LUKA 14

1Eri nga eca 'dini, eri ka fi 'ba 'wara 'ba Farisaini 'diyi ma azi ma joa o'du sabatonisi nyaka nyazᴜ, yi ovᴜ eri niria. 2Te mi ndre, agu alᴜ indi eri drilia ovᴜpi azo 'ba aleni mbazᴜri beri. 3Yesu-ni e'yo omviria 'yo 'ba azita imbapi 'diyi pi ma tia 'ba Farisaini be kini, Azita a'i yi ma ati 'ba rua o'du sabatonisi ra, kani kᴜ ya? 4Te yi ovᴜ ciri. Eri nga eri 'du, rᴜani ati, nga eri kᴜ muzᴜ. 5Eri nga 'yo yi tia, 'Ba emi eselia a'di'i, akanya erini kani ti erini ka 'de 'bile gale yi a'diniri ma alia, eri ngani eri enze amve o'du sabatonisi coti kᴜ ya? 6Te yi econi e'yo omvizarᴜ e'yo 'diyisi kᴜ. 7Eri nga e'yo o'beza 'yo 'ba omvele 'diyi dri, eri ka ndre yini ogᴜŋa drile 'diyi operia; eri nga 'yo yi tia, 8'Ba azini ka mi omve omu okᴜ pariari nyazᴜ, mi ri ogᴜŋa drileri ma dria kᴜ; kani eri omve 'ba amborᴜ mi agapi rari 'bo yani; 9'ba mi omvepi eri beri kazᴜ emuzᴜ ani 'yozᴜ mi tia, Mi kᴜ pari 'ba 'diri dri; mi nga di mvi ovᴜ pari vile tᴜria drinza be, 'dini kᴜ. 10Te 'ba ka mi omve, mi mu ri pari vile tᴜria aga dria, 'dini 'ba mi omvepiri ka emu ra, ma 'yo mi tia, Ma agyi la, mi mu drile; mi nga di ovᴜ ani ambo 'ba mini ovᴜzᴜ yi be mesa tia 'diyi ma drilia dria. 11Te 'ba dria alᴜ alᴜ i 'bapi ururi yi nga eri omvi ele, azini 'ba i omvipi eleri yi nga eri 'ba urᴜ. 12Eri 'yo 'ba eri omvepiri ma tia indi kini, Mi ka omu 'ba etu agasi kani ondresi, mi ma omve mi agyi, kani adriazi mini, kani ori'ba mini, kani 'ba mi jo ejelea ovᴜpi 'ba afa e'ipirᴜ 'diyi'i 'dini kᴜ; 'ba nde 'diyi kazᴜ mi omvezᴜ ariotini nyazᴜ ani indi kᴜ, mi kazᴜ mile omvizani a'izᴜ kᴜ. 13Te mi ka omu 'ba, mi ma omve 'ba aliorᴜ, 'ba rua ondriza, 'ba acoza, 'ba mileefi odraza 'diyi pie dria, 14te mi drileni nga ovᴜ ba, afani ovᴜle yi dri yorisi mileni omvizᴜ mi dri. Mileniri nga ovᴜ omvizarᴜ mi dri ewu 'ba kililirᴜ 'diyini engazᴜ 'ba draza ma eseliarisi. 15'Ba ripi mesa tia yi be 'diyi ma azi alᴜ ka e'yo 'diyi eri ra, eri 'yo eri tia, 'Ba ngapi enya nyapi suru Munguniari ovᴜ drilebarᴜ! 16Te eri 'yo eri tia, Agu alᴜ 'ba omu amborᴜ, eri omve 'ba kakaᴜ; 17etᴜ nyakanirisi eri pe ati'bo ini ma ti 'yozᴜ 'ba erini omvele 'bo 'diyi ma tia kini, Emi emu; te afa dria ovᴜ curu’do ngonde. 