YOHANA 1

1Okokele E'yo ovᴜ indi, E'yo nderi ovᴜ Mungu be, E'yo nderi Mungu'i. 2E'yo nderi ovᴜ oko-kele Mungu be; 3eri 'ba ndra afa driani, afa ovᴜpi 'bazarᴜ 'diyi ma alᴜni 'bani i eri kokorᴜ kᴜ. 4Eri alia idri indi, idri nderi ovᴜ diza 'bani. 5Dizani di ini ma alia, te ini nde bini eri kᴜ. 6'Ba alᴜ Munguni ndra tini epeleri indi, runi Yohana'i. 7'Ba nderi emu e'yo eti nzezᴜ, eri ma nze e'yo dizani ma eti ani, 'ba dria yi ma a'i erisi beni. 8'Ba 'diri ovᴜni diza nderi'i kᴜ, te eri emu diza nde ma e'yo eti nzezᴜni. 9Diza adarᴜ dipi 'ba dria ma driari emu nyakua. 10Eri ovᴜ nyakua, 'ba ndra nyakuni ti, te nyaku nini eri kᴜ. 11Eri emu afa ini vᴜ, te 'ba erini 'diyi a'ini eri wa'dirᴜ kᴜ. 12Te 'ba dria eri a'ipi 'diyi, eri fe okpo yi dri yi ojazᴜ anzi Mungunirᴜ, yi'i eri ma ru a'ipi 'diyi; 13'ba nde ovᴜni osizarᴜ arisi kᴜ, kani e'yo rᴜani lelerisi kᴜ, kani e'yo 'bani lelenirisi kᴜ, te Mungᴜsi. 14E'yo nde ofᴜ 'ba rua berirᴜ, eri ovᴜ ama eselia, 'yeta anzutiri be tre, e'yo ada be ; ama lu diza erini vᴜ, diza ekile Atani fele Mvi tile alᴜri dririle. 15Yohana nze e'yo eti erisi, eri oyᴜ urᴜ kini, 'Ba 'diri eri 'ba mani e'yoni 'yoleri'i kini, 'Ba emupi ma vᴜtiari eca ovᴜ ma drilia, a'disikᴜ erini ndra ovᴜle mani okorisi.) 16Te ama dria a'i afa gapi eri ma alia tre tre 'diyi ma azi ra, 'yeta anzutiri 'yeta anzutiri ma dria. 17Azita ovᴜ fezarᴜ Musasi; 'yeta anzutiri pi e'yo adarᴜ be emu Yesu Kristosi. 18Drio 'ba neni nga Mungu alᴜani kᴜ kpere curu’do; Mvi tile alᴜ ovᴜpi Ata ma agatiari ece erini. 19'Di eri e'yo eti Yohanani nzeleri, 'ba Yahudini ka kuhani piyi ma ti epe eri vᴜ 'ba Levini be, engazᴜ Yerusalemua, Mi a'di'i yari zizᴜ eri tia. 20Eri e'da e’yo ra, eri ocini e'yo kᴜ, te e'da kini, Ma'i, ma Kristo'i yo. 21Yi nga di zi eri tia kini, Ka'dini te ngoni? Mi Eliya'i ya? Eri ‘yora, Ma eri'i yo. Mi nabi nderi'i ya? Eri omvi e'yo kini, Yo. 22Yi nga di 'yo tinia, Mi di a'di'i ya? Ama ma omvi e'yo 'ba ama ti pepi 'diyi vᴜ beni. Mi 'yo mi ngᴜlᴜpi ma e'yosi ngoni ya? 23Eri ‘yora, Ma o'duko 'ba alᴜ oyᴜpi roko driarini, Emi 'ba leti Opini kililirᴜ, nabi Isayani 'yolerile. 24De 'ba Farisaini pe yi tini. 25Yi nga e'yo zi, 'yo tinia, Mi ka ovᴜ Kristo'i yo, kani Eliya'i yo, kani nabi nderi'i yo, mi di baputizi fe a'disi ya? 26Yohana nga e'yo omvi yi tia kini, Ma baputizi fe yisi ; te emi eselia 'ba alᴜ so pa indi emini nile kᴜri; 27eri 'ba emupi ma vᴜtia, mani dri fuzᴜ enyiriko eri ma paari ma baka ayuzᴜ kᴜri'i. 28E'yo 'diyi 'ye yi Betania Yoridani tia 'aa'dasi, pari Yohanani baputizi fezᴜria. 