YOHANA 12

1O'du azia de nga omu agaza 'ba drilesirini ecazᴜ kᴜria, Yesu nga emu Betania, pari Lazaro Yesuni engale 'ba draza ma eseliarini ovᴜzᴜria. 2Yi a'di eri dri nyaka ondre beri omurᴜ 'daa; Marita nga omu nde ma azini, te Lazaro ovᴜ 'ba ripi eri be nyaka tia 'diyi ma azi. 3Mariamu nga lu'bu odᴜ arikarirᴜ alarᴜ 'bani jele aje ambosiri beri 'du, nga Yesu ma pa efi ani, eri nga pani ini dribi i ma driarisi; odᴜ nde ma aji nga ga jo ma alia tre. 4Te Yudasi Isikariote, 'ba erini imbale 'diyi ma azi alᴜ ('yepi eri ma o'di nyapiri) nga ‘yora, 5Ozini odᴜ 'diri silingi tᴜrᴜ nasi fezᴜ 'ba aliorᴜ 'diyi dri kᴜ a'disi ya? 6Eri 'yoni e'yo 'diri erini 'ba aliorᴜ 'diyi lelerisi kᴜ, te erini ovᴜle oguoᴜnirisi, a'disikᴜ erini ovᴜria jᴜrᴜa be, eri adri afa 'bale alenia 'diyi o'du ra. 7Yesu nga 'yo ani, Mi kᴜ eri, eri ma mba eri ma ta kpere o'du ma sazᴜri tezᴜ. 8Te 'ba aliorᴜ ovᴜ emi be etuzu 'dani, te ma ovᴜni emi be etuzu 'dani kᴜ. 9'Ba ongᴜlᴜmᴜrᴜ kakaᴜ 'ba Yahudini ma eselia 'diyi ka eri kini eri 'daa, yi emu ra, te Yesu ma e'yosi a'dule kᴜ, te yi ma ndre Lazaro erini engale 'ba draza ma eseliari alᴜ indi. 10Te 'ba kuhani amborᴜ 'diyi yi 'ba e'yo otᴜ Lazaroni fuzᴜ indi, 11a'disikᴜ erisi 'ba Yahudini kakaᴜ yi fᴜ mu Yesuni a'izᴜ. 12Drusi 'ba ongᴜlᴜmᴜrᴜ kakaᴜ emupi omua 'diyi ka eri kini Yesuni emu Yerᴜsalemua, 13yi 'du ndende ma arakala, fᴜ mu dri fuzᴜ eri be, yi nga otre uru kini, Hosana! 'Ba emupi Opi ma rusiri ma ovᴜ inzizarᴜ, eri Opi Israeliniri'i! 14Te Yesu ka akanyamva isu ra. eri nga tu ri drinia ; ekile erini ovᴜle sizarᴜrile, 15Mi rᴜ kᴜ, Zioni zi la; mi ndre, Opi mini emu emu erini riria akanyamva ma dria! 16'Ba erini imbale 'diyi vani e'yo 'diri okorisi kᴜ; te Yesu ka diza ini isu 'bo, yi nga e'yo ega yi asia ndo kini e'yo 'diyi ovᴜ sizarᴜ eri ma e'yosi, azini kini yi 'ye e'yo 'diyi eri vᴜ. 17'Ba ongᴜlᴜmᴜrᴜ ovᴜpi eri be erini Lazaroni omveria gᴜle aliarisi, azini erini eri engaria 'ba draza ma eseliarisi 'diyi nze e'yo eti erisi. 18E'yo 'disi 'ba ongᴜlᴜmᴜrᴜ yi fᴜ mu dri fu eri be, yini erile kini eri 'ye eceta 'diri 'borisi. 19'Ba Farisaini nga 'yo yi eselia ani, Emi lu, emi 'yeni afa aza kozarᴜni kᴜ; mi ndre, wudrikuru dria fᴜ mu eri vᴜtisi. 20Isu 'ba Girikini ma azi 'diyi indi 'ba tupi mupi 'diyi ma eselia, muzᴜ Mungu inzizᴜ omu nde ma alia. 21'Ba 'diyi emu Filipo engapi Betesaida Galiliari ma aliari vᴜ, yi zi eri tia kini, Opi, ama le Yesuni ndre. 22Filipo emu e'yoni olᴜ Andarea tia; Andarea pi emu Filipo be e'yoni olᴜzᴜ Yesu tia. 23Yesu nga e'yo omvi yi tia kini, Etu eca 'bo, 'dini Mvi 'bani ma isu diza ani. 24Ma 'yo emi tia ndi ndi, anyaefi ka 'de nyakua, ka dra kᴜ, eri nga ovᴜ a'dule; te eri ka dra ra, eri nga efi ka kakaᴜ. 