LUKA 1

1'Ba kakaᴜ yini dri 'bale e'yo ovᴜpi 'yezarᴜ yi paria ama eselia 'diyi otizᴜ waraka ma alia kililirᴜrisi, 2ekile 'ba e'yo nde ndrepi milesi engazᴜ okokele e'yo ma azi ngapi 'diyini idrile ama vᴜrile, 3e'yo 'disi ma ndre eri onyirᴜ ma ma si ani waraka e'yo alᴜ alᴜ ecezᴜ mi dri indi, ambo Teofilo, mani e'yo dria ma vᴜti drole kililirᴜ engazᴜ driorisi; 4mi ma ni e'yo yini mi imbazᴜri ma ada ani. 5Ewu Herodeni ovᴜzᴜ opirᴜ Yudiaarisi, 'ba edeta edepiri ndra indi runi Zakaria'i, amutini Abiya vileri'i; eri vile okᴜri ezoanzi Aronini 'diyi ma azi, ma ru Elizabeti'i. 6Yi iritro ovᴜ 'ba kililirᴜ Mungu ma milia, yi aci azita azini e'yo Opini azile 'diyi ma alia e'yo onzi kokorᴜ. 7Te mva yini yo, Elizabetini ovᴜle ondonirisi, yi iri tro 'ba dezani. 8Eri nga eca 'dini, erini azi kuhanini ovᴜpi pezarᴜ eri driri ngaria amuti erini ma alia Mungu milia, 9ekile kuhanini adrile 'yelerile, pe eri fizᴜ Opi vile hekalᴜa afa aji be arikarirᴜri vezᴜ. 10Te etu 'bani afa aji be arikarirᴜri vezᴜria, 'ba dria yi okᴜpi ngᴜlᴜrᴜ 'diyi yi yini de Mungu a'iria amve. 11Malaika Opini pa sopi pari afa aji be arikarirᴜri vezᴜri ma dri ndiriari nga i e'da eri ma milia. 12Zakaria erini ndreria asi erini nga oti oti, urini nga eri bi ci. 13Te malaika 'yo eri tia, Mi rᴜ kᴜ, Zakaria, a'disikᴜ zita mini ovᴜ erizarᴜ 'bo, okᴜ mini Elizabetini nga mva ti mi dri, mi nga runi 'da Yohana'i. 14Mi nga ovᴜ ayikosi nyoŋa be, 'ba kakaᴜ yi nga ovᴜ ayikosi osiza erinisi indi; 15eri nga ovᴜ amborᴜ Opi ma milia, te eri ngani patiefi ma su pi mvu ewa draza be kᴜ; Orindi Alatararᴜni nga ga eri asia tre, kpere erini efᴜria andri ma opojo ma aliarisi. 16Eri nga anzi Israelini oja kakaᴜ Opi Mungu yini vᴜ. 17Eri nga mu eri drilia orindi azini okpo Eliyanirisi, atipi ma asi ojazᴜ anzi yini vᴜ, fezᴜ 'ba e'yo gapi 'diyini acizᴜ ondᴜa 'ba kililirᴜ 'diyini ma alia; suru 'bazᴜ edezarᴜ ngonde Opi dri beni. 18Zakaria .nga 'yo malaika tia, Ma nga di e'yo 'di ni e'yo ngosi ya? Ma 'ba dezani, okᴜ maniri 'ba dezani indi. 19Malaika nga e'yo omvi kini, Ma Gabiraeli, pa sopi Mungu miliari'i; pe ma ti e'yo 'yozᴜ mi be, e'yo barᴜ 'diyi olᴜzᴜ mi tia. 20Mi ndre, mi nga ovᴜ ndindirᴜ, mi ngani eco e'yo 'yozarᴜ kᴜ de nga etu e'yo 'diyini yi 'yezᴜri ecani kᴜ, a'disikᴜ mini e'yo mani 'yoleri a'ile kᴜrisi, te yi nga yi 'ye yi paria ewu yini ka nga eca raria. 21'Ba nde yi ri ndra Zakariani te, yi osu tᴜ erini i dri icile hekalu ma aliarisi. 