LUKA 21

1Eri enga i mile uru, nga 'ba afa eyipi 'diyi ndre yini afa feza yini o'beria sanduku silingi ta mbazᴜria; 2eri ndre vini awᴜzioᴜ aliorᴜ erini sente iri 'beria 'daa indi. 3Eri ‘yora, Ma 'yo emi tia adarᴜ, awᴜzi aliorᴜ 'diri 'be afa alenia aga yi dria ra; 4te 'ba 'diyi dria o'be afa feza yini engazᴜ afa yini kakaᴜ ma eselia, te eri'i eri 'be alenia afa erini adrizᴜ ani idrirᴜri dria engazᴜ alio eriniri ma alia. 5'Ba azini yini e'yo hekaluni 'yoria, kini yi ede eri ndrizaru oni ndrizarᴜ 'diyi pisi afa feza be, eri ‘yora, 6Afa emini ndrele 'diyi ma e'yo 'dini, o'duni nga emu ra, o'du ndesi yi ngani oni alᴜ kᴜ adrozarᴜ agyi dria asᴜkokorᴜ va kᴜ. 7Yi zi eri tia kini, 'Ba 'ba Imbapiri, e'yo 'diyi nga yi 'ye a'dᴜngare ya? E'yo 'diyi ka 'ba yi 'ye ra, ecetani nga ovᴜ ngoni ya? 8Eri ‘yora, Emi ovᴜ mile be, 'ba ma ici emi kᴜ; te 'ba kakaᴜ nga emu ma rusi 'yozᴜ kini, Ma eri'i! azini, Ewu eca ogogo 'bo! Emi mu yi vᴜtia kᴜ. 9Emi ka e'yo a'di 'diza pini eri omba 'baza be, uri ma bi emi ani kᴜ; te di e'yo 'diyi ma 'ye yi oko raka, te ewu asizaniri ngani nga i 'ye mbele kᴜ. 10Eri nga di 'yo yi tia, Suruni nga enga suru azini be, opi nyazani nga enga opi nyaza azini be, dria ombarᴜ; 11oyakia amborᴜ yi nga ovᴜ indi, liki pi dra muarᴜri be nga ovᴜ angᴜasi ndᴜ ndᴜ, afa uriurirᴜ 'diyi pi nga ovᴜ indi eceta amborᴜ engapi 'bua 'diyi be. 12Te de nga e'yo 'diyi dria 'yeni yi kᴜ, yi nga emi obi yi drisi, yi nga emi inza, yini emi jiria pari 'bani yi okᴜzᴜ 'diyi pi ma alia, arujo pie, yini emi jiria opi pi ma milia gavena be ma rusi. 13Eri nga i oja emi dri e'yo eti nzezᴜrirᴜ. 14E'yo 'disi emi ede e'yo emi asia kini emi ma ega e'yo emini ngale omvileri oko kᴜ; 15a'disikᴜ ma nga emi dri ti 'yoza pi fe ondᴜa be, 'dini e'yo nde 'diyisi ari'ba emini dria ngani eco emi dri aruzarᴜ, kani agata gazᴜ emi be kᴜ. 16Te 'ba emi tipi 'diyi, emi adripi pie, ori'ba pie, agyi pie, nga emi fe 'ba dri, yi nga 'ba azini emi eselia 'diyi ofe dra drini; 17'ba dria yi nga emi ngu onzi ma rusi. 18Te dribiefi emi dria 'diyi ma alᴜni ngani dri ja kᴜ. 19Te asi teza eminiri nga fe idri emini pani. 20Te emi ka asikari ongᴜlᴜmᴜrᴜ ndre yini Yerusalemuni aceria, emi ma ni ani kini dri jaza erini eca ogogo. 21Etu 'dasi 'ba dria ovᴜpi Yudiaa 'diyi ma apa oni ambo ambo 'diyia, azini 'ba ovᴜpi eri ma alia 'diyi ma fᴜ asea amve, 'ba ovᴜpi asea 'diyi ma fi alenia kᴜ. 22Te ewu 'diri eri ewu e'yo lizaniri, 'dini e'yo dria ovᴜpi sizarᴜ 'diyini yi 'yezᴜ yi pariari'i. 23Candi okᴜ okporo-vᴜrᴜ 'diyi dri, okᴜ odekᴜa endrᴜpi o'du 'dayisi 'diyi be! A'disikᴜ candi amborᴜni nga ovᴜ angᴜa, adrani nga ovᴜ suru 'diri ma dria; 24yi nga odra seisi, yi nga yi obi ati'barᴜ suru dria ma alia; 'ba Jururᴜ 'diyi nga Yerusalemuni otᴜ yi pasi va, de nga ewu 'ba Jururᴜ 'diyiniri deni i kᴜ. 25Eceta yi nga ovᴜ indi etu pi ma ruaa, mba pie, 'bi'bio pie; asi otiza nga ovᴜ nyakua indi suru ma eselia, yi nga aba mirini wᴜlerisi adilerisi indi; 26'ba yi nga eca 'ba avᴜle urisi, azini yini e'yo ngapi ecapi angᴜ wudrikuru ma dria 'diyi telerisi; te okpo 'bua 'diyi nga yi oya oya. 27Etu 'dasi yi nga Mvi 'bani ndre erini emuria okpo be dizarᴜ tᴜ iriti ma eselia. 28Te e'yo 'diyini 'baria yi 'yeria, emi edre emi uru, emi enga emi andreti uru indi, onzeza emini-rini ecale ogogorisi. 29Eri 'yo yi tia e'yo o'bezani 'dini: Emi ndre elio pati pi pati azini be dria; 30yi ka'ba bi rᴜ 'bo, emi ka ndre ra, emi ngᴜlᴜpi ni indi kini ewu nyakani kazᴜri eca di ogogo 'bo. 31Ekile 'dinile emi alᴜ indi, emi ka ndre e'yo 'diyini yi 'yeria, emi ma ni suru Munguni eca ogogo. 32Ma 'yo emi tia ndi ndi, a'bianzi ewu 'dosi 'diyi ngani yi de kᴜ, de nga e'yo 'diyi dria 'yeni yi kᴜ. 33'Bu pi nyaku be nga yi de ra, te e'yo mani ngani yi de alᴜani kᴜ. 34Te emi te emi ngᴜlᴜpi ma agei, emi asi kazᴜ ovᴜzᴜ nzizarᴜ emini nyaka nyale tᴜ azini ewa mvule tᴜrisi kᴜ, kani emini asisile drole idri 'dori ma e'yosirisi kᴜ indi, o'du 'dari kazᴜ ecazᴜ emi dria rugbu ekile gbagbale kᴜ; 35te eri nga eca 'ba ovᴜpi angᴜ wudrikuru drisi dria 'diyi ma dria dria. 36Emi te emi agei mile be ewu dria, Mungu zizᴜ matᴜ be, emi ma isu okpo emini ngazᴜ apazᴜ e'yo dria ngapi yi 'yepi 'diyisi, azini emini ngazᴜ pa sozᴜ Mvi 'bani ma milia ani beni. 37Etu vᴜsi eri adri 'ba imba hekalua ; ini vᴜsi ini vᴜsi eri fᴜ amve, la oni yini runi omvele Mizeituniri ma dria. 38'Ba dria yi emu eri vᴜ o'biti kula kula hekalua, eri ma e'yo erizᴜ.

will be added

X\