LUKA 6

1Eri nga eca 'dini, o'du sabatonisi erini agaria amvu anya beri ma alesi, 'ba erini imbale 'diyi nga anya dri ovi, nga anya nde anyi drisi, nga di nya ndo. 2'Ba Farisaini 'diyi ma azi ‘yora, Emi 'ye e'yo azitani ogale 'yekokorᴜ o'du sabatonisiri a'disi ya? 3Yesu nga e'yo omvi, 'yo yi tia kini, Emi lani nga e'yo 'diri, ndra Daudini 'yele de eri ovᴜ abirisi, eri'i 'ba ovᴜpi eri be 'diyi pieri kᴜ ya? 4Emi lani e'yo erini fizᴜ jo Mungunia, erini enya ecetarᴜri 'duzᴜ nyazᴜ fezᴜ 'ba ovᴜpi eri be 'diyi dri indiri kᴜ ya? de isu azita oga enya nde nyako si, pe lᴜ kuhani dri a'dule. 5Te eri 'yo yi tia, Mvi 'bani eri Opi sabatoniri. 6Eri nga eca 'dini sabato azinisi, eri fi pari 'bani yi okᴜzᴜria 'ba imbazᴜ, te agu azini indi 'dale eri ma dri ndiri ondrizarᴜ. 7'Ba karanirᴜ 'diyi pi 'ba Farisaini be nga eri ndre okposi, kani eri nga eri ati o'du sabatonisi yani; ka'dini yi ma isu geri asᴜ sᴜzᴜ eri ruaa beni. 8Te eri ni asisile yini ra; eri nga 'yo agu dri ondrizarᴜri ma tia, Mi enga uru, mi so pa agadua. Eri nga enga uru, nga pa so ra. 9Yesu nga 'yo yi tia, Ma emi zi, azita a'i 'ba ma nga azi onyirᴜ etu sabatonisi'i, kani azi onzi'i ya? 'Ba pazᴜ kani 'ba ma dri jazᴜ ya? 10Yesu nga yi olu dria, nga 'yo agu nde ma tia, Mi ejᴜ mi dri. Eri ejᴜ ra, drini nga eca idrirᴜ coti. 11Te aza fi yi asia, yi di nga e'yo 'yo yi eselia kini yi ma 'ye di Yesuni ngoni ya. 12Eri nga eca 'dini, o'du 'dayisi eri fᴜ mu oni dria Mungu zizᴜ; eri zi Mungu ini be rra. 13Angᴜ ka ati ra, eri omve 'ba erini imbale 'diyi i vᴜ, eri nga 'ba ope yi ma eselia mᴜdri drini iri, nga yi omve 'ba ti opele 'diyi: 14Simoni erini omvele Petero'iri pi, Andarea adripi erini be, Yakobo pi Yohana be, Filipo pi Baritolomayo be, 15Matayo pi Toma be, Yakobo Alifayo mvi pi, Simoni yini omvele Zeloteri be, 16Yudasi Yakobo mvi pi, Yudasi Isikariote eri ma o'di nyapiri be. 17Eri si va yi be, eri so pa angᴜ senderᴜ ma dria, 'ba ongᴜlᴜmᴜrᴜ erini imbale 'diyi, azini 'ba kakaᴜ engapi angᴜ dria Yudiani pi ma alia Yerusalemu pie, angᴜ miri tia Turo pi ma ageia Sidoni beria 'diyi pie dria emu e'yo erizᴜ eri vᴜ, yi ma ovᴜ ani atizarᴜ azo yinisi beni; 18'ba yi ecandipi orindi onzisi 'diyi dria ovᴜ atizarᴜ. 19'Ba ongᴜlᴜmᴜrᴜ dria yi nda geri eri rua elozᴜ, okponi efᴜle eri vᴜ yi atizᴜ driarisi. 20Eri nga i mile enga uru 'ba erini imbale 'diyi vᴜ, nga 'yo ra: Emi drilebarᴜ, emi 'ba aliorᴜ 'diyi, suru Mungunirini ovᴜle eminirisi. 21Emi drilebarᴜ, emi 'ba abirini fule curu'do 'diyi, emini ngale trale rarisi. Emi drilebarᴜ, emi 'ba wᴜpi curu'do 'diyi, emini ngale ogule ogurisi. 22Emi drilebarᴜ, 'ba ka emi ngu onzi, yi ka emi esele co yi be ndᴜ, yi ka drinza fe emi dri, ka emi rᴜ 'be amve afa onzikanyarᴜle, Mvi 'bani ma e'yosi. 23Emi ma ovᴜ ayikosi o'du 'dasi, emi enya emi nyoŋasi, te emi ndre, orodri emini eri amborᴜ 'bua; a'bi yini yi 'ye ndra nabi vᴜ 'dinile trotro. 24Te candi emi dri, emi 'ba afa e'ipirᴜ 'diyi la, emini asi omiza emini a'ile 'borisi. 25Candi emi dri, emi 'ba trapi curu’do 'diyi la, emini ngale ovᴜle abiri berisi. Candi emini, emi 'ba ogupi curu'do 'diyi la, emini ngale e'yo eyikile candisi azini wᴜlerisi. 26Candi emini, 'ba dria ka e'yo onyirᴜ 'yo emisi, te yi a'bipi 'ye nabi inzorᴜ vᴜ 'dinile trotro. 