YAKOBO 1

1Yakobo, ati'bo Munguni azini Opi Yesu Kristoniri, Suru mᴜdri drini iri yi erepi ndᴜ ndᴜ 'diyi vᴜ : Ma zi emi ci ci. 2Emi ka ovᴜ obeta ndᴜ ndᴜ ma alia, ma adripi, e'yo 'diri ma ovᴜ emi dri ayikorᴜ, 3emini niria o'biza a'ita emini o'bizᴜri eri asi teza eji. 4Emi kᴜ asi teza ma de azi ini dri fuzᴜ 'yeke, emi ma ovᴜ ani fudri ci afa dria be 'yeke, emini ani ecezᴜ e'yo alᴜnisi kᴜ. 5Te 'ba azini emi eselia ka ece ondᴜasi ra, eri ma zi Mungu afa fepi 'ba dria dri avasi, egapi 'ba dria kᴜri ma tia, eri nga ovᴜ fezarᴜ eri dri. 6Te eri ma zi a'itasi, abaza kokorᴜ, te 'ba asisile abaza beri si ekile yi mbᴜza mirini olini drole azini adile 'dale 'dolerile. 7Agu nderi ma ega i asia kini i nga afa azini isu Opi dri, 'dini kᴜ; 8eri 'ba asi iri be, oyapi oya geri ini ma aliasi driari'i. 9Te adripi valerᴜri ma ovᴜ ayiko be yini eri 'bale urᴜrisi, 10azini 'ba afa e'irᴜri ma ovᴜ vini ayiko be yini eri 'bale valerisi, erini ngale lule va ekile ase fᴜlerisi. 11Te etuni adri efᴜ oli acirᴜ be, eri fe aseni 'onyu onyu; fᴜni nga lu va, wura ndriza erini nga avi ra. 'Dinile alᴜ indi 'ba afa e'irᴜri nga dri ja acita erini ma alia ra. 12'Ba pa sopi obeta ma alia ci asi tezasiri eri drilebarᴜ, a'disikᴜ eri ka nga o'bita eri o'bizᴜri aga 'bo, eri nga ekilaza idrini Opini ndra azile 'ba eri lepi 'diyi driri isu ra. 13'Ba ovᴜpi obezaruri ma 'yo kini, Mungu obe mani, 'dini alᴜni kᴜ; te 'ba econi Mungu obezarᴜ e'yo onzisi kᴜ, Mungu obeni vini 'ba kᴜ indi; 14te 'ba alᴜ alᴜ ovᴜ obezarᴜ li erinini eri sele jile bileni ewilerisi. 15'Di ma vᴜtia, li ka mva isu i alia 'bo, eri ti ezatani; te ezata nde ka mba ra, eri osi dratani. 16Adripi mani lele 'diyi la, 'ba ma ici emi kᴜ. 17Afa feza onyirᴜ dria, azini feta kililirᴜ 'diyi dria ibi enga urᴜ, esizᴜ va engazᴜ Ata diza beri vᴜ, Ata nde i ojapi kᴜ ovᴜpi endrilendri ojataniri be kᴜri'i. 18Eri asini lelerisi, eri ti ama e'yo adarᴜrisi, ama ma ovᴜ ani afa erini 'bale 'diyi ma esele afa kapi okorirᴜ. 19Adripi mani lele 'diyi, emi ma ni 'diri. 'Ba dria ma ovᴜ e'yo erizᴜ mbele, e'yo 'yozᴜ e'yere, adra 'bazu mbele kᴜ, 20a'disikᴜ adra 'bani 'yeni e'yo kililirᴜ Munguniri kᴜ. 21E'yo 'disi emi ma nze e'yo ondirᴜ dria, azini asi onzi karakaraᴜ agapi rari pie, yi 'bezᴜ amve, emi ma a'i e'yo ovᴜpi sazarᴜ emi asia ecopi orindi emini papiri asi e'yeresi. 22Te emi ma ovᴜ 'ba e'yo 'yepi 'diyirᴜ, te 'ba e'yo eripi bilesi toko 'yepi kᴜ yi ngᴜlᴜpi icipi inzosi 'diyirᴜ kᴜ. 23Te 'ba ka ovᴜ 'ba e'yo eripi bilesi toko 'yepi kᴜrirᴜ, eri ovᴜ ekile 'ba i ma ngᴜlᴜpi ma mileti ndrepi mandara ma aliarile; 24te eri ka i mileti ama 'bo, eri mu ra, coti mileti erini te e'dapi ngoni yari avi eri dri ra. 25Te 'ba lupi azita kililirᴜ trᴜtaniri ma aliari, ka adri alenia 'dani, ka ovᴜ 'ba e'yo eripi avipi mbeleri'i kᴜ, te 'ba 'yeta 'yepi rari'i, 'ba 'diri eri nga ovᴜ drilebarᴜ erini 'yeta 'yeria. 26'Ba azini ka ega i ma asia i bi dini Mungu inzizᴜri 'bo, de nga eri ombeni i andre kᴜ, te eri ici i ma asi, dini agu 'dirini Mungu inzizᴜri eri toko. 27Dini Mungu inzizᴜ alarᴜ ezata kokorᴜ Mungu Ata ma miliari eri 'di'i: imvoanzi pi andrizᴜ awᴜzi pie ocoko yini ma alia, azini 'bani i ma agei tezᴜ e'yo nyakuni kazᴜ eri ezazᴜ kᴜ.

will be added

X\