LUKA 3

1Eli mᴜdri drini towi Tiberio Kaisarini suru nyazᴜrisi, de isu Pontio Pilatoni gavenarᴜ Yudia ma drilia, de Herodeni opirᴜ Galilia, eri ma adri Filiponi de opirᴜ angᴜ Ituriari pi ma drilia Trakoniti be, de Lusaniani opirᴜ Abilenea, 2de Anasi pi Kaifa be yini kuhani amborᴜ ma azi ngaria, e'yo Munguni eca Yohana Zakaria mvi vᴜ roko dria; 3eri mu angᴜ Yoridani ma ageiaria dria, baputizi asi ojazani e'yo onzi wuzᴜ aniri ma e'yo olᴜzᴜ. 4Kile e'yo nabi Isayani sile buku ma aliarile, O'duko 'ba oyᴜpi roko driarini: Emi ede geri Opini, emi 'ba leti erini kililirᴜ. 5E'buti kinakina nga ga nyakusi tre tre, yi nga oni izᴜrᴜ 'diyi pi osi oni were 'diyi be dria ele, angᴜ ovᴜpi goligolirᴜ 'diyi nga eca kililirᴜ, otukutu otukutu 'diyi nga eca seresere; 6'ba rᴜa ari be 'diyi dria nga pata Munguni ndre. 7Eri 'yo 'ba ongᴜlᴜmᴜrᴜ tia ani, yini muria baputizi biria eri vᴜ, Emi anzi uriohuluni! A'di ece emi dri apazᴜ adra emupirisini ya? 8E'yo 'disi emi ma 'ya ani efi yi sipi asi ojaza be 'diyi, azini emi ma 'ba 'yo emi asia kini, A'bi amani eri Iburahimu'i, 'dini kᴜ; te ma 'yo emi tia kini, Mungu eco oniefi 'diyi engazarᴜ Iburahimu dri anzirᴜ ra. 9Te curu’do ogara 'ba i pati ola vᴜ ogogo 'bo ; te 'ba yi adri pati dria efi 'yapi onyirᴜ kᴜ 'diyi ga va, 'bezᴜ acia. 10'Ba ongᴜlᴜmᴜrᴜ zi eri tia kini, Ka'dini ama nga a'di 'ye ya? 11Eri omvi e'yo yi tia, 'Ba ovᴜpi koti iri beri ma fe alᴜri 'ba koti kokorᴜri dri; 'ba ovᴜpi nyaka beri ma 'ye 'dinile indi. 12'Ba musoro okᴜpi 'diyi nga di eca eri vᴜ baputizi bizᴜ, nga 'yo eri tia kini, 'Ba 'ba Imbapiri, ama nga a'di 'ye ya? 13Eri 'yo yi tia, Emi ma okᴜ musoro aga yini azile emi tiarile kᴜ. 14Asikari nga zi eri tia alᴜ indi, kini, Te ama'i, ama di nga a'di 'ye ya? Eri 'yo yi tia, Emi ma opa afa 'bani okposi kᴜ, emi ma sᴜ asᴜ 'ba ruaa inzosi kᴜ, oya emini ma fu dri emi ma milia. 15'Bani e'yo teria azini 'ba driani e'yo egaria yi asia e'yo Yohananisi kini, kani eri Kristo'i yani, 16Yohana nga e'yo omvi 'yo yi tia dria, Ma'irᴜni, ma baputizi fe emi dri yisi; te 'ba ma agapi okposiri eri emu 'di, mani dri fuzᴜ enyiriko eri ma paari ma baka ayuzᴜ kᴜri'i; eri nga emi dri baputizi fe Orindi Alatararᴜ pisi aci beni. 17Eri ovᴜ kobi erini be eri dria, akuma erini 'bazᴜ alarᴜ, anyani okᴜzᴜ ero erini alia; te eri nga anya drileko ve aci i inyupi kᴜrisi. 18Eri olᴜ e'yo bari 'ba ma tia, yi asi omizᴜ e'yo azini kakaᴜsi. 19Te eri ega opi Herode ma dria, erini Herodiasi i adripi ma okᴜ bilerisi, azini e'yo dria erini 'yele onzirisi; 20te Herode nga e'yo 'di o'ba e'yo 'diyi dria ma dria 'dini, eri ombe Yohanani arujoani. 21Eri nga di eca 'dini, 'ba dria ka baputizi bi ra, Yesu indi ka baputizi bi 'bo, isu erini ziria, 'bu zi i mgborᴜ, 22Orindi Alatararᴜ si va eri dria, e'da rua be kile a'balaᴜ ruale, o'duko enga 'bua kini, Mi Mvi mani lele tᴜri'i; ma ovᴜ ayikosi tᴜ e'yo minisi. 23Yesu ma ngᴜlᴜpi ma eli ka ca kali na 'bo, eri 'ba di 'ba imba ndo; 'ba ega eri ovᴜ Yusufu mvi'i, mvi Elini, 24Matatini, Levini, Melikini, Yanaini, Yusufuni, 25Matatiani, Amosini, Nahumini, Esilini, Nagaini, 26Maatini, Matatiani, Semeini, Yosekini, Yodani, 27Yoanani, Resani, Zerubabelini, Sealitielini, Nerini, 28Melikini, Adini, Kosamuni, Elimadamuni, Erini, 29Yesuni, Eliezerini, Yorimuni, Matatini, Levini, 30Simeonini, Yudasini, Yusufuni, Yonamuni, Eliakimuni, 31Meleani, Menani, Matatani, Natanini, Daudini, 32Yeseni, Obedini, Boazini, Salimonini, Nasonini, 33Aminadabuni, Arinini, Hezironini, Perezini, Yudani, 34Yakoboni, Isakani, Iburahimuni, Terani, Nahorini, 35Serugini, Reuni, Pelegini, Eberini, Selani, 36Kainanini, Arifakisadini, Semini, Noani, Lamekini, 37Metuselani, Enokani, Yaredini, Malalelini, Kainanini, 38Enosini, Setini, Adamuni, Munguni.

will be added

X\