29Drᴜ 'dini eri nga Yesuni ndre emuria i vᴜ, nga 'yo ra indi, Mi ndre, Kabilomva Munguni, e'yo onzi nyakuni wupiri! 30'Ba 'diri eri 'ba mani e'yoni 'yoleri, Ma vᴜtia 'ba ovᴜpi ma driliari emuni, a'disikᴜ erini ndra ovᴜle mani okorisi. 31Ma'i, ma nini ndra eri kᴜ; te ma emu baputizi fezᴜ yisi, eri ma ovᴜ ecezarᴜ ani 'ba Israelini vᴜ beni. 32Yohana nze e'yo eti kini, Ma ndre Orindini esiria 'buarisi va ekile a'balaᴜle; eri ri drinia. 33Ma'i, ma nini ndra eri kᴜ ; te 'ba ma ti pepi baputizi fezᴜ yisiri 'yo ma tia, 'Ba mini Orindi ndrele esiria drinia rizᴜ drinia 'daniri, 'diri 'ba baputizi fepi Orindi Alatararᴜsiri'i. 34Ma ndre ra, ma nze e'yo etini 'bo kini 'ba 'diri eri Mvi Munguni. 35Drusi dika Yohanani de pa soria 'ba erini imbale 'diyi be iri, 36eri lu Yesuni aciria, eri ‘yora, Mi ndre, 'di Kabilomva Munguni! 37'Ba erini imbale iri 'diyi nga e'yo eri, erini 'yoria, nga Yesu ma vᴜti bi. 38Yesu oja i, ndre yi yini i vᴜti biria, nga 'yo yi tia, Emi a'di ndru ya? Yi nga 'yo eri tia, Rabi (ojazarᴜ efini 'dini, 'Ba 'ba Imbapiri), mi la ngoa ya? 39Eri 'yo yi tia, Emi emu, emi nga ndre ani. Yi nga di mu ani, nga pari erini lazᴜri ndre; yi nga la eri be o'du 'dasi; isu etu eca ekile mᴜdrile. 40'Ba alᴜ 'ba iri e'yo eripi Yohana tia, Yesu ma vᴜti bipi 'diyi ma eseliari, eri Andarea, Simoni Petero ma adri'i. 41Eri isu oko i adri Simoni'i, nga 'yo tinia, Ama isu Mesiani 'bo (ojazarᴜ efini Kristo'i). 42Eri ji eri Yesu vᴜ. Yesu lu vᴜnia, 'yo kini, Mi Simoni Yohana mvi; yi nga mi omve Kefa (ojazarᴜ efini Petero'i). 43Drusi 'dini eri nga le fᴜ mu Galilia. Eri isu Filiponi; Yesu nga 'yo tinia, Mi bi ma vᴜti. 44Isu Filipo enga Betesaida, aku Andarea pini Petero beria. 45Filipo isu Natanielini, nga 'yo eri tia, Ama isu 'ba Musa pini e'yoni sile azita alia nabi be, Yesu Yusufu mvi Nazare-tiari'i. 46Natanieli nga 'yo eri tia, Afa onyirᴜri eco engazarᴜ Nazaretia ra ya? Filipo nga 'yo eri tia, Mi emu ndre. 47Yesu nga Natanielini ndre erini emuria i vᴜ, nga 'yo erisi, Mi ndre, 'ba Israelini mgba, asia lokiri kokorᴜri 'di! 48Natanieli nga 'yo eri tia, Mi ni ma ngoa? Yesu nga e'yo omvi tinia kini, De nga Filipo omveni mi kᴜ, mini de ovᴜria elio pati etia, ma ndre mi 'daa. 49Natanieli nga e'yo omvi tinia, Rabi, mi Mungu Mvi! Mi Israeli ma Opi'i! 50Yesu nga e'yo omvi 'yo tinia kini, Mani 'yole mi tia, Ma ndre mi elio pati etia-risi mi a'i ra ya? Mi nga e'yo e'yo 'diyi agapi rari ndre. 51Eri 'yo vini tinia, Ma 'yo emi tia ndi ndi, emi nga 'bu ndre tile be zizarᴜ mgborᴜ, azini malaika Munguni yini turia azini esiria Mvi 'bani ma dria.

will be added

X\