LUKA 12

1'Ba ongᴜlᴜmᴜrᴜ alifᴜ kakaᴜ yini yi okᴜria tualᴜ, ri ani yi ma pa otᴜ otᴜ, etu 'dasi eri e'do okoni e'yo 'yo 'ba erini imbale 'diyi ma tia kini, Emi te emi agei akufi 'ba Farisainirisi, akufi nderi lokirini. 2Te afa alᴜni ovᴜpi a'bᴜzarᴜ ngapi . i ecepi kᴜni yo, te afa alᴜni ovᴜpi zizarᴜ ngapi ovᴜpi nikokorᴜni yo. 3E'yo 'disi e'yo emini 'yole angᴜ iniari, eri nga ovᴜ erizarᴜ angᴜ emvea, azini e'yo emini ndrole 'ba bilia jo aliza alialerᴜriari, yi nga oyᴜ jo dria uru. 4Ma 'yo emi ma agyirᴜ 'diyi ma tia, emi ma rᴜ 'ba 'ba rua fupi ra, te ecopi afa azini 'yepi vᴜtinia kᴜ 'diyi kᴜ. 5Te ma nga 'ba emini ngale rᴜleri ece emi dri: emi ma rᴜ 'ba ovᴜpi okpo be 'ba rua fuzᴜ raka 'ba 'bezᴜ miri acia ndori'i; ada, ma 'yo emi tia, emi ma rᴜ eri'i! 6'Ba jeni burua sente irisi towi towi kᴜ ya? Te yi ma eselia alᴜni avini Mungu dri kᴜ. 7Te ka tro dribiefi emini ti, kalafeni ovᴜ dria lazarᴜ. Emi ma rᴜ di kᴜ: aje emini aga aje burua kakaᴜniri ra. 8Te ma 'yo emi tia, 'Ba dria alᴜ alᴜ ma e'dapi 'ba miliari, Mvi 'baniri nga eri e'da malaika Munguni ma milia indi; 9te 'ba ma gapi 'ba miliari, eri nga ovᴜ gazarᴜ malaika Munguni ma milia indi. 10'Ba azini ka e'yo onzi 'yo Mvi 'bani ma ruaa, yi nga e'yo nde kᴜ ja; te 'ba ka Orindi Alatararᴜ o'da'i, yi ngani e'yo erini kᴜ alᴜni kᴜ. 11Yi ka emi eji pari 'bani yi okᴜzᴜria, 'ba opirᴜ 'diyi pi ma milia, 'ba 'wara be, asi emini ma oti e'yo emini ngale omvilerisi kani 'yolerisi kᴜ; 12etu nde 'dasi Orindi Alatararᴜri nga emi imba e'yo emini ngale 'yolerisini. 13'Ba alᴜ 'ba ongᴜlᴜmᴜrᴜ ma eseliari nga 'yo eri tia, 'Ba 'ba Imbapiri, mi azi ma adripi tia eri ma awa afa ama atini kᴜleri ama dri eri be. 14Te eri 'yo tinia, Agu, a'di 'ba ma ovᴜzᴜ e'yo lizᴜ kani afa awazᴜ emi drini ya? 15Eri 'yo yi tia, Emi ndre onyirᴜ, emi te emi agei emi kazᴜ li 'bazᴜ afa 'ba azininisi kᴜ; idri 'banini ovᴜle afa erini ovᴜzᴜ yi be kakaᴜ 'diyi ma alia kᴜrisi. 16Eri nga e'yo o'beza olᴜ yi tia kini, 'Ba afa e'irᴜri ma amvua afa ka tᴜ; 17eri nga ani e'yo ega i asia kini, Ma nga 'ye ngoni, pari mani nyaka 'bazᴜrini ovᴜle yorisi ya? 18Eri nga ‘yora, Te di ma nga 'ye 'dini: ma nga ero mani anzᴜ ra, ma nga azini amborᴜ agapi ra 'diyi co ra; ma nga anya mani pi okᴜ alenia afa mani onyirᴜ 'diyi be dria. 19Ma nga di 'yo ma orindi tia, Orindi mani la, mi ovᴜ afa mini onyirᴜ 'diyi be kakaᴜ mini tani mbale, ngapi dri fupi eli kakaᴜsi 'diyi; mi li di ande, mi nya, mi mvu, mi ovᴜ ayikosi. 