YOHANA 17

1Yesu ka e'yo 'diyi 'yo 'bo, erini i mile engaria 'bua eri ‘yora, Ata, etu eca 'bo; mi fe diza mi Mvi dri, Mvi ma fe diza mi dri ani beni, 2mini okpo fele eri dri ovᴜzᴜ 'ba rua ari be 'diyi ma drilia driarisi, eri ma fe idri 'dani 'dani 'ba dria mini fele eri dri 'diyi dri. 3Idri 'dani 'daniri eri 'di'i, yi ma ni mi Mungᴜ alᴜ a'dule adarᴜri'i, azini 'ba mini tini epeleri Yesu Kristo'i. 4Ma fe diza mi dri nyakua ra, mani azi mini fele ma dri 'yezarᴜri dele 'borisi; 5te curu'do, Ata, mi fe diza ma dri mi ngᴜlᴜpi be tualᴜ, diza nde mani mani ndra ovᴜria mi be tualᴜ de nga nyaku 'bani i kᴜ 'darisi. 6Ma ece mi ru 'ba mini fele ma dri engazᴜ nyakua 'diyi dri ra; yi ovᴜ mini, mi fe yi ma dri ra, yi mba e'yo mini ma ta 'bo. 7Curu'do yi ni ra afa dria mini fele ma dri 'bo 'diyi ibi enga mi vᴜ; 8a'disikᴜ ma fe yi dri e'yo 'yoza mini fele ma dri 'diyi 'bo, yi a'i e'yo nde 'diyi ra, yi ni ra ada ma ibi enga mi vᴜ; yi a'i vini mi epe ma ti mi'iri ra. 9Ma zi yi ma e'yosi; ma zini nyaku ma e'yosi kᴜ, te 'ba mini fele ma dri 'diyi ma e'yosi, a'disikᴜ yi 'ba mini; 10afa dria mani 'diyi yi mini, mini 'diyi yi mani, ma isu diza yi ma alia 'bo. 11Ma ovᴜmi nyakua dika kᴜ, te yi ovᴜ nyakua, azini ma mu mi vᴜ. Ata Alatararᴜ, mi mba, yi ma ta mi rᴜ mini fele ma dririsi, yi ma ovᴜ ani alᴜ, ekile amani ovᴜle alᴜrile. 12De ma ovᴜ yi be ci, ma adri yi ma ta mba mi ru mini fele ma dririsi; ma te yi ma agei ra, 'ba alᴜni jani dri yi ma eselia kᴜ, pe lᴜ kiri mva dri jazaniri a'dule'i, 'dini e'yo siza ma 'ye i beni. 13Te curu'do ma mu mi vᴜ 'di; ma 'yo e'yo 'diyi nyakua, 'dini ayiko mani ma ga ani yi asia tre beni. 14Ma fe yi dri e'yo mini 'bo; nyaku ngᴜ ani yi onzi, yini ovᴜle 'ba nyakuni kᴜrisi, ekile mani ovᴜle 'ba nyakuni kᴜrile. 15Ma zini mi ma nze yi nyakuasi ra 'dini kᴜ, te bani mi ma mba yi ma ta agu onzirisi. 16Yi ovᴜni 'ba nyakuni kᴜ, ekile mani ovᴜle 'ba nyakuni kᴜrile. 17Mi 'ba yi ma ovᴜ alatararᴜ e'yo adarᴜri ma alia; e'yo miniri e'yo adarᴜri'i. 18Ekile mini ma ti epele nyakua-rile, ma ope yi ma ti nyakua 'dini indi. 19Ma 'ba ma ngᴜlᴜpi ala-tararᴜ yi ma e'yosi, yi ma ovᴜ ani alatararᴜ e'yo adarᴜri ma alia indi. 20Ma zini 'ba 'diyi ma e'yosi a'dule kᴜ, te 'ba ngapi ma a'ipi yi ma e'yosi 'diyisi indi, 21yi dria ma ovᴜ ani alᴜ; ekile mi'i Ata, mini ovᴜle ma alia, azini mani ovᴜle mi aliarile, yi indi ma ovᴜ ama ma alia, nyaku ma ni ani mi epe ma ti mi'i. 22Ma fe yi dri diza mini fele ma driri 'bo, yi ma ovᴜ alᴜ ekile amani ovᴜle alᴜrile; 23ma yi alia, mi ma alia, yi ma ca ovᴜzᴜ ani alᴜrᴜ, 'dini nyaku ma ni mi epe ma ti mi'i, azini mi le yi trotro ekile mini ma lele avasirile. 24Ata, ma le 'ba mini fele ma dri 'diyi ma ovᴜ ma be pari mani ovᴜzᴜria, yi ma ndre ani diza mani mini ndra fele ma dri mini ma lele de nga nyaku eti 'bani i kᴜrisiri'i. 25Ata kili-lirᴜri la, nyaku nini mi kᴜ, te ma ni mi ra; azini 'ba 'diyi ni mi epe ma ti mi'iri ra. 26Ma fe yi ma ni ru mini ra, ma nga di fe ru mini ma ovᴜ nizarᴜ, leta mini ma lezᴜri ma ovᴜ ani yi ma alia, ma ma ovᴜ vini yi ma alia indi.

will be added

X\