LUKA 18

1Eri 'yo e'yo o'beza yi tia, yi imbazᴜ yi ma zi Mungu 'dani 'dani, ma ande kᴜ ; 2kini, 'Ba e'yo lipiri indi aku azinia, eri rᴜni Mungu kᴜ, erini vini 'ba ma e'yo kᴜ indi; 3awᴜzioᴜ alᴜ aku nde 'daria indi, eri adri emu eri vᴜ 'yozᴜ, Mi li e'yo mani ari'bo mani beri onyirᴜ fo! 4O'du kakaᴜ eri ga si ; te vilerisi eri 'yo i asia, Ma ka tro Mungu rᴜ kᴜ, azini e'yo 'bani eri kᴜ ti, 5te okᴜ 'dirini ma ecandilerisi, ma nga di e'yo erini li onyirᴜ ra, eri kazᴜ fezᴜ ma andezᴜ kai erini emule dika dikarisi kᴜ. 6Opi nga ‘yora, Emi eri e'yo 'ba e'yo lipi kililirᴜ kᴜ 'dirini 'yoleri. 7Mungu ngani e'yo li 'yeke 'ba erini opele owᴜpi etusi inisi i vᴜ 'diyi dri kᴜ ya? Eri ngani yi eri asi e'yeresi kᴜ ya? 8Ma 'yo emi tia, eri nga e'yo yini li onyirᴜ mbele mbele. Ka'dini ti, Mvi 'bani ka emu ra, eri nga a'ita isu nyakua ra ya? 9Eri nga vini e'yo o'beza 'diri olᴜ 'ba azini yi ma ngᴜlᴜpi ma e'yo a'ipi kini yi ovᴜ 'ba kililirᴜni, te 'ba azini ndrepi dria 'ba tokole 'diyi ma tia: 10Agupi iri tu hekalua Mungu zizᴜ, alᴜri 'ba Farisaini, aziniri 'ba musoro okᴜpiri. 11'Ba Farisaini nga pa so zizᴜ i ma ngᴜlᴜpisi kini, Mungu, ma 'yo awa'difo mi tia mani ovᴜle 'ba azi 'diyile kᴜrisi, 'ba afa opapi 'diyile, 'ba kililirᴜ kᴜ 'diyile, 'ba ali o'bapi 'diyile, kani 'ba musoro okᴜpi va 'dirile kᴜrisi. 12Ma adri nyaka 'da sabato alᴜ ma alia pale iri; ma adri afa dria mani isule mᴜdri 'diyi ma esele alᴜri fe ra. 13Te 'ba musoro okᴜpiri so pa re 'dani, eri ga mile engako 'bua si, te eri nga i agati di, kini, Mungu, mi ovᴜ yikisi ma vᴜ, ma'i ma 'ba azi onzi 'yepiri! 14Ma 'yo emi tia, 'ba 'diri si mvi jo inia erini ovᴜria kililirᴜ Mungu ma milia agu nde 'dari agazᴜ; te 'ba dria alᴜ alᴜ i ma ngᴜlᴜpi 'bapi urᴜ ceniri, yi nga eri omvi ele; te yi nga 'ba i ma ngᴜlᴜpi omvipi ele ceniri 'du 'ba uru. 15Yi eji vini anzi odekᴜarᴜ yini eri vᴜ, eri ma elo yi rua ani; te 'ba erini imbale 'diyi ka ndre ra, yi nga ega yi dria. 16Te Yesu nga yi omve i vᴜ, kini, Emi kᴜ anzi nyiri nyiri ma emu ma vᴜ, emi ma oga yi kᴜ; te suru Munguni ovᴜ 'ba 'dinile 'diyini. 17Ma 'yo emi tia ndi ndi, 'ba azini ka ngoni ti, ka suru Munguni a'i mva gakandiarᴜle kᴜ, eri ngani fi alenia alᴜni kᴜ. 18'Ba ambo alᴜ zi eri tia 'dini kini, 'Ba 'ba Imbapi bari, ma nga 'ye ngoni mani idri 'dani 'dani isuzᴜ ya? 19Yesu nga 'yo eri tia, Mi omve ma 'ba barᴜ a'disi ya? 