YOHANA 19

1Pilato nga di Yesuni 'du ji, co ninisi. 2Asikari nga oci ekila okurᴜ, sᴜ eri dria, nga vini eri esu bongo ondralakondralarisi; 3yi nga emu eri vᴜ, kini, Mi zi mi ci ci, Opi Yahudini loᴜ! Yi nga eri sa drisi. 4Pilato fᴜ amve dika, 'yo yi tia kini, Mi ndre, ma eri ofᴜ emi vᴜ 'di, emi ma ni ani ma isuni ezata eri ma alia alᴜni kᴜ. 5Yesu nga di fᴜ amve ani, oci okurᴜri be dria azini bongo ondralakondralarᴜri be ruaa. Pilato 'yo yi tia, Mi ndre, agᴜ nderi! 6Kuhani amborᴜ 'diyi pi yi vile asikari 'diyi be ka eri ndre ra, yi nga oyᴜ uru kini, Ma di eri pati ruaa, ma di eri pati ruaa! Pilato nga 'yo yi tia, Emi ngᴜlᴜpi ma ji eri dizᴜ pati ruaa emi'i, te marᴜni ma isuni ezata eri ma alia alᴜni kᴜ. 7'Ba Yahudini nga e'yo omvi eri tia, Azita amani indi, azita 'diri le eri ma dra ra, erini i ngᴜlᴜpi 'bale Mungu ma Mvarᴜrisi. 8Pilato ka e'yo 'diri eri ra, uri bi di eri aga ra; 9eri fi dika riidri e'yo lizᴜria, eri 'yo Yesu tia, Mi ibi enga ngoa ya? Te Yesu omvini e'yo eri tia kᴜ. 10Pilato nga 'yo eri tia ani, Mi 'yoni ma tia kᴜ ya? Mi nini ma okpo be mi trᴜzᴜ, azini ma okpo be mi dizᴜ pati ruaari kᴜ ya? 11Yesu omvi e'yo eri tia kini, Okpo mini afa azini 'yezᴜ ma ruaani yo, ka ovᴜ fezarᴜ mi dri engazᴜ 'bua kᴜ; 'dini 'ba ma ejipi fepi mi driri ma ezata aga ra. 12Engazᴜ 'disi Pilato nda geri eri trᴜzᴜ ra, te 'ba Yahudini yi oyᴜ uru kini, Mi ka 'ba 'diri trᴜ ra, de di mi agyi Kaisarini yo; 'ba dria alᴜ alᴜ i 'bapi opirᴜri mbᴜ Kaisari ruaasi amve. 13Pilato ka di e'yo 'diyi eri ra, eri nga Yesuni ji amve, nga ri va ogᴜŋa e'yo lizᴜri ma dria, pari 'bani omvele Oni Otiza'iria, te Ebrania tisi eri Gabata'i. 14Isu o'du 'dari eri Edeza agaza 'ba drilesiriari'i ; etu eca ekile aziale. Eri nga 'yo 'ba Yahudini ma tia, Mi ndre, Opi eminiri! 15Yi nga otre urᴜ ani, Ma ji eri 'dale, ma ji eri 'dale, ma di eri pati ruaa! Pilato nga 'yo yi tia, Ma Opi eminiri di pati ruaa ya? Kuhani amborᴜ yi nga e'yo omvi, Opi amani yo pe lᴜ Kaisari'i. 16Eri nga di eri fe yi dri ani dizᴜ pati ruaa. 17Yi ji Yesu ani, erini pati alaza i ngᴜlᴜpini jiria, eri fᴜ mu pari 'bani omvele 'Ba dri fala i'ria, yini omvele Ebrania tisi Gologota'iri. 18Yi di eri pati rᴜaa 'daa, yi di 'ba azini iri eri be tualᴜ, alᴜ kala alᴜria, alᴜ kala aziniria, Yesuni yi eselia agadua. 19Pilato si e'yo eri ma e'yo e'dazᴜri, 'ba eri pati alaza ma dria; e'yo siza ovᴜ 'dini, YESU 'BA NAZA-RETIA, OPI YAHUDINIRI'I. 20'Ba Yahudini kakaᴜ nga e'yo e'daza 'diri la, a'disikᴜ pari yini Yesuni dizᴜ pati ruaari ovᴜ ogogo aku amborᴜ ma ageia; yi si e'yo siza nde Ebrania tisi, Rumi tisi, Giriki tisi. 21Kuhani amborᴜ 'ba Yahudini ma drilia 'diyi nga 'yo Pilato ma tia ani, Mi si, Opi Yahudiniri'i 'dini kᴜ, te mi si, Eri 'yo ra kini, Ma Opi Yahudiniri. 