YOHANA 5

1E'yo 'diyi ma vᴜtia omu 'ba Yahudini nga ovᴜ indi; Yesu nga tu mu Yerusalemua ani. 2isu de 'bile yini egazᴜ aleniari indi Yerusalemua kabilo vile kalitilia, yini omvele 'ba Yahudini ma tisi Betesida'iri, eri ovᴜ jobileko eti be towi. 3'Ba azorᴜ karakaraᴜ yi adri la jobileko eti 'diyia, 'ba mile odraza piyi, 'ba acozarᴜ 'diyi pie, 'ba rua ondripi ondri 'diyi pie, yini osaza yini teria. 4Te ewu alᴜ alᴜ azinisi malaika Opiniri adri esi fi 'bile yini egazᴜria, fezᴜ yini adizᴜ; ka'dini 'ba fipi yia adiza ma vᴜtia okori ma ruani nga eca alarᴜ ra, azo ka ovᴜ ngoni ti. 5Agu azini 'daa indi ovᴜpi dra erini be eli kali na drini arori. 6Yesu ka ndre erini laria, erini niria ewu aga drinia izᴜrᴜ, eri 'yo eri tia, Mi le mi rua ma eca alarᴜ ra ya? 7Agu rua azo beri nga e'yo omvi eri tia, Opi, yi ka adi ra, 'ba mani ma 'bepi yi egaza ma aliani yo, te mani nga emuria, 'ba azini nga si va mani oko. 8Yesu nga 'yo eri tia, Mi enga uru, mi 'du pari mini, mi aci. 9Perepere agᴜ nde ma rua nga eca alarᴜ ra, eri 'du pari erini, eri 'ba aci aci. De o'du 'dari sabatoni. 10E'yo 'disi 'ba Yahudini nga 'yo 'ba rua atizari ma tia, Andrᴜ o'du sabatoni, azita a'ini mini pari 'duzᴜ kᴜ. 11Te eri nga e'yo omvi yi tia, 'Ba ma rua atipi alarᴜri 'yo ma tia, Mi 'du pari mini, mi acirini. 12Yi zi eri tia, Agu 'yopi mi tia, Mi 'du pari mini, mi aciri a'di'i ya? 13Te 'ba ruanini atileri nini eri a'di'i yari kᴜ; isu de Yesu nga 'daarisi ra, 'ba karakaraᴜni ovᴜle 'daa cirisi. 14Vilerisi Yesu nga eri isu hekalua, nga 'yo eri tia, Mi ndre, mi rua ati alarᴜ 'di! Mi ma 'ye onzi dika kᴜ, afa onzi agapiri kazᴜ i 'yezᴜ mi ruaa kᴜ. 15Agu 'diri nga mu 'yo 'ba Yahudini ma tia kini 'ba i rua atipi alarᴜri eri Yesu'i. 16E'yo 'disi 'ba Yahudini e'do Yesuni inza, erini afa 'diri 'yele o'du sabatonisirisi. 17Te Yesu nga e'yo omvi yi tia, Ma Atini azi nga kpere curu'do, ma azi nga alᴜ indi. 18E'yo 'disi 'ba Yahudini ndru eri fuzᴜ aga okori ra, a'disikᴜ erini e'yo sabatoni ezale a'dule kᴜrisi, erini vini Mungu omvele i Ati'i, i 'bazᴜ Mungu bc trotrorisi. 19E'yo 'disi Yesu nga e'yo omvi 'yo yi tia, Ma 'yo emi tia ndi ndi, Mvi econi afa alᴜni 'yezarᴜ i drisi kᴜ, te kiri afa erini ndrele Atani 'yeleri'i; te afa dria erini 'yele 'diyi, Mvini 'ye alᴜ indi. 20Te Ata le Mvini, eri ece eri dri afa dria eri ma ngᴜlᴜpini 'yele 'diyi ra; eri nga eri dri azi ambo azi nde agapi ra 'diyi ece indi, emi asi ma osu ani. 21Ekile Atani 'ba draza engale idri fezᴜ yi dririle, 'dinile indi Mvini idri fe 'ba eri ma asini lele 'diyi dri. 22Te Ata lini e'yo 'ba alᴜni ma dria kᴜ, te eri fe e'yo liza dria Mvi dri 'bo, 23'dini 'ba dria ma inzi Mvini ani, yini Atani inzilerile. 