22Erini efᴜria econi erini e'yo 'yozarᴜ yi tia kᴜ, yi nga ni ani kini eri ndre afa ndreza hekalu ma alia; eri nga e'yo e'da yi dri drisi, eri awi ndindirᴜ 'dani. 23Eri nga eca 'dini, etu erini azi ngazᴜri ka i de ra, eri nga mvi akua. 24O'du 'diyi ma vᴜtia okᴜ erini Elizabeti nga mva isu i ma alia, nga i zi mba towi, kini, 25Opi 'ye ma be 'dini 'bo o'du erini ma ndrezᴜ, drinza mani nzezᴜ 'ba ma eseliarisi. 26Mba aziasi Mungu pe malaika Gabiraeli ma ti aku Galilia omvele Nazareti'iria, 27aliria agu Daudi ma orirᴜ omvele Yusufu'irini e'dole jeleri vᴜ; aliria ma ru Mariamu'i. 28Malaika emu eri vᴜ, nga ‘yora, I zi mi ci ci, mi 'ba 'yeta anzutiri a'ipi tᴜri, Opi eri mi be! 29Te e'yo 'dirisi asini nga oti oti, eri nga i zi ceni kini, ziza 'diri eri ziza ngoni ngori. 30Malaika 'yo eri tia kini, Mi rᴜ kᴜ, Mariamu, mi isu 'yeta anzutiri Mungu vᴜ 'bo. 31Mi ndre, mi nga mva isu mi alia, mi nga agimva ti, mi nga eri ru 'da Yesu'i. 32Eri nga ovᴜ 'ba amborᴜ, yi nga eri omve Mungu ovᴜpi Uru Tᴜri ma Mvi; Opi Munguni nga eri dri ogᴜŋa a'bi erini Daudiniri fe, 33eri nga opi nya suru Yakoboni ma drilia 'dani 'dani; opi nyaza erini ngani i de kᴜ. 34Mariamu nga 'yo malaika tia, E'yo 'diri nga ovᴜ ngoni ya, de isu ma lani nga agupi be kᴜ ka? 35Malaika nga e'yo omvi, nga 'yo eri tia, Orindi Alatararᴜ nga emu mi dria, okpo Mungu ovᴜpi Uru Tᴜrini nga ovᴜ mi drilia endrilendrile ; e'yo 'disi afa nde alarᴜ mini mule tileri, yi nga eri omve Mvi Munguni. 36Mi ndre, mi amvi Elizabeti, eri ka tro de 'bo ti, te eri isu mva i ma alia indi; mba 'diri eri mba o'depi okᴜ ndra omvele ondoniri ma dria aziari'i. 37A'disikᴜ e'yo alᴜni ngani ovᴜ ecokokorᴜ Mungu vᴜni kᴜ. 38Mariamu kini, Mi ndre, ma ati'bo Opini; e'yo ma 'ye i ma vᴜ mini 'yolerile. Malaika nga di eri kᴜ ra. 39Mariamu enga o'du 'dayisi, mu angᴜ uru oni driaria mbele, ca aku Yudania, 40nga fi Zakaria vile joa, nga Elizabetini zi ra. 41Eri nga eca 'dini, Elizabeti ka zita Mariamuni eri, coti mva mbᴜ eri alia; Orindi Alatararᴜ ga Elizabeti ma asia tre, 42eri nga oyᴜ o'duko urusi, nga 'yo kini, Mi ovᴜ asi ndriza be okᴜ azini ma eselia, azini afa mi opoari eri asi ndriza be indi! 43E'yo 'diri 'ye i ma vᴜ ngoni ya, Opi mani ma andrini ecazᴜ ma vᴜ 'donini ya? 44Mi ndre, o'duko mini ma zizᴜri ka eca ma bilia ra, mva mbᴜ ma alia ayikosi. 45Te 'ba a'ipiri ovᴜ drilebarᴜ; e'yo nde Opini 'yole tiniarini ngale ovᴜle 'yezarᴜrisi. 46Mariamu nga 'yora, 47Asi mani eri e'yo Opini inzi, orindi mani ovᴜ ayikosi Mungu ma Papirisi, 48a'disikᴜ eri ndre ati'bo zaŋarᴜ erini ma candi 'bo. Te emi ndre, engazᴜ curu'do a'bianzi dria yi nga ma omve drilebarᴜ; 49a'disikᴜ 'ba ovᴜpi okpo be tᴜri 'ye ma vᴜ e'yo amboni, te ru erini ovᴜ alatararᴜ. 