20Te Mungu 'yo eri tia, Mi 'ba azazani! Ini 'dorisi ma nga orindi mini a'i mi dri; afa dria mini edele 'diyi nga ovᴜ a'dini ya? 21Awa'dini 'ba lonyi ma ta mbapi eri ngᴜlᴜpi dri, te ovᴜpi afa e'irᴜ Mungu vᴜ kᴜri, eri 'dini. 22Eri nga 'yo 'ba erini imbale 'diyi ma tia, E'yo 'disi ma 'yo emi tia, emi asi ma oti idri emini ma e'yosi kᴜ, kani emi nga a'di nya ya; kani rua emini ma e'yosi, emi nga a'di su ya 'dini kᴜ. 23Te idri eri aga nyaka ra, rua aga vini afa suza ra. 24Emi ega e'yo kᴜrekeni: yi rini ori kᴜ, yi loni kᴜ, pari yini nyaka ta mbazᴜri yo, ero vini yo, te Munguni yi dri nyaka feni. Aje emini aga aria ma aje tᴜ! 25Te 'ba emi eselia ecopi i erezarᴜ zozᴜ dika wuale alᴜsi eri asini otilerisiri a'di'i ya? 26Ka econi emini e'yo gakandiarᴜ 'dinileri 'yezarᴜ kᴜ, emi asini oti e'yo acepi 'diyisi a'disi ya? 27Emi ega e'yo ojofᴜ asea 'diyini, yini coria; yi ngani azi kᴜ, pini baka kᴜ indi; te ma 'yo emi tia, ka tro Sulemani ma ngᴜlᴜpi diza erini be dria ti, suni afa i ruaa ekile ojofᴜ 'diyi ma azi alᴜle kᴜ. 28Te Mungu ka afa suza fe iribi aseari dri 'dini, iribi nde ovᴜpi andrᴜ indi te drusi 'bele aciari, agapiri eri ngani afa suza fe emi dri kᴜ ya, emi 'ba a'ita be were 'diyi la? 29Emi nda afa emini ngale nyaleri kᴜ, kani mvuleri kᴜ indi, emi asi ma ombᴜ ombᴜ saarᴜ kᴜ. 30Te afa 'diyi dria suru nyakua 'diyi nda'i; te Ata emini ni kini emi ma ovᴜ afa 'diyi be ra. 31Te emi ma nda suru Munguni'i, afa 'diyi ma nga ovᴜ fezarᴜ emi dri erenirᴜ. 32Emi ma rᴜ kᴜ, emi kabilo were yi okᴜpi ngᴜlᴜrᴜ 'diyi, te eri onyirᴜ emi Ati ma milia suru nderi fezᴜ emi dri. 33Emi ma ozi afa emini ovᴜzᴜ yi be 'diyi ra, emi ma fe alio dri ; emi ma ci emi dri okporo ngapi depi kᴜ 'diyi, lonyi ovᴜpi 'dani 'buari'i, pari oguoᴜni ecazᴜ ogogo kᴜ, azini odukoduni ezazᴜ kᴜria. 34'Dini pari lonyi eminini ovᴜzᴜria, 'daa asi emini nga ovᴜ indi. 35Enyi emi opiliari ma ovᴜ anzuzarᴜ kirikiri, tala emini ma ovᴜ 'izarᴜ indi, 36emi ngᴜlᴜpi ma ovᴜ kile 'ba opi yini ma dri tepi 'diyile, erini emviria engazᴜ omu okᴜ bizaniria, 'dini erini ecaria, kporia, yi ma zi eri dri perepere zi zi beni. 37Ati'ba opini ngazᴜ emuzᴜ yi isuzᴜ yini eri ma dri teria 'dayi ovᴜ drilebarᴜ; ma 'yo emi tia ndi ndi kini eri nga i opile anzu, eri nga yi 'ba rizᴜ va nyaka nyazᴜ, eri nga emu nyaka fe yi dri. 38Eri ka emu enyaacio'dua, kani iniayii, eri ka yi isu 'dini, ati'ba 'diyi yi ovᴜ drilebarᴜ. 39Te emi ma ni 'diri kini, jo e'i ka ndra etu oguoᴜni ngazᴜ emuzᴜri ni ra, te'do econi ndra erini yi kᴜzarᴜ jo erini ma eti lᴜzᴜ kᴜ. 40Emi ma ovᴜ di ngonde indi; a'disikᴜ Mvi 'bani emu etu emini e'yoni egazᴜ kᴜria. 