'Ba Mvini inzipi kᴜri inzini Ata eri ma ti epepiri kᴜ. 24Ma 'yo emi tia ndi ndi, 'ba e'yo mani eripi, 'ba ma ti epepiri a'ipi indiri, ovᴜ idri 'dani 'dani be, eri fini e'yo liza ma alia kᴜ, te eri aga dra ma aliasi fi idri ma alia 'bo. 25Ma 'yo emi tia ndi ndi, etᴜni emu emu, eca di curu'do 'bo, eri etu 'ba draza 'diyini ngazᴜ Mungu Mvi ma o'duko erizᴜri'i, te 'ba eripi 'diyi nga ovᴜ idri be. 26Ekile Atani ovᴜle idri be i ma ngᴜlᴜpi-sirile, 'dini eri fe vini Mvini ovᴜzᴜ idri be i ma ngᴜlᴜpisi indi, 27azini eri fe okpo eri dri e'yo lizᴜ, erini ovᴜle Mvi 'banirisi. 28Emi asi ma osu e'yo 'dirisi kᴜ ; te etuni emu ra, etu ndesi 'ba dria ovᴜpi nyadria 'diyi nga o'duko erini eri ra, 29yi di nga efᴜ ra, 'ba azi onyirᴜ 'yepi 'diyi nga fi engata idriniria, te 'ba azi dri fupi kᴜri 'yepi 'diyi nga fi engata e'yo lizaniria. 30Ma econi afa 'yezarᴜ ma drisi alᴜni kᴜ; ma e'yo li ekile mani erilerile; e'yo mani lileri eri kililirᴜ, mani e'yo ma asini leleri ndrule kᴜ te e'yo 'ba ma ti epepirini leleri ndrᴜle'irisi. 31Te ma ka e'yo maniri ma eti nze, e'yo eti nzeza maniri ovᴜni adarᴜ kᴜ; 32'ba e'yo mani ma eti nzepiri eri 'ba azini, ma ni ra e'yo eti nzeza erini nzele masiri eri adarᴜ. 33Emi pe ojioᴜ ti Yohana vᴜ, eri nze e'yo adarᴜri ma eti 'bo. 34Te e'yo eti nzeza mani a'ileri engani 'ba vᴜ kᴜ; te di ma e'yo 'diyi 'yo, emi ma ovᴜ pazarᴜ ani beni. 35Eri ovᴜ tala 'izarᴜ diza dipiri'i, emi asi le ndra ovᴜzᴜ ayikosi ewu weresi diza erini ma alia. 36Te e'yo eti nzeza mani ovᴜzᴜ eri beri aga Yohananiri ra; te azi Atani fele ma dri mani yi dezᴜ ani, azi nde mani 'yele 'diyi yi e'yo mani ma eti nzeni, kini Ata epe ma tini. 37Ata ma ti epepiri eri nze e'yo mani ma eti 'bo. Engazᴜ drio emi erini nga eri ma o'duko kᴜ, emi ndreni vini wura erini kᴜ indi; 38emi ovᴜni e'yo erini be emi alia kᴜ, emini 'ba erini tini epeleniri a'ile kᴜrisi. 39Emi ndru e'yo siza ma alia, emini egale kini emi idri 'dani 'dani isu yi ma aliarisi ; te e'yo siza nde 'diyi yi e'yo mani ma eti nzeni; 40te emi leni emu ma vᴜ emini idri isuzᴜ kᴜ. 41Ma a'ini inzita 'ba vᴜ kᴜ. 42Te ma ni emi ra, kini emi ovᴜni leta Munguni be emi alia kᴜ. 43Ma emu ma Ati ma rusi 'bo, te emi a'ini ma kᴜ; 'ba azini ka emu i ma ngᴜlᴜpi ma rusi, emi nga eri a'i ra. 44Emi 'ba inzita a'ipi emi eselia ceni ceni 'diyi, emi eco ovᴜzarᴜ a'ita be ngoni ngoni ya, de emi ndruni inzita engapi Mungu alᴜri vᴜri kᴜ ya? 45Emi ma ega ma nga asᴜ sᴜ emi ruaa Ata vᴜ 'dini kᴜ; 'ba asᴜ sᴜpi emi ruaari Musa emini asi 'bale driniari'i. 46Te emi ka Musani a'i ra, emi te ma a'i indi, a'disikᴜ eri si e'yo mani. 47Te emi ka e'yo siza eriniri a'i kᴜ, emi nga e'yo 'yoza mani a'i ngoni ngoni ya?

will be added

X\