50Yiki erini nga eca 'ba eri rᴜpi 'diyi ma dria a'bianzi vᴜsi a'bianzi vᴜsi. 51Eri 'ye e'yo okporᴜ eri ma wusi, eri ere 'ba afᴜ be 'diyi asisile yi ma asiarisi 'bo, 52eri onze opi ogᴜŋa driarisi ra, eri 'ba 'ba ele 'diyi uru; 53eri fe 'ba abiri be 'diyini trazᴜ afa onyirᴜsi 'bo, te eri dro 'ba afa e'ipi 'diyi mvizᴜ pirini. 54Eri ko ati'bo erini Israeli ma aza, 'dini eri ma ega yiki ani, 55ekile ndra erini olᴜle a'bi amani ma tia, ada, Iburahimu pi ma tia ori erini be 'dani 'danirile. 56Mariamu ovᴜ eri be kile mba nale, nga di mvi aku inia ndo. 57Etu Elizabetini mva osizᴜri eca ra, eri osi agimvani. 58'Ba eri ma jotilea ogogo 'diyi pi ori'ba erini pie, yi eri kini Opi 'ba yiki ini eri vᴜ amborᴜ, yi nga ovᴜ ayikosi eri be. 59Eri nga eca 'dini, o'du arorisi yi mu mva ma agele lizᴜ ; yi 'ye eri omve Zakaria i ati ma ru vᴜsi, 60te andrini nga e'yo omvi kini, 'Dini yo; te yi nga rᴜni 'da Yohana'i. 61Yi 'yo eri tia, Ori'ba mini ma azi 'bani runi omvele 'dinini yo. 62Yi nga atini aku drisi lezᴜ eri le 'ba ma omve mva ma ru ngoni yari nizᴜ. 63Eri omve bau e'yo sizᴜ driniari, eri nga si kini, Ru erini Yohana'i. Yi dria nga osu tᴜ. 64Tileniri nga ovᴜ zizarᴜ coti, andreni nga ovᴜ ayuzarᴜ indi, eri nga e'yo 'yo Mungu inzizᴜ. 65Uri eca 'ba dria ovᴜpi yi ma jo ejelea 'diyi vᴜ. E'yo 'diyi nga ku wakaka kpere angᴜ Yudiaa oni dria urᴜria dria; 66'ba dria eripi 'diyi 'ba e'yo 'diyi yi asia ci, kini, Mva 'diri nga di ofᴜ 'ba ngonirᴜni ya? A'disikᴜ dri Opini ovᴜ eri be. 67Orindi Alatararᴜ nga ga ati Zakaria ma asia tre, eri nga e'yo ondri 'yozᴜ kini, 68Ru Opi Mungu Israelinirini ma ovᴜ inzizarᴜ, erini 'ba erini andrile azini azi 'ba onzezᴜri 'yele yi dririsi, 69erini o'yᴜ pataniri engale uru ama dri ati'bo erini Daudi ma joarisi, 70(ekile erini 'yole nabi erini alatararᴜ ovᴜpi ndra drio 'diyi ma tisirile) 71pata nde erini ama pazᴜ ama juru dri, azini 'ba ama ngupi onzi 'diyi dri driari'i; 72yiki 'bazᴜ ama a'bipi vᴜ, aziza erini alatararᴜri egazᴜ, 73oyo nde ndra erini sole a'bi amani Iburahimu vᴜri'i, 74kini eri pa ama juru amani dri ama ma nga azi erini uri kokorᴜ beni, 75o'du amani ovᴜzᴜria dria, e'yo alatararᴜri pisi eri ma milia e'yo kililirᴜri be. 76Te mi indi, mvaa, 'ba yi nga mi omve Mungu ovᴜpi Uru Tᴜri ma nabi'i; mini ngale mule Opi ma drilia leti erini edezᴜrisi, 77fezᴜ suru erini ma ni e'yo patani erini ezata yini wulerisi, 78asi ndriza yikirᴜ Mungu amanirinisi, asi ndriza ndesi angᴜ atiza ibi esi 'bua eca ama andrizu 79diza fezᴜ 'ba ripi angᴜ inicicirᴜ dra ma endrilendriari ma alia 'diyi dri, ama dri cezᴜ pa 'bazᴜ geri asi anzurᴜniria. 80Mva co ra, orindi erini eca okporᴜ, eri ovᴜ angᴜ didia de nga o'du erini i ecezᴜ Israeli vᴜri ecani kᴜ.

will be added

X\