 'yo yi tia kini, Emi nini e'yo emini zileri kᴜ. Emi eco okelea mani mvuleri mvuzarᴜ, kani baputizi mani bileri bizarᴜ ra ya? 39Yi nga 'yo tinia, Ama eco ra. Yesu nga di 'yo yi tia kini, Emi nga okelea mani mvuleri mvu ra; emi nga baputizi mani bileri bi ra; 40te rizᴜ ma dri ndiria, kani ma dri ejiriari ovᴜni e'yo mani fezᴜ kᴜ, te pari nde ovᴜ 'ba yini eri edezᴜ yi dri 'bo 'diyini. 41'Ba mᴜdri 'diyi ka e'yo nde eri ra, yi 'ba ovᴜ aokosi Yohana pi vᴜ Yakobo be. 42Yesu nga yi omve i vᴜ, nga 'yo yi tia kini, Emi ni ra, 'ba yini opele 'ba 'ba dri cepi juru drilia 'diyi adri 'ba dri ce okposi; 'ba 'wara yini adri yi ayᴜ ati'barᴜ. 43Te e'yo ngani ovᴜ emi eselia 'dini kᴜ; te 'ba lepi ovᴜpi amborᴜ emi eseliari ma ovᴜ 'ba emi aza kopiri’i, 44te 'ba lepi ovᴜpi 'ba drilerᴜ emi eseliari, eri ma ovᴜ ati'bo 'ba driani. 45Te Mvi 'bani emuni 'bani azi ngazᴜ eri dri kᴜ, te azi ngazᴜ 'ba dri, idri erini fezᴜ 'ba karakaraᴜ ma arioti ofezᴜ. 46Yi nga eca Yerikoa; erini fᴜria Yerikoasi 'ba erini imbale 'diyi pie 'ba ongᴜlᴜmᴜrᴜ ambo 'diyi be, Baritimayo Timayo mvi, 'ba mile efi draza be adripi afa a'ipiri, eri ri de geri tia. 47Eri ka eri 'di Yesu 'ba Nazaretiari'i, eri 'ba oyᴜ uru kini, Yesu mi Daudi mvi la! mi 'ba yiki ma vᴜ fo! 48'Ba o'birᴜ nga 'ba ega drinia kini ma adri ciri; te eri nga oyᴜ okposi aga ra kini, Mi Daudi mvi, mi 'ba yiki ma vᴜ fo! 49Yesu nga pa so ci, nga 'yo kini, Emi omve eri. Yi nga 'ba mile efi draza beri omve, kini, Mi asi ma oti kᴜ; mi nga, eri mi omve. 50Eri nga di bongo erini 'be va, nga mbᴜ uru, emu Yesu vᴜ. 51Yesu nga e'yo omvi tinia kini, Mi le ma 'ye mi dri a'dini ya? 'Ba mile efi draza beri nga di 'yo tinia kini, Imbapi, ma ma ndre angᴜ. 52Yesu nga 'yo tinia kini, Mi mu di ; a'ita mini pa mi 'bo. Coti eri nga angᴜ lu 'yeke, eri nga vᴜtini bi geria.

will be added

X\