LUKA 17

1Eri 'yo 'ba erini imbale 'diyi ma tia, E'yo kᴜmᴜrᴜ 'bani ani abazᴜ 'diyi ngani ece emukokorᴜ kᴜ ; te candi 'ba fepi e'yo nde ma emuri dri! 2Yi ka oni amborᴜ anya 'izᴜri ombe eri ma ombelekoa, ka eri 'be miria 'yeke, 'di eri dri orodrirᴜ aga erini fezᴜ anzi nyiri nyiri 'diyi ma azi alᴜni abazᴜri ra. 3Emi te emi ngᴜlᴜpi ma agei; adripi mini ka eza ra, mi ega eri dria, ka i asi oja, mi kᴜ e'yo onzi erini ma avi ra. 4Eri ka eza mi vᴜ o'du alᴜsi pale aziri indi, ka emvi mi vᴜ pale aziri 'yozᴜ kini, Ma oja ma asi; mi ma kᴜ di e'yo onzi erini ma avi ra. 5'Ba erini opele 'diyi nga 'yo Opi ma tia, Mi fe a'ita amani ma ezᴜ! 6Opi ‘yora, Emi ka ovᴜ a'ita be ekile haradali efile, emi eco te 'yo elio 'diri ma tia, Mi nze mi ola be pi, mi mu mi sa miri ma alia; eri te nga e'yo emini inzi ra. 7Te 'ba emi eselia ovᴜpi ati'bo be nga 'yaria kani kabilo oceria 'yopi tinia, erini efiria engazᴜ ngaarisi, Mi emu mbele mbele, mi ri nyaka nya-ri a'di'i ya? 8Eri ngani 'yo tinia kini, Mi mu afa mani nyaleri ede, mi anzu mi opile ayᴜa 'yezᴜ ma dri, kpere mani nyaria azini mvuria 'boria; vilerisi mi nga mi vileri nya azini mvᴜ ndo—'dini kᴜ ya? 9Eri adri awa'difo fe ati'bo ini dri erini afa te ini azile eri dri 'diyi 'yelerisi ya? 10Kile 'dinile emi alᴜ indi, emi ka afa dria yini azile emi dri 'diyi 'ye de 'bo, emi ma 'yo, Ama ati'ba orodri fepi kᴜ 'diyi, ama 'ye kiri azi fele ama ma 'yeri'i a'dule. 11Eri nga eca 'dini, yini muria geri Yerusalemuaria, eri aga trei Samaria pi ma aliasi Galili be. 12Erini firia aku azinia, 'ba ofᴜ be mᴜdri 'diyi fu dri eri be, nga pa so re 'dani, 13yi oyᴜ o'duko urusi kini, Ambo Yesu la! mi 'ba yiki ama vᴜ. 14Eri ka yi ndre ra, eri 'yo yi tia, Emi mu emi rua ece 'ba kuhanirᴜ 'diyi vᴜ. Eri nga eca 'dini, yini muria, yi rua nga ati alarᴜ. 15'Ba alᴜ yi eseliari, ka ndre i ovᴜ atizarᴜ, eri atri dri vile, nga Mungu inzi o'duko urusi; 16nga i eco o'bukurᴜ va eri ma palaa, erini awa'difo feria eri dri. Te eri ovᴜ 'ba Samariani. 17Yesu nga e'yo omvi 'yo kini, 'Ba mᴜdri nde 'diyi atini te alarᴜ kᴜ ya? Te 'ba oromi 'diyi ngoa ya? 18'Ba azini alᴜni dri atripi diza fezᴜ Mungu drini yo, pe lᴜ ani'bo 'dori'i ya? 19Eri nga 'yo eri tia, Mi enga uru, mi mu mi letia; a'ita mini pa mi 'bo. 20'Ba Farisaini ka eri zi ra kini, Suru Munguniri nga emu a'dᴜngare ya, eri omvi e'yo 'yo yi tia, Suru Munguni emuni eceta 'bani ndrele milesiri be kᴜ; 21yi ngani vini 'yo kini, Mi ndre, eri 'doa! kani 'Daa!—'dini kᴜ, te mi ndre, suru Munguni eri emi alia. 22Eri 'yo 'ba erini imbale 'diyi ma tia, O'duni nga eca ra, o'du 'dasi emi nga le o'du Mvi 'banini 'diyi ma azi alᴜ ndre ra, te emi ngani ndre kᴜ. 23Yi nga 'yo emi tia, Mi ndre, 'daa! Mi ndre, 'doa! Emi ma fᴜ mu yi vᴜti bizᴜ kᴜ. 24Te ekile ovini galerile, ka ga 'bu ma kala alᴜria eri nga di kpere 'bu ma kala aziniria indi, Mvi 'banini nga ovᴜ 'dinile o'du erinisi. 25Te okorisi eri ma nya candi inzata kakaᴜsi, azini a'bianzi ewu 'dosi 'diyi ma ga eri si. 26E'yoni i 'yele ewu Noanisirile, eri nga i 'ye trotro o'du Mvi 'bani vileria. 27Yi adri ndra nya, yi mvu, yi okᴜ bi, yi okᴜ fe agupia 'dani, ecazᴜ kpere o'du Noani fizᴜ maburua, yi tiza ambo-rᴜni emuzᴜ yi dri jazᴜ driaria. 28'Ye i vini 'dinile ewu Lotinisi—yi adri ndra nya, yi mvu, yi adri ndra afa je, yi afa ozi, yi afa sa, yi jo si indi, 29te o'du Lotini efᴜzᴜ Sodo-muarisi, aci pi 'di yi dria ozoole baruti be 'bua, ja yi dri dria ra— 30ekile 'dinile, e'yoni nga i 'ye trotro o'du Mvi 'banini i ecezᴜrisi. 31O'du 'darisi 'ba ovᴜpi jo kariŋa dria, eri ma afani ovᴜzᴜ joari, ma si va yi o'duzᴜ kᴜ; 'dinile indi 'ba ovᴜpi ngaari ma da dri vile kᴜ. 32Emi ma ega okᴜ Lotini ma e'yo. 33'Ba lepi idri ini ma ta mbapi i ma ngᴜlᴜpisiri, idri eriniri nga avi eri dri ra, te 'ba idri ini avipi rari nga idri ini ma ta mbani. 34Ma 'yo emi tia, ini 'dasi agupi iri yi nga la gbolo alᴜ ma dria; alᴜri nga ovᴜ 'duzarᴜ, te aziniri nga ace 'de. 35Okᴜ iri nga ovᴜ anya 'iria tualᴜ; alᴜri nga ovᴜ 'duzarᴜ, te aziniri nga ace 'de. 36Agupi iri yi nga ovᴜ ngaa; alᴜri nga ovᴜ 'duzarᴜ, te aziniri nga ace 'de. 37Yi nga e'yo omvi 'yo eri tia, Ngoa ya, Opi? Eri 'yo yi tia, Roko yi nga yi okᴜ tualᴜ pari afa avᴜni ovᴜzᴜria.

will be added

X\