27Te ma 'yo emi 'ba eripi 'diyi ma tia, Emi ma le juru emini, emi ma 'ye onyirᴜ 'ba emi ngupi onzi 'diyi vᴜ, 28emi ma 'yo e'yo asi ndrizasi 'ba emi tripi 'diyi ma tia, emi ma zi Mungu 'ba emi 'yepi onzi 'diyi dri. 29'Ba emi o'bolo sapi alᴜri dri emi ma oja aziniri indi; 'ba bongo emini amvelerᴜ papiri dri emi ma oga alialerᴜri kᴜ. 30Mi ma fe 'ba dria afa a'ipi mi vᴜri dri; 'ba afa emini 'dupiri ma tia, mi ma zi ariotini omvizᴜ kᴜ. 31Emi ma 'ye 'ba vᴜ ekile emini lele yi ma 'ye emi vᴜrile. 32Emi ka 'ba emi lepi 'diyi le tᴜke'i awa'difo emini ngoa ya? Ka tro 'ba onzi ti, yi adri 'ba yi lepi 'diyi le'i. 33Emi ka 'ba emi 'yepi onyirᴜ 'diyi 'ye tᴜke onyirᴜ'i, awa'difo emini ngoa ya? Ka tro 'ba onzi ti, yi adri 'ye 'dinile ra. 34Emi ka mari fe 'ba emini egale kini yi nga omvi ra 'diyi dri, awa'difo emini ngoa ya? 'Ba onzi yi adri mari fe 'ba onzi azini 'diyi dri, yi ma a'i amvi-zani trotro beni. 35Te emi ma le emi juru, emi ma 'ye onyirᴜ, emi ma fe mari, ka tro emi egani omvizani kᴜ ti; orodri emini nga ovᴜ kakaᴜ, emi nga ovᴜ anzi Mungu ovᴜpi Uru Tᴜrini; erini ovᴜle onyirᴜ 'ba awa'difo kokorᴜ 'diyi pi vᴜ 'ba onzi be indirisi. 36Emi ma ovᴜ asi ndriza be Ata eminirini ovᴜle asi ndriza berile. 37Emi kᴜ e'yo liza ja, 'ba ngani e'yo emini li kᴜ beni; emi li e'yo 'bani yi ndezᴜ kᴜ, 'ba ngani ani e'yo li emi ndezᴜ kᴜ; emi kᴜ e'yo onzi 'bani, 'ba nga e'yo onzi emini kᴜ ani; 38emi ma fe afa 'ba dri, 'ba yi nga afa fe emi dri indi; yi nga o'biza onyirᴜ, omizarᴜ, oyazarᴜ, drini ayipi vari fe emi dri 'duzᴜ agatia. Te yi nga afa o'bi emi dri.. o'bita emini o'bile feleri vᴜsi. 39Eri olᴜ e'yo o'beza yi tia kini: Eco 'ba mileefi odraza berini agyi mileefi odraza beri ma dri cezarᴜ ra ya? Yi ngani iritro o'de 'bilia kᴜ ya? 40'Ba imbata a'ipiri agani 'ba eri imbapiri kᴜ, te 'ba dria, ka ovᴜ imbazarᴜ de 'bo, yi nga ovᴜ 'ba yi imbapirile. 41Mi ndre pati o'boroko mi adripi ma miliari a'disi ya, dere pati 'barata mi ngᴜlᴜpi ma miliari mi luni kᴜ? 42Mi eco 'yozarᴜ mi adripi tia ngoni ngoni ya, Ma adripi, mi fe ma epe pati o'boroko mi miliarisi, ka mi ndreni pati 'barata mi miliari kᴜ ya? Mi 'ba lokiri be, mi epe pati 'barata mi miliari raka, mi nga di ndre onyirᴜ pati o'boroko epezᴜ mi adripi ma miliarisi ndo. 43Pati onyirᴜ efi onzikanya 'yapini yo, azini pati onzikanya efi onyirᴜ 'yapini vini yo; 44te 'ba pati dria alᴜ alᴜ ni efi 'yaza yinirisi. 'Ba tini elio efi pati oci beri ma ruaa kᴜ, azini yi tini zabibu efi la ruaa kᴜ. 45'Ba onyirᴜni adri e'yo onyirᴜ ofᴜ lonyi onyirᴜ i ma asiari ma alia, azini 'ba onzi e'yo onzi ofᴜ lonyi onzi ma alia; te ti 'bani eri e'yo gapi 'ba ma asia treri 'yo'i. 46Emi ma omve Opi, Opi, a'disi ya, emi ka e'yo mani 'yoleri 'ye kᴜ? 47'Ba dria alᴜ alᴜ emupi ma vᴜ e'yo mani eripi yi 'yepi indiri, ma nga emi dri eceta erini i sizᴜ erileri ece: 48eri ovᴜ agu jo sipirile, eri ova alirᴜ, eri 'ba jo eti kata dria; yi tiza ka emu ra, yi raza ka i da jo 'dari ma dria okposi ti, econi eri oyazarᴜ kᴜ, erini sile onyirᴜrisi. 49Te 'ba eripi ra 'yepi kᴜri eri ovᴜ 'ba jo sipi nyaku dria jo eti kokorᴜrile; yi razani nga i da jo 'dari ma dria okposi, joni nga perepere i asᴜ va; jo 'dari ma e'dezari amborᴜ.

will be added

X\