YOHANA 15

1Ma pati raza zabiburᴜ adarᴜri'i, ma Atini 'ba eri edepiri'i. 2Eri adri pati arakala dria alᴜ alᴜ ovᴜpi ma alia efi 'yapi kᴜri opi va; te eri adri pati arakala dria alᴜ alᴜ efi 'yapi rari ma rua ede alarᴜ, eri ma 'ya ani efi azini aga ra beni. 3Curu’do emi eca di alarᴜ e'yo mani 'yole emi tia 'borisi. 4Emi ma ovᴜ ma alia 'dani, ma'i ma ovᴜ emi alia indi. Ekile pati arakalani ecole efi 'yazarᴜ eri drisi kᴜ, eri ka ovᴜ pati raza zabiburᴜri ma alia kᴜrile, awa'dini emi econi vini kᴜ indi, emi ka ovᴜ ma alia kᴜ. 5Ma zabibu patini, emi arakalani. 'Ba ovᴜpi ma alia 'dani, mani ovᴜzᴜ eri ma alia indiri, 'ba 'diri eri efi 'ya tᴜ, a'disikᴜ emi ka esele co ma be econi emini e'yo 'yezarᴜ alᴜni kᴜ. 6Te 'ba ka ovᴜ ma alia 'dani kᴜ, yi 'be eri ekile pati arakale, eri nga 'wi ra; yi arakala nde 'diyi okᴜ o'bezᴜ acia, yi nga ve ra. 7Emi ka ovᴜ ma alia 'dani, azini e'yo mani 'yole 'diyi ka ovᴜ emi alia 'dani, emi zi e'yo ngoni ngo emini leleri, eri nga i 'ye emi dri. 8Ma Ati isu diza e'yo 'disi, emini efi 'yale kakaᴜrisi; te 'dini emi nga ovᴜ 'ba mani imbale 'diyirᴜ. 9Ekile Atani ma lelerile, ma le vini emi 'dini indi; emi ma ovᴜ 'dani ale mani ma alia. 10Emi ka azita mani 'diyi ma ta mba ra, emi nga ovᴜ 'dani leta mani ma alia; ekile mani azita ma Atini 'diyi ma ta mbale 'bo, mani ovᴜzᴜ 'dani leta erini ma aliarile. 11Ma 'yo e'yo 'diyi emi tia 'bo, 'dini ayiko mani ma ovᴜ emi alia ani, ayiko emini ma ga tre indi. 12Azita mani eri 'di, emi ma le emi emi eselia, ekile mani emi lelerile. 13'Ba alᴜni ovᴜpi leta be 'diri agazᴜni yo, leta nde 'bani ani idri ini kᴜzᴜ va i ma agyisiri'i. 14Emi ka e'yo mani azile emi tia 'diyi 'ye ra, de emi ma agyi. 15Ma omveni emi ati'barᴜ dika kᴜ, ati'boni e'yo opi i vilerini 'yeleri nile kᴜrisi; ma omve te emi agyirᴜ 'bo, a'disikᴜ e'yo dria mani erile ma Ati vᴜ 'diyi, ma ece yi emi dri nizᴜ ra. 16Emi peni ma emi'i kᴜ, te ma ope emi ma'i, ma 'ba emi emi ma mu ani efi 'yazᴜ, efi emini ma ovᴜ 'dani beni; 'dini e'yo ngoni ngo emini zile Ata vᴜ ma rᴜsiri, eri ma fe ani emi dri. 17Ma azi e'yo emi tia 'di, emi le emi le le. 18Nyaku ka emi ngu onzi, emi ni eri 'ba ndra ma ngu emini oko. 19Emi ka te ovᴜ 'ba nyakuni, nyakuni te nga i ma afa le ra; te di emini ovᴜle 'ba nyakuni kᴜrisi, azini mani emi opele nyaku eseliarisi, e'yo 'disi nyaku ngu di emi onzi ani 'di. 20Emi ega e'yo mani 'yole emi tiari kini, Ati'bo agani opi ini kᴜ. Yi ka ndra ma inza ra, yi nga emi inza alᴜ indi; yi ka ndra e'yo mani ma ta mba ra, yi nga e'yo eminiri ma ta mba indi. 21Te yi nga e'yo 'diyi 'ye dria emi vᴜ ma rusi, yini 'ba ma ti epepiri nile kᴜrisi. 22Te ma ka ndra emu e'yo 'yozᴜ yi tia kᴜ, te'do yi ovᴜni e'yo onzi be kᴜ; te curu'do yi ovᴜni e'yo be e'yo onzi yini onazᴜ kᴜ. 23'Ba ma ngupi onziri eri ma Atini ngᴜ onzi indi. 24Ma ka ndra 'yeta 'ba azinini 'yele kᴜ 'diyi 'ye yi eselia kᴜ, te'do yi ovᴜni e'yo onzi be kᴜ; te curu’do yi ndre azini ngᴜ ama ma Ati be. 25'Dini, e'yo ovᴜpi sizarᴜ azita yini ma alia kini, Yi ngu ma onzi toko-ri ma 'ye i ani. 26Te 'Ba 'ba Aza Kopiri mani ngale ti epele emi vᴜ engapi Ata vᴜri ka nga emu ra, eri Orindi e'yo adarᴜni, engapi Ata vᴜri'i, eri nga e'yo mani ma eti nzeni; 27emi indi, emi nga vini e'yo eti nze indi, emini ovule ma be engazᴜ driorisi.

will be added

X\