YOHANA 21

1E'yo 'diyi ma vᴜtia Yesu nga i ece 'ba erini imbale 'diyi dri dika miri Tiberiani ma tia; eri ece i 'dini. 2Simoni Petero pi, Toma yi-ni omvele Ejorᴜri pie, Natanieli Kana Galiliariniri pie, anzi Zebedayoni pie, 'ba azini iri erini imbale 'diyi pie yi ovᴜ tualᴜ. 3Simoni Petero nga 'yo yi tia, Ma mu mani e'bi okᴜ. Yi nga 'yo eri tia, Ama mu mi be indi. Yi ko dri ra, tu o'bo ma alia ra; te ini 'darisi yi isuni afa alᴜni kᴜ. 4Te angᴜ ka 'ba ati curu'do 'bo, Yesu eri so pa yi kutia; te ti 'ba erini imbale 'diyi nini eri Yesu'iri kᴜ. 5Yesu nga di 'yo yi tia, Anzi la, afa nyaza emi dri indi ya? Yi nga e'yo omvi eri tia, Yo. 6Eri 'yo yi tia, Emi 'be emba o'bo ma kala dri ndialerᴜria, emi nga isu ra. Yi 'be ani, te curu'do okpo yini funi dri emba esezᴜ kᴜ, e'bini ovᴜle karakaraᴜrisi. 7'Ba Yesuni imbale erini leleri nga 'yo Petero ma tia ani, 'Di Opi'i! Simoni Petero ka di eri kini eri Opi'i, eri nga afa suza ini anzu i ruaa erini ovᴜle pililirᴜrisi, nga i 'be miri alia. 8Te 'ba erini imbale 'diyi ma azi yi nga emu o'bo wererisi, de yi kuti aceni re kᴜ, te ekile wuale tᴜrᴜ iri 'dipile; o'bo vᴜtia yi se emba ovᴜpi e'bi be alenia treri se se. 9Yi ka fᴜ amve nyaku dria 'bo, yi ndre aci edᴜzarᴜ aciolᴜsi 'daa, drinia e'bi pi mikate be. 10Yesu nga 'yo yi tia, Emi eji e'bi emini okᴜle curu'do 'diyi ma azi. 11Simoni Petero tu di ani o'bo alia, nga emba ese nyaku dria. Emba nde ga tre e'bi 'wara 'wara tᴜrᴜ alᴜ drini kali towi drini na 'diyisi; te ka tro e'bi eri alia kakaᴜ ti, emba ceni i kᴜ. 12Yesu nga 'yo yi tia, Emi emu nyaka o'bitiniri nya. Ba erini mbale 'diyi ma azi alᴜni i asi imbapi zizᴜ eri tia, Mi a'di'i ya?-ni yo, yini nile eri Opi'irisi. 13Yesu nga di emu mikate 'du, fe yi dri, e'bi be 'dinile indi. 14'Diri eceta pale na Yesuni i ecezᴜ 'ba erini imbale 'diyi dri, erini engazᴜ 'ba draza ma eselia 'bori ma vᴜtiari'i. 15Yi ka di nya 'bo, Yesu nga 'yo Simoni Petero ma tia, Simoni, Yohana mvi la, mi le ma avasi aga 'diyi ra ya? Eri 'yo eri tia, E, Opi ; mi ni ra ma le mi ra. Eri 'yo eri tia, Mi fe nyaka kabiloanzi mani dri. 16Eri 'yo eri tia dika pale iririsi, Simoni, Yohana mvi la, mi le ma avasi ra ya? Eri 'yo eri tia, E, Opi ; mi ni ra ma le mi ra. Eri 'yo eri tia, Mi oce kabilo mani. 17Eri 'yo eri tia pale narisi, Simoni, Yohana mvi la, mi le ma ra ya? Petero eri ovᴜ ani candisi erini 'yole eri tia pale na, Mi le ma ra ya?-risi. Eri 'yo eri tia, Opi, mi ni e'yo dria; mi ni ra ma le mi ra. Yesu 'yo eri tia, Mi fe nyaka kabilo mani dri. 18Ma 'yo mi tia ndi ndi, mini ovᴜria karilaᴜrᴜria mi adri ndra mi opile a'di mi ngᴜlᴜpi ma drisi, mi adri aci pari mini leleria; te mi ka nga ca mbazaᴜrᴜ mi nga mi dryi ejᴜ, te 'ba azini nga mi opile a'dini, nga mi ji pari mini lele kᴜria. 19(Eri 'yo e'yo 'diri, dra erini ngazᴜ drazᴜ diza fezᴜ Mungu driri ecezᴜ.) Eri ka e'yo 'diri 'yo 'bo, eri 'yo eri tia. Mi bi ma vᴜti. 20Petero nga i oja, nga 'ba Yesuni imbale erini leleri ndre erini yi vᴜti biria, eri 'ba i atipi Yesu agatia yini nyaka ondre beri nyaria, 'yopi, Opi, 'ba mi o'di nyapiri eri a'di'i ya?-ri'i. 21Peteroni 'ba 'diri ndreria eri nga di 'yo Yesu tia, Opi, 'ba 'diri driri te ngoni ya? 22Yesu nga 'yo eri tia, Ma ka le eri ma ovᴜ 'dani kpere mani emviria, e'yoni mini ya? Mi bi mini ma vᴜti'i! 23E'yo 'diri nga ku adripi nde 'diyi ma eselia ani, kini 'ba erini imbale 'diri ngani dra kᴜ; te Yesu 'yoni eri tia kini eri ngani dra kᴜ, 'dini kᴜ, te kini, Ma ka le eri ma ovᴜ 'dani kpere mani emviria, e'yoni mini ya? 24'Diri 'ba erini imbale e'yo 'diyi ma eti nzepi, e'yo 'diyi sipiri'i; te ama ni ra e'yo eti erini nzeleri eri adarᴜ. 25Afa azini karakaraᴜ Yesuni 'yele 'diyi yi indi, te yi ka te yi ma e'yo si alᴜ alᴜ dria, ma ega wudrikuru ma ngᴜlᴜpi ngani te dri fu buku nde yini ngale sile 'diyisi kᴜ.

will be added

X\