22Pilato nga e'yo omvi, E'yo mani sile 'bori ma si te de 'bo. 23Asikari ka Yesuni di pati ruaa 'bo, yi nga bongo erini o'du awa tindi su asikari alᴜ alᴜ vᴜsi; yi nga koti erini 'du 'dini indi. Isu baka mile bongo ecizᴜri koti ruaa yo, yi ca ndra eri engazᴜ uru kpere ele bongo alᴜrᴜ; 24yi nga 'yo yi eselia ani, Ama osi eri kᴜ, te ama nya eri odrisi 'bezasi, ama nga 'ba 'dupiri a'di'i yari ni ani. 'Dini e'yo siza ma 'ye i, kini, Yi awa bongo mani yi eselia, yi 'be odrisi koti mani nyazᴜ. Asikari 'ye ani 'dini. 25Te andri erini pi oso pa pati alaza Yesuni ma ageia, andri ma amvi pie, Mariamu okᴜ Kileopa vileri pie, Mariamu Magadaleni pie. 26Yesu ka i andrini ndre, 'ba erini imbale erini leleri be erini pa soria ogogo, eri 'yo i andri tia, Okᴜ la, mi ndre, mi mvini 'di! 27Eri nga di 'yo 'ba erini imbaleri ma tia, Mi ndre, mi andrini 'di! Engazᴜ etu 'dasi 'ba erini imbale nderi 'du eri ji i vile joa. 28E'yo 'diri ma vᴜtia, Yesuni niria kini e'yo dria 'ye yi de 'bo, e'yo siza ma 'ye i ani, nga ‘yora, Yi avijo fᴜ ma ra. 29Isu yi 'ba te patiefi su drazarᴜ imvᴜ ma alia tre 'daa; yi nga afa ezekezerᴜ sᴜ patiefi su takari ma alia, nga eri sᴜ pati sia, 'ba tilenia ani. 30Yesu ka patiefi su drazari a'i 'bo, eri ‘yora, De i 'bo; eri nga i dri elᴜ, kᴜ orindi ini fᴜzᴜ ra. 31O'du 'darini ovᴜle Edezanirisi, 'ba Yahudini nga zi Pilato tia ma onyo yi ma pa, ma otrᴜ yi jizᴜ, yi ma avᴜ kazᴜ ovᴜzᴜ pati alaza ma dria o'du sabatonisi kᴜ (te o'du sabatoni 'dari eri o'du amboni). 32Asikari nga emu ani, nga 'ba okori pi ma pa onyo 'ba azini yini dile eri beri be; 33te yi ka eca Yesu vᴜ, ka ndre ra eri dra kai 'bo, yi onyoni pa erini kᴜ. 34Te asikari alᴜ nga ejeni so ajusi, coti ari pi 'ba ra yi be ra ra. 35'Ba ndrepi rari nze e'yo nderi ma eti 'bo—e'yo eti erini nzeleri eri adarᴜ, eri ni ra eri e'yo adarᴜri 'yo—emi ma a'i ani beni. 36Te e'yo 'diyi 'ye yi e'yo siza ma ovᴜ 'yezarᴜ ani, kini, Yi ngani fala erini nyo alᴜni kᴜ. 37Te dika e'yo siza azini kini, Yi nga 'ba yini soleri ndre. 38E'yo 'diyi ma vᴜtia, Yusufu 'ba Arimateaari, eri 'ba Yesuni imbaleri, te di ndindirᴜ erini 'ba Yahudini rᴜlerisi, eri a'i Pilato tia i ma 'du avᴜ Yesuni ji; Pilato nga a'i ra. Eri emu ani, avᴜni 'du ji ra. 39Nikodemu nga emu alᴜ indi, eri 'ba ndra emupi oko eri vᴜ inisiri'i, eri nga ajinguru arikarirᴜ osale nzo beri eji, ekile ratili tᴜrᴜ alᴜle 'dipi. 40Yi 'du di avᴜ Yesuni, nga eri oti bongo emverᴜsi afa arikarirᴜri be, ekile 'ba Yahudinini adrile 'ba avᴜ salerile. 41De amvu indi pari yini eri dizᴜria, azini gᴜle o'dirᴜ 'ba sazᴜ nga alenia kᴜri indi amvu nde ma alia. 42Erini ovᴜle 'ba Yahudini ma o'du Edezanirisi, azini gᴜle nderini ovᴜle ogogorisi, yi nga di Yesuni 'ba 'daa.

will be added

X\