LUKA 5

1Eri nga eca 'dini, de 'ba ongᴜlᴜmᴜrᴜ yini eri omiria ci ci e'yo Munguni erizᴜ, isu eri so pa miri Genesaretini ma tia. 2Eri ndre oguru irini pa soria yi kutia; te 'ba e'bi okᴜpi 'diyi efᴜ oguru nde ma aliarisi 'bo, yi ovᴜ emba yini ojiria. 3Eri tu oguru 'diyi ma azi alᴜ Simoni vileri ma alia, eri zi eri kini ma si yi alialerᴜ, ma kᴜ kuti were. Eri ri va, nga 'ba 'ba ongᴜlᴜmᴜrᴜ imba de eri ovᴜ oguru alia. 4Ka de e'yo olᴜzᴜ 'bo, eri 'yo Simoni ma tia, Emi si yi alirᴜ ma alialerᴜ, emi sᴜ emba yia e'bi okᴜzᴜ. 5Simoni omvi e'yo kini, Ambo la, ama ecandi te ama ini be rra ti, te ama isuni afa alᴜni kᴜ! Te e'yo minirisi ma nga emba sᴜ yia. 6Yi ka 'ye 'dini 'bo, yi okᴜ e'bi ongᴜlᴜmᴜrᴜ kakaᴜ; emba yini 'ba yi ce ce; 7yi aku yi agyi yini azi ngazᴜ yi be tualᴜ ovᴜpi oguru aziniri ma alia 'diyi, kini yi ma emu yi aza ko. Yi emu ra, yi ga ogurᴜ iri 'diyi ma alia tre tre, oguru nde 'diyi 'ye 'de yi alia 'de 'de ani. 8Te Simoni Petero ka ndre ra, eri eco i va Yesu ma kᴜmᴜtia, kini, Mi nga ma vᴜrisi fo, mani ovᴜle 'ba onzinirisi, Opi! 9Te eri osu tᴜ, 'ba dria ovᴜpi eri be 'diyi be, e'bi karakaraᴜ yini okᴜlerisi; 10'dinile anzi Zebedayoni, Yakobo pi Yohana be, yi agyi azi ngapi Simoni be tualᴜ 'diyi, yi osu osu indi. Yesu nga di 'yo Simoni ma tia kini, Mi rᴜ kᴜ; engazᴜ curu'do mi nga ovᴜ 'ba 'ba okᴜpirirᴜ. 11Yi ka oguru yini ji kutia 'bo, yi kᴜ afa dria, yi bi eri vᴜti. 12Eri nga eca 'dini, de eri ovᴜ aku 'diyi ma azi alᴜ ma alia, isu agupi alᴜ indi, ofᴜ nya eri rua kurubu; eri ka Yesuni ndre ra, eri nga i eco o'bukurᴜ va, nga matᴜ 'ba eri vᴜ kini, Opi, mi ka le ra, eco mini ma rᴜa 'bazarᴜ alarᴜ. 13Eri ejᴜ i dri, eri elo eri rua, kini, Ma le ra; mi ovᴜ di alarᴜ. Ofᴜ kᴜ di eri rua coti. 14Eri azi e'yo eri tia, eri ma 'yo 'ba azini tia alᴜni kᴜ ; te kini, Mi mu leti minia, mi ece mi ngᴜlᴜpi kuhani dri, mi ofe edeta mi ruani ecazᴜ 'alarᴜri ma e'yosi kile Musani azilerile, e'yo eti nzezᴜ yi dri. 15Te di e'yo erini ku tᴜ aga ra; 'ba ongᴜlᴜmᴜrᴜ kakaᴜ nga yi okᴜ tᴜalᴜ ani e'yo erizᴜ, azini dra yini ma ati ani beni. 16Te eri ma ngᴜlᴜpi enga yi eselia, mu roko dria Mungu zizᴜ. 17Eri nga eca 'dini, o'du 'dayi ma azinisi, de erini 'ba imbaria, 'ba Farisaini piyi 'ba azita imbapi 'diyi pie, engapi aku nyiri nyiri dria Galilia 'diyi ma alia, Yudiaa 'diyi pie, Yerusalemua be 'diyi ri eri ma ageia; te okpo Opini ovᴜ eri be 'ba ma rᴜa atizᴜ. 18Te mi ndre, 'ba eji pari dria agu alᴜ azo 'ba rᴜani yazᴜ yari beri, yi nda geri eri ofizᴜ 'bazᴜ eri ma drilia; 19te 'ba ongᴜlᴜmᴜrᴜni ovᴜle trerisi, yi nda geri eri ofizᴜ ti, yi nga tu ani jo dria uru, nga tegula ma azi onze, nga eri osi va talanisi pari erini be 'ba ma eselia Yesu ma drilia. 