LUKA 11

1Eri nga eca 'dini, erini Mungu ziria pari azinia, ka de zizᴜ 'bo, 'ba erini imbale 'diyi ma azi alᴜ nga 'yo eri tia, Opi, mi imba ama Mungu zizasi, ekile Yohanani ndra 'ba erini imbale 'diyi imbalerile. 2Eri 'yo yi tia, Emi ka Mungu zi, emi 'yo 'dini: Ata, ru mini ma ovᴜ inzizarᴜ. Suru mini ma emu. 3Etu vᴜsi etu vᴜsi mi fe ama dri nyaka o'du andrᴜniri; 4mi kᴜ e'yo onzi amani, te ama'i indi, ama kᴜ mari 'ba dria alᴜ alᴜ mari nyapi ama vᴜrini; mi ji ama obeta ma alia kᴜ. 5Eri 'yo yi tia, Ba emi eselia a'di'i, ovᴜpi agyi beri, agyi nde ka nga eca eri vᴜ iniaayi, ka nga 'yo eri tia, Ma agyi, mi fe ma dri enya olemirᴜ na toborᴜ; 6te ma agyi engapi aciari eca ma vᴜ, te afa mani ngale fele eri driri alᴜni yo; 7eri nga e'yo omvi geri jo aliarisi 'dini ya, kini, Mi ecandi ma kᴜ; ma opi jotile 'bo, azini anzi mani yi ovᴜ ma be pari dria; econi mani ngazarᴜ fezᴜ mi dri kᴜ? 8Ma 'yo emi tia, Eri ka enga fezᴜ eri dri erini ovᴜle eri agyirisi kᴜ ti, te erini zile dika dikarisi eri nga enga ra, eri nga afa erini a'ile 'diyi fe eri dri ra. 9Ma 'yo emi tia indi, Emi zi, eri nga ovᴜ fezarᴜ emi dri; emi ndru, emi nga isu ra; emi kpo, eri nga ovᴜ zizarᴜ emi dri. 10A'disikᴜ 'ba dria alᴜ alᴜ afa zipiri eri a'i ra, 'ba afa ndrᴜpiri eri isu ra, 'ba kpopiri dri yi nga zi ra. 11'Ba emi eselia ovᴜpi atarᴜ, mva erini ka enya olemi a'i eri dri, ngapi eri dri oni fepi'iri a'di'i ya? 12Eri ka nga a'ugbe a'i, eri nga di eri dria otᴜnᴜkᴜa fe'i ya? 13Ka'dini emi 'ba onzirᴜ 'diyi ka ni afa onyirᴜ fezᴜ emi anzipi dri ra, Ata emini 'buari :ngani Orindi Alatararᴜ fe 'ba eri zipi 'diyi dri aga ra kᴜ ya? 14Eri ovᴜ de orindi onzi ndindi-rᴜri droria. Eri nga eca 'dini, orindi onzi ka fᴜ amve 'bo, 'ba ndindirᴜ 'ba e'yo 'yo ; 'ba ongᴜlᴜmᴜrᴜ yi nga osu ani osu osu. 15Te 'ba azini yi eselia ‘yora, Eri orindi onzi odro Beelizebuli opi orindi onzi ma driliari ma okposi; 16te 'ba azini, yini eri o'biria, nga eceta engapi 'buari ndru eri vᴜ. 17Te eri'i, erini asisile yini nile rarisi, nga 'yo yi tia, Suru nyaza dria yi esele copi ombasi ceni 'diyi nga dri ja ra, aku indi ka i esele co ceni eri nga i eza ra. 18Satani ka i esele co ceni, suru erini nga pa so ngoni ngoni ya? A'disikᴜ emini 'yole ma nze orindi onzi okpo Beelizebulinirisi. 19Te ma ka orindi onzi odro okpo Beelizebulinisi, anzi emini yi di yi odro a'di ma okposi ya? E'yo 'disi yi nga ovᴜ 'ba e'yo emini lipi 'diyirᴜ. 