'Ba ba-rᴜni yo, kiri alᴜ Mungu'i. 20Mi ni azita ra : Mi 'ba ali kᴜ, Mi 'di 'ba kᴜ, Mi ogu kᴜ, Mi nze e'yo eti inzorᴜ kᴜ, Mi inzi mi ati pi mi andri be. 21Eri ‘yora, Ma mba e'yo 'diyi ma ta dria gbu mvaasi. 22Yesu ka eri ra, eri 'yo eri tia, Afa azini alᴜ ece nga mi dri 'yekokorᴜ. Mi fe afa dria mini ovᴜzᴜ yi be 'diyi ozi ra, mi awa 'ba aliorᴜ 'diyi dri, mi nga ani lonyi isu 'bua; mi emu di ma vᴜti bi ndo. 23Te eri ka e'yo 'diri eri ra, eri 'ba ovᴜ candisi tᴜ, erini ovᴜle 'ba afa e'irᴜ tᴜrisi. 24Yesuni eri ndreria ‘yora, Ba afa e'irᴜ 'diyini fizᴜ suru Mungᴜni-ria ewani 'doni! 25Ngamiani fizᴜ sindani ma talaasiri bani ewa ko-korᴜni aga 'ba afa e'irᴜni fizᴜ suru Munguniari ra. 26'Ba eripi 'diyi ‘yora, Ka'dini a'di eco i pazarᴜni ya? 27Te eri 'yo, E'yo ecopi 'basi kᴜ 'diyi eco Mungusi ra. 28Petero ‘yora, Mi lu, ama kᴜ afa ama vile 'diyi ra, mi vᴜti bizᴜ. 29Eri 'yo yi tia, Ma 'yo emi tia ndi ndi, 'ba jo pi kᴜpi suru Munguniri ma e'yosi, okᴜ pie, adripi pie, 'ba yi tipi 'diyi pie, anzi pie dria 'diyi ma alᴜni 30ngani ece afa isuzᴜ parinia pale karakaraᴜ ewu 'dorisi kᴜ, eri nga vini ovᴜ idri 'dani 'daniri be ewu ngapi emupirisi indi. 31Eri okᴜ 'ba mᴜdri drini iri 'diyi i vᴜ, nga 'yo yi tia, Mi ndre, ama tu urᴜ Yerusalemua, azini e'yo dria nabini sile Mvi 'bani ma e'yosi 'diyi nga yi 'ye ra. 32Te eri nga ovᴜ fezarᴜ 'ba jururᴜ dri, yi nga eri ede ogutasi, yi nga drinza fe eri dri, yi nga cucu wᴜ eri ruaa; 33yi nga eri co ninisi, yi nga eri fu kai ra, te o'du nasi eri nga enga dika. 34Te yi vani e'yo 'diyi ma azi alᴜni kᴜ; e'yo 'yoza 'diri ovᴜ zizarᴜ yi dri, yi nini e'yo erini 'yole 'diyi kᴜ. 35Eri nga eca 'dini, erini ecaria Yerikoa ogogo, 'ba alᴜ mileefi odraza beri de ri geri tia afa a'izᴜ; 36eri ka 'ba ongᴜlᴜmᴜrᴜ eri yini agaria, eri zi e'yo 'diri a'di e'yoni ya. 37Yi nga olᴜ eri tia, kini, Yesu 'ba Nazaretiari agani. 38Eri oyᴜ o'duko urusi kini, Yesu, Daudi mvi la, mi 'ba yiki ma vᴜ fo! 39'Ba mupi drilenia 'diyi ega eri dria kini ma adri ciri; te eri tre o'duko urusi aga ra, Daudi mvi la, mi 'ba yiki ma vᴜ fo! 40Yesu so pa ci, nga 'yo kini ma eji eri i vᴜ; eri ka eca ogogo, eri zi tinia 'dini, 41Mi le ma ma 'ye mi vᴜ a'dini ya? Eri nga ‘yora, Opi, ma le te angᴜ ndre fo! 42Yesu 'yo eri tia, Mi ndre angᴜ ki! A'ita mini pa mi 'bo. 43Perepere eri 'ba angᴜ ndre, nga eri vᴜti bi, diza fezᴜ Mungu dri; 'ba ongᴜlᴜmᴜrᴜ ka ndre ra, yi nga inzita fe Mungu dri indi.

will be added

X\