YOHANA 13

1De omu agaza 'ba drilesirini ecani nga kᴜ, Yesuni niria etu ini nyaku 'diri kᴜzᴜ muzᴜ i Ati vᴜri eca 'bo, erini 'ba ini ovᴜpi nyakua 'diyi leria, eri le yi avasi 'dani kpere asizaniria. 2Yini nyaka ondre beri nyaria, isu 'ba asᴜ sᴜpiri 'ba e'yo Yudasi Isikariote Simoni mvi ma asia 'bo, eri ma nya o'di erini eri fezᴜ, 3Yesuni niria i Ati fe afa dria i ma dria 'bo, azini kini i ibi enga Mungu vᴜ, i mu Mungu vᴜ indi, 4eri enga nyaka ondre beri ma tia, eri trᴜ bongo ini ma azi, nga bongo rua lizᴜri 'du, nga a'di i opilia. 5Eri nga yi osᴜ awala alia, nga 'ba ani 'ba erini imbale 'diyi ma pa oji, yi inizᴜ bongo rua lizᴜ erini a'dile i opiliarisi. 6'Dini eri nga eca Simoni Petero vᴜ; eri 'yo tinia, Opi, mi ma pa oji ya? 7Yesu nga e'yo omvi, 'yo eri tia, E'yo mani 'yeleri mi nini curu'do kᴜ, te mi nga va ndo. 8Petero nga 'yo eri tia, Mi ngani ma pa oji alᴜni kᴜ kpere 'dani 'dani. Yesu nga e'yo omvi eri tia, Te ma ka mi oji kᴜ, e'yo mini ovᴜni ma be kᴜ. 9Simoni Petero nga 'yo eri tia, Opi, mi ma oji kiri ma pa a'dule kᴜ, te ma dri 'diyi pi dri be indi fo! 10Yesu nga 'yo eri tia, 'Ba i rua ojipi 'bori leni ojita kᴜ, te kiri pa ojizᴜ'i a'dule, te eri rua dria ovᴜ alarᴜ; emi ovᴜ alarᴜ ra 'bo, te emi dria kᴜ. 11Te eri ni 'ba ngapi eri ma o'di nyapi eri fezᴜri ra; eri nga 'yo ani, Emi dria ovᴜni alarᴜ kᴜ. 12Eri ka yi pa oji 'bo, eri nga di bongo ini e'du, nga ri va dika, nga 'yo yi tia, Emi ni e'yo mani 'yele emi vᴜri ra ya? 13Emi omve ma 'Ba 'ba Imbapiri'i azini Opi'i indi; emi 'yo 'yeke, te ma ovᴜ 'dini. 14Te ma'i Opini azini 'Ba 'ba Imbapiri'i, ma ka emi pa oji ra, onyirᴜ emi ma oji emi agyi ma pa emi eselia indi. 15Te ma fe emi dri eceta 'bo, 'dini emi ma 'ye ani ekile mani 'yele emi dririle indi. 16Ma 'yo emi tia ndi ndi, ati'bo ovᴜni ambo aga opi iniri kᴜ; 'ba ti peleri agani 'ba eri ma ti pepiri kᴜ. 17Te emi ka e'yo 'diyi ni ra, emi ka di yi 'ye ra emi ovᴜ ani drilebarᴜ. 18Ma 'yoni emi dria ma e'yosi kᴜ; ma ni 'ba mani opele 'bo 'diyi ra; te e'yo siza ma 'ye i ani, kini, 'Ba nyaka mani nyapiri 'du i ma paedᴜ uru ma atᴜzᴜ. 19Ma 'yo emi tia curu'do de nga 'yeni i kᴜ, 'dini e'yoni ka nga i 'ye ra, emi ma a'i di ani ma eri'i beni. 20Ma 'yo emi tia ndi ndi, 'ba 'ba mani ti peleri a'ipiri eri a'i ma'i; azini 'ba ma a'ipiri eri a'i 'ba ma ti epepiri'i. 21Yesu ka 'yo 'dini 'bo, orindi erini nga oti oti, eri nze e'yo eti kini, Ma 'yo emi tia ndi ndi, 'ba alᴜ emi eseliari nga ma o'di nya ma fezᴜ. 22'Ba erini imbale 'diyi 'ba yi ondre milia milia, yini 'ba erini e'yo 'yozᴜ erisiri nile kᴜrisi. 23Isu 'ba erini imbale 'diyi ma azi alᴜ Yesuni lele tᴜri ri mesa tia i atizᴜ Yesu ma agatia; 24Simoni Petero nga e'yo ece eri dri drisi, nga 'yo eri tia, Mi olᴜ ama tia eri a'di ma e'yo 'yo ya? 25'Ba nde, erini i atiria Yesu ma agatia 'dini, nga 'yo eri tia, Opi, eri a'di'i ya? 26Yesu nga e'yo omvi ani kini, Eri 'ba mani enya tizᴜ dᴜzᴜ a'isua fezᴜ eri driri’i. Eri ka enya ti sᴜzᴜ a'isua 'bo, eri nga di eri fe Yudasi, Simoni Isikariote ma mvi dri. 27Enya tiza nderi ma vᴜtia, Satani nga fi eri ma alia. Yesu nga di 'yo eri tia ani, E'yo mini 'yeleri, mi 'ye mbele. 28Te 'ba ripi mesa tia 'diyi ma alᴜni nini eri 'yo eri tia 'dini a'drsi yari kᴜ. 29'Ba azini ega kini Yudasini ovᴜle okporo berisi, Yesu 'yo ani eri tia kini, Mi je afa amani leleri omuniri; kani ma fe afa azini 'ba aliorᴜ dri. 30Eri ka enya tiza a'i 'bo, eri fᴜ perepere amve; de angᴜ bi di 'bo. 31Eri ka fᴜ 'bo, Yesu nga ‘yora, Curu'do Mvi 'bani isu diza 'bo, azini Mungu ovᴜ vini dizarᴜ eri alia indi; 32Munguni nga eri 'ba ovᴜzᴜ dizarᴜ i ma ngᴜlᴜpi alia, nga eri 'ba ovᴜzᴜ dizarᴜ coti. 33Anzi nyiri nyiri, o'du amani ovᴜzᴜ emi be indiri ace werea. Emi nga ma ndru; te ekile mani 'yole ndra 'ba Yahudini ma tiarile, 'dini ma 'yo vini emi tia curu'do, Pari mani muzᴜria emi econi emuzarᴜ kᴜ. 34Ma fe emi dri azita o'dini, emi ma le emi emi eselia; mani emi lelerile, emi ma le emi emi eselia 'dinile. 35'Ba dria nga ni ani emi 'ba mani imbale 'diyirᴜ, emini ovᴜle leta be emi eselia 'dinirisi. 36Simoni Petero nga 'yo eri tia, Opi, mi mu ngoa ya? Yesu nga e'yo omvi eri tia, Mi econi ma vᴜti bizarᴜ pari mani muzᴜria curu'do nga kᴜ; te mi nga ma vᴜti bi vilerisi ndo. 37Petero nga 'yo eri tia, Opi, econi mani mi vᴜti bizarᴜ curu'do kᴜ a'disi ya? Ma nga idri mani kᴜ va mi e'yosi. 38Yesu omvi e’yo ra, Mi nga idri mini kᴜ va ma e'yosi ya? Ma 'yo mi tia ndi ndi, de nga a'uata 'beni cere kᴜ, mi nga ma ga si pale na.

will be added

X\