25'Ba i ma idri lepiri, eri nga avi eri dri ra, te 'ba i ma idri ngupi nyaku 'doriari nga eri ma ta mba ecazᴜ idri 'dani 'daniri vᴜ. 26'Ba azini ka azi 'ye ma dri, eri ma bi ma vᴜti; azini pari mani ovᴜzᴜria, 'daa 'ba ma azi 'yepiri nga ovᴜ alᴜ indi; te 'ba azini ka azi 'ye ma dri, ma Atini nga eri inzi ra. 27Curu'do ma asini oti oti; ma di ngori 'yo ya? Ata, mi pa ma etu 'dirisi. Te e'yo 'disi ma eca bani etu 'diri vᴜ. 28Ata, mi fe mi ru ma ovᴜ dizarᴜ. O'duko nga di enga 'bua ani, kini, Ma 'ba eri dizarᴜ 'bo, ma nga eri 'ba dizarᴜ dika. 29'Ba ongᴜlᴜmᴜrᴜ pa osopi ogogo, o'duko nde eripi 'diyi, nga di 'yo kini ovi fini. 'Ba azini kini, Malaika 'yo e'yo eri beni. 30Yesu omvi e'yo ‘yora, O'duko 'diri emuni ma e'yosi kᴜ, te emi ma e'yosi. 31Curu'do e'yo liza nyaku 'diriniri indi, curu'do yi nga ambo nyaku 'dori ma dri cepiri 'be amve. 32Te ma'i, yi ka ma 'du uru nyaku ma drilesi, ma nga 'ba dria ose ma ngᴜlᴜpi vᴜ. 33Te eri 'yo e'yo 'diri, dra erini 'yezᴜ drazᴜri ma e'yo ecezᴜ. 34'Ba ongᴜlᴜmᴜrᴜ omvi e'yo eri tia ani, Ama eri e'yo azita ma alia kini Kristoni ovᴜ 'dani 'dani. Mi 'yo te ngoni ngoni kini yi ma nga Mvi 'bani 'du uru ya? Mvi 'bani 'diri eri a'di'i ya? 35Yesu nga 'yo yi tia ani, Ewu dizani ovᴜzᴜ nga emi eselia indiri ace were. Emi aci de dizari nga emi vᴜ indi, ini kazᴜ emi isuzᴜ kᴜ; 'ba acipi ini aliari nini pari ini muzᴜri kᴜ. 36De dizari nga emi vᴜ indi, emi a'i diza nderi, 'dini emi ma oja emi anzi dizanirᴜ beni. Yesu ka e'yo 'diyi 'yo 'bo, eri nga fᴜ yi vᴜrisi, mu i zizᴜ ra. 37Te eri ka tro tali 'ye yi milia kakaᴜ 'dopi ti, yi a'ini eri kᴜ; 38'dini e'yo nabi Isayani 'yoleri ma 'ye i i paria ani, kini: Opi, a'di a'i e'yo amani olᴜlerini ya? Dri Opini e'da i a'di dri ya? 39Te e'yo 'disi econi yini a'izarᴜ kᴜ, a'disikᴜ Isaya 'yo dika kini, 40Eri obi yi ma mile ci, eri 'ba yi ma asi mbazarᴜ 'bo, yi kazᴜ ndrezᴜ yi ma milesi kᴜ, yi kazᴜ e'yo nizᴜ yi ma asisi kᴜ, yi kazᴜ yi ojazᴜ mani yi atizᴜ ani kᴜ. 41Isaya 'yo ndra e'yo 'diri erini diza erini ndrelerisi, erini vini e'yo 'yole erisirisi. 42Ka adri 'dini ti, 'ba 'wara ma eselia 'ba kakaᴜ a'i eri ra, te yi e'dani eri kᴜ 'ba Farisaini ma urisi, yi kazᴜ yi odrozᴜ pari 'bani yi okᴜzᴜria kᴜ: 43te yi le diza 'bani feleniri aga diza Munguni feleniri ra. 44Te Yesu eri nga tre uru ‘yora, Ba ma a'ipiri, eri a'ini ma kᴜ, te 'ba ma ti epepiri'i. 45Azini 'ba ma ndrepiri eri ndre 'ba ma ti epepiri'i. 46Ma emu nyakua diza nyakunirᴜ, 'dini 'ba dria alᴜ alᴜ ma a'ipiri ma ovᴜ ini alia 'dani kᴜ. 47Te 'ba azini ka e'yo mani 'yoleri eri ra, ka tani mba kᴜ, ma lini e'yo erini kᴜ ; a'disikᴜ ma emuni e'yo nyakuni lizᴜ kᴜ, te nyaku nde pazᴜ. 48'Ba ma gapi si e'yo mani a'ipi kᴜri, 'ba e'yo lipi driniari indi; e'yo mani 'yoleri, e'yo nderi nga eri ma e'yo li o'du ewuni asizᴜrisini. 49A'disikᴜ ma 'yoni e'yo ma drisi kᴜ; te Ata ma ti epepiri azi ma dri e'yo mani ngale 'yoleri pi e'yo mani ngale olᴜleri beni. 50Ma ni ra azita erini eri idri 'dani 'daniri. 'Dini e'yo mani 'yole 'diyi, ma 'yo ekile Atani 'yole ma tia 'borile.

will be added

X\