41Petero nga ‘yora, Opi, mi 'yo e'yo o'beza 'diri ama ma e'yosi, kani 'ba dria ma e'yosi ya? 42Opi ‘yora, Ba afa agei tepi asi adasi azini ondᴜa be, eri ma opini ngale 'bale 'ba jo erinia 'diyi ma drilia nyaka o'bizᴜ awazᴜ yi dri etunini ecaleri vᴜsiri, eri a'di'i ya? 43Ati'bo 'dari nga ovᴜ drilebarᴜ, opi erini ka nga eca eri isuzᴜ 'yeria 'dini. 44Ma 'yo emi tia ada ada kini, eri nga eri 'ba amborᴜ afa erini ma drilia dria. 45Te ati'bo 'dari ka 'yo i asia, Opi mani eri i dri ici ici, emuni mbele kᴜ; 'dini eri ka e'do 'ba ati'ba agianzirᴜ 'diyi pi ocozᴜ ati'ba ezoanzirᴜ 'diyi be, ka e'do vini nyazᴜ, mvuzᴜ, azazᴜ ewasi indi, 46isu ati'bo 'dari ma opini nga eca etu erini e'yoni egazᴜ kᴜria, sawa nde erini nile kᴜria, eri nga eri co okposi, nga afa ma esele fele eriniri 'ba 'ba ovᴜpi asi adarᴜsi kᴜ 'diyi be. 47Ati'bo e'yo opini leleri nipi ra te afa edepi ngonde kᴜ, e'yo opini leleri 'yepi kᴜ 'dari, yi nga eri co tᴜ. 48Te 'ba e'yo nipi kᴜri, ka tro e'yo dri fupi cotasi ra 'diyi 'ye ti, yi nga eri co ani were. 'Ba yini afa fele drinia tᴜri dri, yi nga afa a'i tᴜ; te 'ba yini afa kakaᴜ fezᴜ tani mbazᴜ eri vᴜri dri, yi nga ani afa kakaᴜ agapi 'diyi a'i ra. 49Ma emu aci adazᴜ nyaku ma dria; ka ti ko 'bo are, ma le di a'dini ya? 50Te baputizi mani indi, te ma ma bi eri ra; asi mani ovᴜ nzizarᴜ tᴜ de nga erini i 'yeria i paria kᴜrisi! 51Emi ega emi asia kini ma emu asi anzurᴜ fezᴜ nyaku dria? Ma 'yo emi tia ra, ovᴜni 'dini kᴜ, te ma emu bani awata fezᴜ ovᴜzᴜ nyakua; 52engazᴜ curu'do 'ba towi jo alᴜa 'diyi nga awa awa, 'ba na nga awa 'ba iri 'diyi be, iri na 'diyi be; 53yi nga yi awa, ata pi mvi be, mvi pi i ati be, andri pi i zi be, zi pi i andri be, edra pi i edri be edri pi i edra be. 54Eri nga 'yo 'ba ongᴜlᴜmᴜrᴜ ma tia, Emi ka iriti ndre engaria etuni 'derialerᴜ, emi adri 'yo mbele mbele, Ozooni emuni ; te eri nga eca 'dini. 55Emi ka oli ndre liria engazᴜ woko urᴜlerᴜria, emi adri 'yo, Oli drizani nga emu ra; eri nga eca 'dini indi. 56Emi 'ba lokiri be! Emi ni nyaku pi ma mile amazᴜ 'bu beri ra; te emi amani ewu 'diri ma e'yo kᴜ a'disi ya? 57Emi lini e'yo kililirᴜ ondᴜa emi ngᴜlᴜpinisi kᴜ a'disi ya? 58Mini muria 'ba e'yo lipiri ma milia 'ba mi topiri be, mi ma o'bi asi driasi e'yo edezᴜ eri be letia, eri kazᴜ mi sezᴜ okposi 'ba e'yo lipiri ma milia, 'ba e'yo lipiri kazᴜ mi fezᴜ asikari dri, asikari kazᴜ mi 'bezᴜ arᴜjoa kᴜ. 59Ma 'yo mi tia, mi ngani fᴜ 'daa alᴜani kᴜ de nga mi ofeni sente vile asizᴜri kᴜ.

will be added

X\