20Te ma ka orindi onzi odro drilejᴜ Mungunisi, awa'dini suru Munguni eca emi vᴜ 'bo. 21'Ba okpo be i osupi afa ombanisiri ka i ma aku agei te, afa erini dria yi nga ovᴜ 'yeke; 22te 'ba okpo be eri agapi rari ka nga emu 'ba nderi ma dria eri agazᴜ, eri nga afa ombani erini asi 'bazᴜ drinia egale kini i nga i pa ani 'diyi o'du dria, nga di afa erini opale ombaa 'diyi awa ra. 23'Ba ovᴜpi ma be kᴜri eri ovᴜ 'ba ma dri arupiri, azini 'ba afa okᴜpi ma be tᴜalᴜ kᴜri eri ere saarᴜ. 24Orindi ondirᴜ ka efᴜ 'ba aliarisi 'bo, eri aga pari yi kokorᴜa, erini ande liza ndaria; te eri ka isu kᴜ eri 'yo, Ma nga dri atri mvizᴜ jo ndra mani efᴜzᴜria. 25Eri ka eca ra, eri isu ko jo ale 'bo, ede eri ra. 26Eri nga di mu orindi azini aziri eri agapi onzisi ra 'diyi okᴜ i vᴜ, yi nga fi ovᴜ 'daa; 'dini agu nderi ma e'yo vileri nga eca onzi aga okori ra. 27Eri nga eca 'dini, erini e'yo 'diyi 'yoria, okᴜ alᴜ 'ba ongᴜlᴜmᴜrᴜ ma eseliari nga oyᴜ o'duko urusi, nga 'yo eri tia, Opojo mi ojipiri ovᴜ drilebarᴜ, ba mini ndrᴜleri be. 28Te eri ‘yora, Kani bani 'ba e'yo Munguni eripi, tani mbapi 'diyi, yi drilebarᴜni! 29'Ba ongᴜlᴜmᴜrᴜ 'diyini yi okᴜria eri vᴜ, eri 'ba 'yo kini, 'Ba a'bianzirᴜ ewu 'dosi 'diyi yi 'ba onzini; yi eceta nda, te eceta ngani ovᴜ fezarᴜ yi dri kᴜ, pe lᴜ eceta Yonani a'dule. 30Mvi 'bani eri ovᴜ ecetarᴜ a'bianzi ewu 'dosi 'diyi drini, ekile ndra Yonani ovᴜle ecetarᴜ 'ba Ninevea 'diyi dririle. 31Okᴜ melekirᴜ engapi angᴜ uru-lerᴜari nga enga etu e'yo lizᴜrisi a'bianzi ewu 'dosi 'diyi be, eri nga yi nde e'yo lizasi ra; erini ndra engale angᴜ ma kalatini asizᴜria ondᴜa Sulemanini erizᴜrisi; te emi ndre, agu Sulemanini agapi rari eri 'doa ci. 32Etu e'yo lizᴜrisi 'ba Ninevea 'diyi nga pa so a'bianzi ewu 'dosi 'diyi be, yi nga yi nde e'yo lizasi ra; yini yi asi ojale e'yo Yonani olᴜleri-sirisi; te emi ndre, 'ba Yonani agapi rari 'doa ci. 33'Ba alᴜni tala 'ipi eri 'bapi pari zizarᴜa, kani acalaka etiani yo, te eri nga eri 'ba pari tala 'bazᴜri ma dria, 'dini 'ba fipi 'diyi ma ndre ani dizani beni. 34Tala mi ruani eri mi mileni; te mi mile ka ovᴜ alarᴜ, rua mini dria nga ga dizasi tre; te mi mile ka ovᴜ onzi, mi ruani nga ga angᴜ bizasi tre indi. 35Ka'dini mi lu onyirᴜ diza ovᴜpi mi aliari kazᴜ ovᴜzᴜ bizarᴜ kᴜ. 36Mi rua dria ka ga dizasi tre, 'dini esele alᴜni ka ovᴜ bizarᴜ kᴜ, eri nga ovᴜ diza be tre, ekile talani angᴜ emvele mi dri diza erinisirile. 