LUKA 13

1Etu nde 'dasi 'ba azini indi yi nga 'ba Galilia yi ma ari Pilatoni osale edeta yini be 'diyi ma e'yo olᴜ eri tia. 2Eri nga e'yo omvi 'yo yi tia, Emi ega emi asia kini 'ba Galilia 'diyi ovᴜ 'ba onzini aga 'ba Galilia azini 'diyi dria ra, yini candi 'diri isulerisi ya? 3Ma 'yo emi tia, 'Dini kᴜ; te emi ka emi asi oja kᴜ, emi dria nga dri ja 'dini. 4Kani 'ba mᴜdri drini aro jo izᴜrᴜ Siloamuarini i asᴜzᴜ yi dria yi ofᴜzᴜ 'dayi, emi ega kini yi 'ba mari beni aga 'ba ovᴜpi Yerusalemua 'diyi dria ra ya? 5Ma 'yo emi tia, 'Dini kᴜ; te emi ka emi asi oja kᴜ, emi dria nga dri ja 'dini. 6Eri nga e'yo o'beza 'diri olᴜ indi: Agu alᴜ ovᴜ elio pati be sale nga erini ma alia ; eri emu efini ndru ruania, te eri isuni kᴜ. 7Eri 'yo 'ba pati raza edepiri ma tia, Mi ndre, ma emu eli nani 'disi efi ndruzᴜ elio 'diri ma ruaa, te ma isuni kᴜ. Mi ga eri va; eri angᴜ eza toko a'disi ya? 8Erini e'yo omvi-ria eri nga 'yo eri tia, Opi, mi kᴜ nga eri eli 'disi indi, de nga ma ofᴜni etini wara 'bazᴜ kᴜ. 9Eri ka efi 'ya vilerisi, onyirᴜ; ka kᴜ, mi nga eri ga va ndo. 10Eri ovᴜ 'ba imbaria pari 'bani yi okᴜzᴜ 'diyi ma azi alᴜa o'du sabatonisi. 11Mi ndre, okᴜ indi ovᴜpi orindi eri 'bapi okpo kokorᴜri be eli mᴜdri drini arori; eri otra i ngᴜlᴜrᴜ, econi erini i ejᴜzarᴜ uru alᴜni kᴜ. 12Yesu ka eri ndre ra, eri nga eri omve ra, nga 'yo tinia, Okᴜ, ma trᴜ mi azo mini ovᴜzᴜ okpo kokorᴜrisi 'bo. 13Eri nga dri ti rᴜania; okᴜ nde nga i ejᴜ kilili coti, nga Mungu inzi. 14'Ba 'ba dri cepi pari 'bani yi okᴜzᴜriari nga ovᴜ di adrasi Yesuni 'ba rᴜa atile o'du sabatonisirisi, eri nga e'yo omvi 'yo 'ba ongᴜlᴜmᴜrᴜ ma tia, O'du azia 'bani ani azi ngazᴜ yi alia 'diyi indi; ka'dini emi emu o'du 'diyisi emi rua atizᴜ, te emi emu etu sabatonisi kᴜ. 15Te Opi nga e'yo omvi eri tia, Emi 'ba lokiri be 'diyi! 'Ba dria alᴜ alᴜ emi eselia adrini ti erini kani akanya trᴜ licoasi eri jizᴜ yi mvuzᴜ o'du sabatonisi kᴜ ya? 16Okᴜ Iburahimu ma zaarᴜ, Sa-tanini ombele, mi ndre, eli mᴜdri drini aro 'diri, onyirᴜ yi ma trᴜ eri ombeza eri ma ruaa 'dirisi o'du sabatonisi kᴜ ya? 17Erini e'yo 'diyi 'yoria, drinza nga 'ba te agata gapi eri be 'diyi bi dria; te 'ba ongᴜlᴜmᴜrᴜ dria ovᴜ ayikosi e'yo inzizarᴜ dria erini 'yele 'diyisi. 18Eri di 'yo ani, Suru Munguni eri ovᴜ kile a'dile ya? Ma nga eri o'bi a'di afale ya? 19Eri kile haradali efi aguni e'dule 'bele nga ini ma aliarile; eri zo ra, nga ca patirᴜ, aria 'bua 'diyi nga jorovᴜ si eri ma arakalaa. 20Eri 'yo dika, Ma nga suru Munguni o'bi a'di afale ya? 21Eri ovᴜ kile akufi okᴜni e'dule zile nganufᴜra afazᴜ na ma alia, de nga pini dria kᴜrile. 22Eri aci aku ambo ambo 'diyi pi ma eselia aku were 'diyi be, 'ba imbazᴜ, erini muria drile Yerusalemua. 23'Ba azini 'yo eri tia, Opi, 'ba yi opapi 'diyi yi were ya? Eri nga 'yo yi tia, 24Emi o'bi asi driasi fizᴜ jotile luruarᴜrisi; te ma 'yo emi tia, 'ba kakaᴜ nga le fi ra, te ngani eco kᴜ. 25Jo e'i ka enga uru, ka jotile opi 'bo, emi ka nga 'ba pa oso amve, jotile kpozᴜ, kini, Opi, mi zi ama dri fo; eri nga e'yo omvi, nga 'yo emi tia, Ma nini pari emini engazᴜri kᴜ. 26Emi nga di 'ba 'yo, Ama nya ndra, ama mvu ndra mi milia, mi imba ndra 'ba gboko amani ma alia. 27Te eri nga 'yo, Ma 'yo emi tia, ma nini pari emini engazᴜri kᴜ; emi da emi ma vᴜrisi ra, emi 'ba azi onzi 'yepi 'diyi dria! 28'Dale awᴜ pi nga ovᴜ indi, si nyaza be, emi ka nga Iburahmiu pi ndre, Isaka pie, Yakobo pie, nabi pie dria suru Munguni ma alia, de o'be emi ngᴜlᴜpi amve 'bo. 29Yi nga enga geri etuni efᴜrialerᴜri piarisi, etuni 'derialerᴜri pie, andralerᴜri pie, urulerᴜri pie dria, yi nga ri va suru Munguni ma alia. 30Te mi ndre, 'ba ovᴜpi vile 'diyi ma azi nga ovᴜ 'ba drilerᴜ, azini 'ba ovᴜpi drile 'diyi ma azi nga emvi 'ba vilerᴜ. 31Etu nde 'darisi 'ba Farisaini azini nga emu, 'yozᴜ eri tia, Mi efᴜ 'diarisi, mi mu, Herodeni lele mi fulerisi. 32Eri nga 'yo yi tia, Emi mu 'yo obalako 'dari ma tia, Mi ndre, andrᴜ dru indi, ma orindi onzi ofᴜ amve, ma 'ba rua ati indi, te o'du nasi ma nga azi mani de teke-teke i paria ra. 33Te ti, ma ma mu geri mania andrᴜ, drusi, drozi; te econi nabini drazarᴜ pari azinia amve kᴜ, pe kiri Yerusalemua a'dule. 34Yerusalemu, Yerusalemu, nabi ofupiri, azini 'ba yini tini pele vᴜnia 'diyi o'bepi onisiri la! Ma le ndra anzi mini okᴜzᴜ ma vᴜ ekile a'u andrini i ma anzi okᴜle opile ini ma etiarile 'dini pale si ya, te emi leni kᴜ! 35Mi ndre, jo mini fi di mi dri andrᴜrᴜ. Te ma 'yo emi tia indi, Emi ngani ma ndre kᴜ, de nga emi 'yoni kᴜ, 'Ba emupi Opi ma rusiri ma ovᴜ inzizarᴜ!

will be added

X\