18Te yi dria alᴜ alᴜ e'do e'yo o'ba asi alᴜsi, yi ma ece ani beni. 'Ba okori nga 'yo eri tia, Ma je amvᴜ ra, te di ma ma mu eri ndre; ma zi mi tia, mi fe ma ma ece. 19Aziniri nga 'yo, Ma je ti ranya akpazarᴜ iri iri towi, ma mu yi o'bizᴜ; ma zi mi tia, mi fe ma ma ece. 20'Ba azini kini, Ma eji okᴜ 'bo, e'yo 'disi ma econi muzarᴜ kᴜ. 21Ati'bo emu e'yo 'diyi olᴜ opi ini ma tia. Jo e'i ovᴜ di adrasi, nga 'yo ati'bo ini ma tia, Mi fᴜ mbele mbele aku amborᴜ ma gboko pi ma alia geri nyiria 'diyi be, mi ma eji 'doa 'ba aliorᴜ, 'ba rua ondriza, 'ba mileefi odraza, 'ba acoza 'diyi pie dria. 22Ati'bo nga 'yo, Opi, e'yo mini azileri 'ye i 'bo, te ti, pari ace nga indi. 23Opi nga 'yo ati'bo nderi ma tia, Mi fᴜ mu geria azini geri kali ma tiaria, mi omi yi okposi efizᴜ, 'dini jo mani ma ga tre beni. 24Te ma 'yo emi tia, 'ba ndraka omvele 'dayi ma alᴜni ngani omu mani ma aji 'bi kᴜ. 25'Ba ongᴜlᴜmᴜrᴜ kakaᴜ mu eri be; eri nga i oja, 'yo yi tia kini, 26'Ba azini ka emu ma vᴜ, ka i ati pi ngu, andri pie, okᴜ pie, anzi pie, adripi pie, amvipi pie dria kᴜ, ada ka idri i ngᴜlᴜpini ngu kᴜ indi, econi erini ovᴜzarᴜ 'ba mani imba-lerirᴜ kᴜ. 27'Ba ka pati alaza i ma ngᴜlᴜpini 'du ji kᴜ emuzᴜ ma vᴜtia, econi erini ovᴜzarᴜ 'ba mani imba-lerirᴜ kᴜ. 28'Ba emi eselia lepi jo izᴜrᴜ sipiri a'di'i ya, eri ngani ri va silingi erini ngale ezaleri lazᴜ raka kᴜ ya, nizᴜ kani eri ovᴜ afa dri fupi jo nde dezᴜ rari be? 29Ka'dini kᴜ, eri ka jo eti 'ba 'bo, ka eco eri dezarᴜ kᴜ, 'ba dria eri ndrepi 'diyi nga 'ba eri ogu ogu, 30kini, Agu 'diri eri 'ba jo sizᴜ ra, te econi dezarᴜ kᴜ. 31Kani opi ngori, mupi omba 'bapi opi azini beri, ngani ri va e'yo amazᴜ okorisi raka kᴜ ya, nizᴜ kani i'i ovᴜpi kiri asikari alifᴜ mᴜdri beri eco 'ba emupi omba 'bapi i be asikari alifᴜ kali iri beri ma dri aruzᴜ ra ya? 32Ka'dini kᴜ, opi azinini nga ovᴜria re, eri nga 'ba ti pe e'yo asi anzurᴜni a'izᴜ. 33'Dinile 'ba dria alᴜ alᴜ emi eselia afa dria i ma ngᴜlᴜpini kᴜpi kᴜri, econi erini ovᴜzarᴜ 'ba mani imbalerirᴜ kᴜ. 34Awa'dini a'iri onyirᴜ; te a'i nde ma si ka fᴜ 'bo, yi nga eri 'ba aluzarᴜ dika a'di afasi ya? 35Funi dri 'bazᴜ amvua kᴜ, kani mᴜrᴜtᴜ dria kᴜ; yi eri 'be amve. 'Ba bile be e'yo erizᴜri ma eri ra.

will be added

X\