37De erini e'yo 'yoria, 'ba Farisaini nga eri omve nyaka nyazᴜ i be; eri nga fi, ri nyaka tia. 38Te 'ba Farisaini ka ndre ra, asi erini osu tᴜ a'disikᴜ Yesuni nyaka nyale 'dani rᴜa ojikokorᴜrisi. 39Opi nga 'yo eri tia, Te di emi 'ba Farisaini, emi adri ejea pi ma ngᴜkᴜ amvelerᴜri oji ko'biani be'i, te alialerᴜ emi ga tre afa opaza pisi e'yo onzi be. 40Emi 'ba azazani! 'Ba ngᴜkᴜ amvelerᴜri edepiri edeni alialerᴜri indi kᴜ ya? 41Emi fe afa ovᴜpi alenia 'diyi afa fezarᴜ; te mi ndre, afa dria nga ofᴜ alarᴜ emi dri ani. 42Te candi emi dri, emi 'ba Farisaini! emi adri tibi ma esele mᴜdriniri fe ra, afa arikarirᴜri pi, mondrokolo pi, tibi be dria, te emi adri e'yo liza onyirᴜri pi kᴜ ja leta Munguni be; te onyirᴜ emi ka ndra e'yo 'diyi 'ye, e'yo azini 'diyi kᴜzᴜ kᴜ indi 'yeke. 43Candi emi dri 'ba Farisaini! emini ogᴜŋa drilerᴜ pari 'bani yi okᴜzᴜriari pi lele zita cuua 'diyi berisi. 44Candi emi dri! emini ovᴜle ekile nyadri i e'dapi kᴜ 'diyilerisi, te 'ba acipi yi ma dria 'diyi nini kᴜ. 45'Ba azita imbapi 'diyi ma azi alᴜ nga e'yo omvi, 'yo eri tia kini, 'Ba 'ba Imbapiri, mini e'yo 'diri 'yoria mi di ama onzo indi. 46Eri nga 'yo, Candi emi dri indi, emi 'ba azita imbapi 'diyi la! emini teri nzizarᴜ 'bani 'dule ewasi 'diyi o'bale 'ba driarisi, de te emi ngᴜlᴜpi eloni afa nzizarᴜ nde 'diyi drianzi emini ma azi alᴜnisi kᴜ. 47Candi emi dri! emini nabi ma nyadri silerisi, de te emi a'bipi ofᴜ ndra yini. 48'Dini emi ovᴜ 'ba e'yo eti nzepi 'diyirᴜ, azi emi a'bipini 'yeleri a'izᴜ; yirᴜni yi ofᴜ yi ra, te emi'i, emi si yi ma nyadrini. 49E'yo 'disi ondᴜa Munguni 'yo indi, Ma nga nabi piyi ti pe 'ba ti opele 'diyi be yi vᴜ, yi nga azini 'diyi ofu ra, azini 'diyi inza ra, 50'dini yi nga nabi dria ma ari 'bani adale engazᴜ nyaku tini e'dozᴜrisir ma arioti a'i a'bianzi ewu 'dosi 'diyi vᴜ, 51engazᴜ ari Habilinisi ecazᴜ kpere ari Zakariani vᴜ, agu nde yini fule pari edeta edezᴜri pi ma eselia jo Munguni beri'i. Ada, ma 'yo emi tia, eri nga ovᴜ a'izarᴜ a'bianzi ewu 'dosi 'diyi vᴜ. 52Candi emi dri, 'ba azita imbapi 'diyi la! emini fungua ondᴜani palerisi; emi ma ngᴜlᴜpi fini kᴜ, te emi oga 'ba 'yepi fipi 'diyi fiko si. 53Eri ka efᴜ 'daarisi 'bo, karani piyi 'ba Farisaini be yi nga 'ba ozo eri dria okposi, yi fe eri dri e'yo 'yozᴜ e'yo o'birᴜ ma dria, 54e'yo erini mbazᴜ, yi ma isu e'yo azini efᴜpi eri ma tiliari ani.

will be added

X\