20Erini a'ita yini ndreria, eri ‘yora, Agu la, wu e'yo onzi mini 'bo. 21Karani piyi 'ba Farisaini be 'ba e'yo ozi yi eselia kini, 'Ba Mungu o'dapi 'diri eri a'di'i ya? A'di eco e'yo onzi wuzarᴜni, pe Mungu'i a'dule kᴜ ya? 22Te Yesuni erini e'yo yini ozile yi asiari varia, nga e'yo omvi 'yo yi tia, Emi e'yo ozi emi asia ngoni ya? 23Ewa kokorᴜ tᴜri ngori ya, 'yozᴜ, Wu e'yo onzi mini 'bo; kani 'yozᴜ, Mi enga uru, mi aci? 24Te emini nizᴜ ani kini Mvi 'bani ovᴜ okpo be nyakua e'yo onzi wuzᴜ, (eri 'yo 'ba azo ruani yazᴜ yari beri ma tia) Ma 'yo mi tia, mi enga uru, mi 'du pari mini, mi mu mi vile joa. 25Eri enga perepere yi milia uru, 'du pari ini te lazᴜ driniari, eri ko dri mvi jo inia, ji mu Mungu ru inzi so. 26'Ba dria yi osu tᴜ, nga Mungu ru inzi; uri ga yi asia, yi ‘yora, Andrᴜ ama ndre afa osutarᴜ tᴜ tᴜri'i. 27E'yo 'diyi ma vᴜtia eri fᴜ amve, nga 'ba musoro okᴜpiri alᴜ ndre, runi Levi'i, erini riria pari 'bani musoro 'bezᴜria; eri 'yo eri tia, Mi bi ma vᴜti. 28Eri kᴜ afa dria, eri enga uru, bi vᴜtini. 29Levi a'di eri dri omu amborᴜ jo ini ma alia; 'ba ongᴜlᴜmᴜrᴜ kakaᴜ musoro okᴜpi 'diyi 'ba azini be indi, yi ori nyaka tia yi be. 30'Ba Farisaini piyi karani yini be nga no 'ba erini imbale 'diyi ma dria, 'yozᴜ kini, Emi nya azini emi mvu 'ba musoro okᴜpi 'diyi be tualᴜ, 'ba e'yo onzi 'yepi 'diyi be, a'disi ya? 31Yesu nga e'yo omvi, 'yo yi tia, Ba rua be alarᴜ 'diyi leni ojoᴜ kᴜ, te 'ba azo be 'diyi leni; 32ma emuni 'ba kililirᴜ 'diyi omvezᴜ kᴜ, te 'ba e'yo onzi 'yepi 'diyi omvezᴜ asi ojazᴜ. 33Yi 'yo eri tia, 'Ba Yohanani imbale 'diyi adri nyaka 'da pale kakaᴜ, Mungu zizᴜ indi, 'ba Farisaini imbale 'diyi 'ye 'dinile indi; te 'ba mini yi nya, yi mvᴜ. 34Yesu 'yo yi tia 'dini, Eco emini nyaka ogazarᴜ otala izio ma joa 'diyi dri, de nga izioni yi be indi ra ya? 35Te o'du yini ngazᴜ izioni nzezᴜ yi ma eseliari nga eca ra, yi nga nyaka 'da o'du 'darisi ndo. 36Eri nga e'yo eti o'be yi tia indi: Ba alᴜni asini bongo o'dirᴜ ecizᴜ bongo okuri ma ruaa kᴜ; ka 'ye 'dini, eri nga bongo o'dirᴜ asi ra, azini vini bongo eciza engapi o'diri ma aliari ngani i si okuri be kᴜ. 37'Ba alᴜni toni patiefi ma su o'dirᴜ enyi okuri ma alia kᴜ; ka 'ye 'dini, patiefi suni nga enyi asi ra, patiefi suni nga i ada va, enyini nga i eza ani indi. 38Te 'ba ma to patiefi su o'dirᴜ enyi o'dirᴜ ma alia. 39'Ba alᴜni patiefi su okuri mvupiri ngani o'dini le kᴜ; te eri ‘yora, Okuri onyirᴜ.

will be added

X\