YAKOBO 2

1Ma adripi, a'ita emini Yesu Kristo Opi amani dizaniri a'izᴜri ma alia, emi ma ope 'ba kᴜ. 2Te 'ba azini ka fi jo emini emi okᴜzᴜria mele driamvaari be, bongo ndrizarᴜri be ruaa, te 'ba alioni ka fi bongo ondirᴜ be indi ; 3emi ka 'ba bongo ndrizarᴜ supiri lu 'yozᴜ, Mi ri pari onyirᴜ 'doria; azini emi 'yo 'ba aliorᴜ ma tia, Mi so pa 'dale, kani, Mi ri va pari mani ma pa 'bazᴜri ma etia 'doa; 4ka'dini 'di ovᴜni 'ba opezᴜ emi eseliari kᴜ ya, emi ojani emi 'ba e'yo lipi asisile onzisi 'diyirᴜ kᴜ ya? 5Adripi mani lele 'diyi la, emi eri. Mungu openi 'ba aliorᴜ afa nyakunisi 'diyi yi 'bazᴜ ovᴜzᴜ 'ba a'ita e'irᴜ, azini suru erini azile 'ba eri lepi 'diyi driri nyazᴜ yi ma afarᴜ kᴜ ya? 6Te emi 'ba 'ba aliorᴜ 'diyi edematararᴜ. 'Ba afa e'irᴜ 'diyi adrini emi drilia opirᴜ emi nyazᴜ okposi kᴜ ya? Yi seni emi pari 'bani e'yo lizᴜria kᴜ ya? 7'Ba 'diyi adrini ru onyirᴜ 'bani emi omvezᴜri o'da kᴜ ya? 8Te di, emi ka azita suru opini nyaleriniri 'ye kilili e'yo sizani 'yolerile, kini, Mi ma le mi agyi mini mi ngᴜlᴜpi lelerile; emi 'ye onyirᴜ. 9Te emi ka 'ba ope, emi 'ye onzi, azini azita nderi nde emi, emini e'yoni ezale rarisi. 10Te 'ba azini ka azita inzi dria ra, te ka mu eza e'yo alᴜsi, eri eca ovᴜzᴜ 'ba azita dria ezapirirᴜ. 11Te 'ba 'yopi, Mi 'ba ali kᴜ-ri, eri 'yo vini indi, Mi 'di 'ba kᴜ. Mi ka ali 'ba kᴜ ti, te ka 'ba 'di ra, mi ofᴜ ovᴜzᴜ 'ba azita ezapirirᴜ. 12Emi ma 'yo azini emi ma 'ye ekile 'ba yini ngale yi ma e'yo lile azita trᴜtaniri vᴜsi 'diyile. 13Te e'yo liza ovᴜ yiki kokorᴜ 'ba yiki 'bapi kᴜri ma dria; yikini i enya ayikosi erini e'yo liza ndelerisi. 14Ma adripi la, orodrini ngoni ya, 'ba ka 'yo i ovᴜ a'ita be, te 'yeta erini yo? A'ita 'diri eco eri pazarᴜ ya? 15Adripi kani amvipi ka ovᴜ pililirᴜ, ka ovᴜ nyaka kokorᴜ o'du dria, 16te 'ba azini emi eseliari ka 'yo yi tia, Emi mu asi anzurᴜ be, emi mu aci yᴜ, emi tra nyakasi indi; te emi ka afa yini ndale yi ma rᴜa ma aza kozᴜri fe kᴜ, orodrini ngoni ya? 17Awa'dini a'ita ovᴜ 'dinile: ka ovᴜ a'dule 'yeta kokorᴜ, eri ovᴜ idri kokorᴜ. 18Te 'ba azini nga 'yo, Mi'i mi ovᴜ a'ita be, ma'i ma ovᴜ 'yeta be. Mi ece a'ita mini 'yeta kokorᴜri ma dri, te ma nga a'ita mani ece mi dri 'yeta manisi. 19Mi a'i kini Mungu eri alᴜ ; mi 'ye onyirᴜ. Te orindi onzi yi a'i alᴜ indi—yi rᴜa ya ya ani. 20Mi 'ba ondᴜa kokorᴜri la, mi leni ni kini a'ita 'yeta kokorᴜri ovᴜ toko, kᴜ ya? 21Yi lani ama a'bi Iburahimuni kililiru 'yeta erinisi, erini i mvi Isakani fele pari edeta edezᴜri ma driarisi kᴜ ya? 22Mi ndre a'ita 'ye tualᴜ 'yeta erini be, azini 'yeta nde 'diyisi a'ita eca i paria kililirᴜ, 23te e'yo siza 'yopi kini, Iburahimu a'i Mungu ra, yi la e'yo 'diri eri dri e'yo kililirirᴜ, 'diri 'ye i trotro ; azini omve eri agyi Munguni. 24Ka'dini emi ndre yi 'ba la kililirᴜ 'yetasi, te a'itasi a'dule kᴜ. 25'Dini alᴜ indi, okᴜ awuoᴜrᴜ Rahabu ovᴜni ndra lazarᴜ kililirᴜ 'yeta erinisi, erini ojioᴜ a'ile azini ti pele geri andinisi-risi kᴜ ya? 26Te ekile rua orindi kokorᴜrini ovᴜle avᴜnirile, 'dini alᴜ indi a'ita 'yeta kokorᴜri ovᴜ drazarᴜ idri kokorᴜ.

will be added

X\