LUKA 10

1E'yo 'diyi ma vᴜtia, Opi nga'ba kali aziri azini 'diyiope, ngayi ti pe iri iri muzᴜ i drilia aku azini pari dria alᴜ alᴜ i ma ngᴜlᴜpini 'yezᴜ muzᴜria. 2Eri nga 'yo yi tia, Anya kaza ka tᴜ, te 'ba azi ngapi 'diyi were; e'yo 'disi emi 'ba matᴜ Opi anya kaza ma e'i vᴜ, eri ma pe 'ba azi ngapi 'diyi ma ti anya kaza erini ma alia. 3Emi mu leti eminia; emi ndre, ma pe emi ti 'balau eselia ekile kabiloanzile. 4Emi ma su okporo kᴜ, jᴜrᴜa kᴜ, enyiriko paari kᴜ; azini emi ma zi 'ba ci ci geria alᴜni kᴜ. 5Emini ngaria firia jo ngonini ma alia, emi 'yo okoni, Asi anzurᴜ ma ovᴜ jo 'diri ma dria! 6Mva asi anzurᴜ beri ka ovᴜ 'daa indi, asi anzurᴜ eminiri nga ri eri dria; te ka kᴜ, eri nga emvi emi vᴜ dika. 7Emi adri jo 'diri ma alia, afa yini fele emi dri 'diyi nyaria, mvuria, te 'ba azi ngapiri fu dri oya a'izᴜ ra; emi mu ovᴜzᴜ jo vᴜsi jo vᴜsi kᴜ. 8Aku nde emini fizᴜ, yini emi a'izᴜria, emi ma nya afa 'bani 'bale emi miliari ra; 9emi ati 'ba azorᴜ angᴜ ndea 'diyi ra, emi 'yo yi tia indi, Suru Munguni eca emi vᴜ ogogo 'bo. 10Te aku emini fizᴜ yini emi aizᴜ kᴜria, emi fᴜ mu gboko aku ndeniri ma alia, emi 'yo, 11Irifᴜra nde ovᴜpi aku eminia i ebipi ama pa ageleari, ama ewe e'yo eti nzezu emi dria; ka' dini ti, emi ni 'diri, kini, suru Munguni eca emi vᴜ ogogo 'bo. 12Ma 'yo emi tia, O'du 'darisi e'yo lizani nga ovᴜ ewarᴜ tᴜ aku 'dari dria aga Sodomu driari ra. 13Candi mi dri, Korazini! candi mi dri, Betesaida! tali okpo be ovᴜpi 'yezarᴜ emi ma alia 'diyi ka ovᴜ ndra 'yezarᴜ Turoa azini Sidonia, te'do yi oja yi asi ndra drio, koliba suzᴜ yi ruaa orizᴜ ofᴜta alia candisi. 14Te e'yo liza ma alia e'yoni nga ovᴜ ewarᴜ tᴜ emi dria aga Turo pi ma dria Sodomu beri ra. 15Mi'i Kaperinaumu la, yi nga mi 'du 'ba uru kpere 'bua ya? Mi nga si va kpere Pari 'ba drazaniri ma alia ra. 16'Ba e'yo emini eripiri eri e'yo mani eri ra, 'ba emi gapiri eri ma ga, azini 'ba ma gapiri eri 'ba ma ti epepiri ga'i. 17'Ba ndraka kali aziri 'diyi nga emvi ayiko be, kini, Opi, ka tro orindi onzini ti, yi e'yo amani eri mi rusi ra! 18Eri 'yo yi tia, Ma ndre Satanini e'deria 'bua ekile ovini galerile. 19Mi ndre, ma fe emi dri okpo emini pa tᴜzᴜ uri pi ma dria otᴜnᴜkᴜa be 'bo, azini vini okpo okpo dria juruniri agazᴜ; afa azini alᴜni emi 'yepi onzini yo. 20Ka-'dini ti, emi ovᴜ ayiko be e'yo 'dirisi, kini orindi nde yini e'yo emini erilerisi, 'dini kᴜ; te emi ma ovᴜ ayiko be emi runi ovᴜle sizarᴜ 'bua 'borisi. 21Etu nde 'dasi eri ovᴜ ayiko be Orindi Alatararᴜsi, eri nga 'yo, Ma mi inzi tᴜ, Ata, mi Opi 'bu pini nyaku beri, mini e'yo 'diyi ozile 'ba ondᴜarᴜ pi ma milia 'ba e'yo vapi kililirᴜ 'diyi be ra, yi ecezᴜ 'ba odekᴜarᴜ 'diyi dririsi; e, Ata, 'yezᴜ 'diniri ovᴜ onyiro mi milia. 