YAKOBO 3

1Ma adripi, emi ma ovᴜ 'ba 'ba imbapirirᴜ kakaᴜ kᴜ, a'disikᴜ emi ni ra ama nga e'yo liza amborᴜ agapiri Isu ra. 2Te ama dria adri aba e'yo kakaᴜsi. Te 'ba azini ka aba e'yo 'yozasi kᴜ, 'ba nderi eri ovᴜ 'ba kililirᴜni, eri eco vini i ma rua dria ogazarᴜ indi. 3Te ama ka afa ayarᴜri 'ba akanya ma tilia, yi ma 'ye ani ekile amani lelerile, 'dini ama oja yi rᴜa dria. 4Mi ndre oguru indi; ka tro ovᴜ amborᴜ tᴜ, ka ovᴜ drozarᴜ oli okporᴜsi ti, te di yi ovᴜ ojazarᴜ atu gakanyarᴜrisi kala 'ba oguru ma ti pipiri ma asini leleria dria. 5Awa'dini andre ovᴜ rua ma esele wereri'i, te eri e'yo ambo ambo 'yo afᴜ be tᴜ. Mi ndre, aci gaarᴜ nga pati kakaᴜ ve ngopi ya! 6Andre eri acini. Andreni angᴜ ambo wudrikurule e'yo onzini rua amani ma esele ndᴜ ndᴜ 'diyi ma aliari'i, eri rua 'bani eza dria, eri adriza rᴜani 'bani osizᴜ eri beri ma ti dᴜ acisi, te yi dᴜ eri ma ngᴜlᴜpi ma ti Jehanumaa. 7Te 'ba ma adani adri suru anyapani dria etali, aria pie, afa acipi agatisi nyakua 'diyi pie, afa ovᴜpi miri alia 'diyi pie dria, 'ba adri yi etali 'dini engazᴜ drio, 8te 'ba alᴜni econi andre etalizarᴜ kᴜ—eri afa onzi ecole ogale kᴜri, eri ga enyata dra fepirisi tre tre. 9Andresi ama Opi Ata ma ru idu, azini andresi ama 'ba tri, yi 'ba Munguni 'bale i ma wurasi 'diyi. 10Ru iduza pi 'ba trizᴜri be yi ibi efᴜ tile alᴜa. Ma adripi, e'yoni ovᴜzᴜ 'dinileri funi dri kᴜ. 11Yi a'di ma alia, yi aluzarᴜri pi adri ega yi drazarᴜri be 'bile alᴜa ya? 12Ma adripi, eco elioni mizeitu efi 'yazarᴜ ya, kani eco zabibᴜni elio efi 'yazarᴜ ya? 'Dinile indi yi a'irᴜri econi yi aluzarᴜri fezarᴜ kᴜ. 13'Ba ondᴜarᴜ emi eselia e'yo vapiri a'di'i ya? Eri ma ece 'yeta erini adriza onyirᴜsi, asi e'yere ondᴜaniri ma alia. 14Te emi ka ovᴜ ma'yala drazarᴜri be azini awata be emi asia, emi ma enya emi afᴜsi kᴜ, emi ma li inzo e'yo adarᴜ ogazᴜ kᴜ. 15Ondᴜa 'diri ibini enga 'bua esizᴜ va kᴜ, te eri ondᴜa nyakuni, ava ruani be, orindi onziniri'i. 16Te pari 'bani ovᴜzᴜ ma'yala pisi awata beria, isu angᴜ di i ma aji ra, 'yeta onzikanyarᴜ be tre tre. 17Te ondᴜa ibipi 'bua ururi, okorisi eri ovᴜ alarᴜ, vᴜtinia asi anzurᴜ be, asi e'yere pie, eri ngonde e'yo 'bani erizᴜ, eri ga yiki pie tre tre efi 'yaza onyirᴜ 'diyi pie, openi 'ba kᴜ, ovᴜni lokiri be kᴜ. 18Efi 'yaza e'yo kililirᴜrini ma ori ovᴜ rizarᴜ asi anzurᴜ ma alia, 'ba e'yo 'yepi asi anzurᴜsi 'diyi ma e'yosi.

will be added

X\