YOHANA 10

1Ma 'yo emi tia ndi ndi, 'ba fipi lico kabilo vileri ma tilesi kᴜ te tupi geri azinisiri, 'ba nde eri ogᴜoᴜni azini 'ba afa opapiri indi. 2Te 'ba fipi tilenisiri eri 'ba kabilo ocepiri'i. 3'Ba tileni ma agei tepiri nga zi eri drini; kabilo yi nga o'duko erini eri ra, eri omve i ma kabilo 'diyi rᴜsi rusi, eri ce yi dri amve. 4Eri ka kabilo ini ofᴜ dria amve 'bo, eri mu yi drilia, kabilo nga eri ma vᴜti bi, yini eri ma o'duko nile rarisi. 5Yi ngani ani'bo ma vᴜti bi kᴜ, te yi nga apa erisi, yini o'duko ani'bani nile kᴜrisi. 6Yesu 'yo e'yo o'beza 'diri yi tia, te yi vani e'yo erini 'yole yi tia 'diyi ma efi kᴜ 7Yesu nga 'yo ani yi tia dika kini, Ma 'yo emi tia ndi ndi, ma jotile kabiloniri ma'i. 8'Ba dria emupi ma drilia oko 'diyi yi oguoᴜni azini 'ba afa opapi 'diyi; te kabilo erini yi kᴜ. 9Ma jotileni; 'ba azini ka fi ma vᴜrisi, eri nga i pa ra, eri nga fi eri nga fᴜ, eri nga iribi isu ra. 10Oguoᴜ emuni e'yo azinisi kᴜ, emu kiri oguzᴜ, 'ba 'dizᴜ, 'ba dri jazᴜ a'dule ; te ma emu yi ma ovᴜ ani idri be, yi ma ovᴜ eri be tᴜ aga ra. 11Ma 'ba kabilo ocepi bari. 'Ba kabilo ocepi bari idri ini kᴜ kabilo ma e'yosi. 12'Ba azi ngapi oyasi ovᴜpi 'ba kabilo ocepiriyi kᴜ, kabiloni ovᴜzᴜ eri ma ngᴜlᴜpini kᴜri, erini 'balau ndreria emuria eri kᴜ kabiloni, eri apa apa, 'balauni nga yi obi, nga yi ere ra. 13Eri apa erini ovᴜle kiri 'ba azi ngapi oyasiri'irisi, azini kabilo ma e'yoni eri vale kᴜrisi. 14Ma 'ba kabilo ocepi bari; ma ni kabilo mani ra, mani 'diyi ni vini ma ra, 15ekile ma Atini ma nile ra, mani vini ma Atini nilerile; azini ma idri mani kᴜ kabilo ma e'yosi. 16Kabilo azini mani indi ovᴜpi kabilo jo 'dirini kᴜ 'diyi; le ma ma eji yi indi, yi nga o'duko mani eri ra. Ngᴜlᴜmᴜniri nga ovᴜ alᴜ, 'ba ocepiri alᴜ. 17E'yo 'dirisi ma Ati le ma ra, mani idri mani kᴜle va, 'dini ma ma e'du eri dika benirisi. 18'Ba alᴜni pani idri mani ma driasi kᴜ, te ma 'ba eri va ma drisi ceni. Ma okpo indi eri 'bazᴜ va, azini ma okpo indi eri e'duzᴜ dika. Azita 'diri ma a'i ma Ati dri. 19Agata nga efᴜ dika 'ba Yahudini ma eselia e'yo 'diyisi. 20'Ba karakaraᴜ yi eselia ‘yora, Eri orindi onzi be, eri aza aza; emi eri eri a'disi ya? 21'Ba azini yi ‘yora, E'yo 'diyi ovᴜni 'ba orindi onzi berini 'yoleniri'i kᴜ. Orindi onzi eco 'ba mile kokorᴜri ma mile zizarᴜ ra ya? 22O'du 'dasi omu hekalu fezᴜ Mungu driri Yerusalemua indi; 23isu eri ewu angᴜni ambizᴜri, azini Yesu aci hekalua Sulemani ma jobileko etiasi. 24'Ba Yahudini ace eri agei kurᴜ ani, nga 'yo eri tia kini, mi fe nga ama asini aba ewu ngopi ya? Mi ka ovᴜ Kristo'i, mi olᴜ ama tia mgba. 25Yesu nga e'yo omvi yi tia kini, Ma olᴜ emi tia ra, te emi a'ini kᴜ. 'Yeta mani 'yele ma Ati ma rusi 'diyi yi nze e'yo eti masini; 26te emi a'ini kᴜ, emini ovᴜle kabilo mani kᴜrisi. 27Kabilo mani yi o'duko mani eri ra, ma ni yi ra, yi ma vᴜti bi indi; 28azini ma fe yi dri idri 'dani 'daniri; yi ngani dri ja 'dani 'dani kᴜ, azini 'ba alᴜni ngani yi pa ma dria okposi kᴜ. 29Ma Ati yi fepi ma driri aga dria ; 'ba alᴜni ecopi vini yi papi ma Ati ma dria okposini yo. 30Ama ma Ati be alᴜ. 31'Ba Yahudini nga di oni o'du dika eri o'bezᴜ. 32Yesu nga e'yo omvi yi tia kini, Ma ece emi dri 'yeta onyi be kakaᴜ engapi ma Ati vᴜ 'diyi; 'yeta 'diyi ma eselia emini ma o'bezᴜ ani onisiri ngori ya? 33'Ba Yahudini nga e'yo omvi eri tia kini, Ama o'beni mi 'yeta onyi berisi kᴜ, te o'datasi; te miyi, de mi 'bani, mini mi 'bale Mungu'irisi. 34Yesu nga omvi yi tia kini, Eri ovᴜni sizarᴜ azita emini ma alia kini, Ma ‘yora, emi mungᴜni, 'dini kᴜ ya? 35Te eri ka 'ba e'yo Mungᴜnini ecazᴜ yi vᴜ 'diyi omve mungurᴜ (te e'yo siza econi ovᴜzarᴜ toko kᴜ), 36emi di 'yo 'ba Atani 'bale alatararᴜ, tini epele nyakuari ma e'yosi kini, Mi a'data o'da, 'dini, mani 'yole, Ma Mungu ma Mvi'i-risi ya? 37Ma ka 'yeta ma Atini 'ye kᴜ, emi ma a'i ma kᴜ; 38te ma ka yi 'ye ra, emi ka ma a'i kᴜ ti, emi ma a'i 'yeta nde 'diyi; emi ma ni, emi ma va indi kini Ata eri ma alia, azini ma ovᴜ Ata alia indi. 39Yi ndru eri bizᴜ dika, te eri fᴜ yi driasi ra. 40Eri fᴜ mu dika Yoridani ma tia 'aa'dasi, pari ndra Yohanani baputizi fezᴜ okoria, eri ovᴜ 'daa. 41'Ba karakaraᴜ emu vᴜnia; yi nga 'yo kini, Yohana 'yeni eceta alᴜni kᴜ, te e'yo dria Yohanani 'yole 'ba 'diri ma e'yosi 'diyi yi adarᴜ. 42'Ba karakaraᴜ a'i eri 'daa.

will be added

X\