22Ma Ati fe afa dria ma dri 'bo; azini 'ba alᴜni nini Mvi eri a'di'i yari kᴜ pe Ata'i a'dule, azini 'ba alᴜni nini Ata eri a'di'i yari kᴜ pe Mvi'i a'dule, azini vini 'ba Mvini lele Atani ecezᴜ eri driri'i. 23Erini ti coria 'ba erini imbale 'diyi vᴜ, eri nga 'yo yi tia oyokolosi, Mileefi afa emini ndrele 'diyi ndrepiri ovᴜ drilebarᴜ! 24Te ma 'yo emi tia kini, nabi kakaᴜ meleki pie, yi le ndra afa emini adrile ndrele 'diyi ndre, te ndreni kᴜ; yi le afa emini erile 'diyi eri indi, te erini kᴜ. 25Mi ndre, 'ba azita imbapiri alᴜ nga pa so uru, eri o'bizᴜ kini, 'Ba 'ba Imbapiri, ma ma 'ye ngoni ka, mani idri 'dani 'dani isuzᴜ awitarᴜ ani ya? 26Eri 'yo eri tia, Si ndra azita ma alia e'yo ngoni ya? Mi la ngoni ya? 27Eri nga omvi 'yo kini, Mi ma le di Opi Mungu mini mi asi driasi, mi orindi driasi, mi okpo driasi, mi asisile driasi; mi ma le 'ba ovᴜpi mi jo ejeleari mini mi ngᴜlᴜpi lelerile. 28Eri 'yo eri tia, Mi omvi e'yo 'yeke; mi 'ye 'dini, mi nga di ovᴜ idri be ani. 29Te eri'i, erini lele i ngᴜlᴜpi ecezᴜ onyirᴜsi, nga 'yo Yesu tia, Te 'ba ovᴜpi ma jo ejeleari a'di'i ya? 30Yesu nga e'yo omvi, 'yo ra kini, Agu azini enga Yerusalemua esi muzᴜ Yerikoa; nga dri fu oguoᴜ afa opapi 'diyi be. 'Ba nde 'diyi otrᴜ bongo erini, co eri, mu di ra, kᴜ eri de eri 'ye dra dra. 31Isu eri eca 'dini, 'ba kuhanirᴜ alᴜ nga si leti andralerᴜ 'dasi; ka eri ndre ra, eri ali leti kalaarisi. 32'Ba Levini 'ye trotro 'dini indi, eri ka eca pari 'daria, ka eri ndre ra, eri nga aga leti kalaarisi. 33Te 'ba Samariaari alᴜ erini aciria, nga eca eri vᴜ; ka eri ndre ra, yiki nga eri fu erisi, 34eri emu vᴜnia ogogo, nga odᴜ pi osᴜ patiefi ma su be bile erini ma milia, nga ombe bongosi; eri nga eri 'ba akanya iniri ma dria, nga eri eji jo 'ba acipi aci 'diyini lazᴜria, eri nga eri agei te. 35Dru 'dini eri nze silingi iri, fezᴜ jo e'i dri, 'yozᴜ kini, Mi te di eri ma agei ci; afa mini ezale silingi 'diyi ma driari, mani emviria ma nga ariotini omvi mi dri ma'i. 36Ka'dini 'ba na 'diyi ma eselia, mi ega a'di ovᴜ 'ba dri fupi oguoᴜ be 'diri ma agyi jo ejelearirᴜni ya? 37Eri nga ‘yora, 'Ba yiki 'bapi eri vᴜri'i. Yesu 'yo eri tia, Mi mu 'ye 'dini indi. 38Yini aciria eri fi aku azinia; okᴜ alᴜ runi Marita nga eri a'i jo inia. 39Amvipi erini runi Mariamu'i ri Opi ma palaalerᴜ e'yo erini erizᴜ. 40Te Maritani de i ecandi- ria azi kakaᴜsi, eri nga emu vᴜnia, nga ‘yora, Opi la, mi egani e'yo ma amvipini ma kᴜzᴜ azi ngazᴜ a'duieri kᴜ ya? Mi azi eri ma ko ma aza fo. 41Te Opi nga e'yo omvi, 'yo tinia, Marita, Marita, mi asini oti oti mini otaria afa kakaᴜ ma 'yezasi; 42te di afa leleri ovᴜ alᴜ a'dule. Te Mariamu pe ini afa esele onyirᴜ, yini ngale pale eri ma dria kᴜri'i.

will be added

X\