EBRANIANI 9

1Te aziza okori ovᴜ azita be azi inzitaniri azizᴜ, azini eri ovᴜ pari alatararᴜ nyaku 'doriari be. 2A’disikᴜ yi ede bere okori, alenia tala pati indi, mesa pie, mikate ecetarᴜri pie ; omve eri Pari Alatararᴜri'i. 3Te bongo jo ale iriri alizᴜri ma alialerᴜ, bere omvele Pari Alatararᴜ Agapi Tᴜri indi ; 4eri ma alia pari melerᴜ obiese vezᴜri pi indi, sanduku azizani ruani a'bᴜle melesi ciri be, sanduku nde ma alia imvᴜ melerᴜ ovᴜpi mana beri pi indi kali Aronini bi idipiri pie, oni 'bararᴜ azizani 'diyi pie; 5azini eri ma drilia urᴜlerᴜ kerubi dizani indi, endri fezᴜ ogᴜŋa yikiniri ma dria. Te afa 'diyi ma e'yo ama econi 'yozarᴜ curu'do alᴜ alᴜ kᴜ. 6Afa 'diyi ovᴜ edezarᴜ 'dinile 'bo, atalaᴜ edeta edepi 'diyi adri fi bere okori ma alia o'du dria, azi inzitani 'yezᴜ; 7te bere iriri ma alia kiri atalaᴜ edeta edepi agapi rari fi, pale alᴜ eli vᴜsini, fini vini ari kokorᴜ kᴜ, te eri adri ari fe edetarᴜ i ma ngᴜlᴜpisi azini ezata 'ba driani ma e'yosi indi. 8Orindi Alatara-rᴜrini e'yo 'diri eceria 'dini, kini geri fizᴜ pari alatararᴜ ma aliari ovᴜni nga ecezarᴜ kᴜ, de bere okorini nga pa soria 'dani 9('di ovᴜ ecetarᴜ ewu curu'dorisi). Bere 'diri ma alia yi adri afa feza piyi fe edeta be, te edeta 'diyi econi 'ba Mungu inzipiri ma asisile i ma e'yo onzi nizᴜri 'baza-rᴜ dri fuzᴜ ci kᴜ, 10a'disikᴜ azita 'diyi ovᴜ azizarᴜ e'yo ruanisi a'dule, nyaka pi ma e'yo azizᴜ, afa mvuza pie, ojiza ndᴜ ndᴜ 'diyi pie, ovᴜpi azizarᴜ de nga yi edeni e'yo o'dirᴜ kᴜ 'diyi. 11Te Kristo eca 'bo, eri atalaᴜ edeta edepi agapi ra e'yo onyirᴜ ngapi ecapi 'diyiniri, eri fi pale alᴜ iriti Pari Alatararᴜri ma alia, agazᴜ bere ovᴜpi amborᴜ azini dri fupi ci agapi tᴜ, 'bani edele drisi kᴜri ma aliasi (efini, ovᴜni bere nyaku 'doriari kᴜ) 12eri fini ndri ma arisi kᴜ, kani koanzi ma arisi kᴜ, te i ma ngᴜlᴜpi ma arisi, erini onzeza 'ba otrᴜzᴜ kpere 'dani 'dani isuria 'bo. 13Te ndri pi ma ari monio be, azini ofᴜta tikarini cole 'ba alatara kokorᴜ di yi ma ruaari ka eco yi 'bazarᴜ alarᴜ ondi ruanisi, 14ka'dini Kri-sto i ma ngᴜlᴜpi fepi edetarᴜ ezata kokorᴜ Mungu dri Orindi 'dani 'danirisiri ma arini nga asisile emini e'yo onzi nizᴜri 'ba alarᴜ, emini azi dratani kᴜzᴜ azi inzitani ngazᴜ Mungu idrirᴜri dri aga ra kᴜ ya? 15E'yo 'dirisi eri ovᴜ 'ba 'ba ecipi Mungu be e'yo aziza o'dirᴜri-siri, te 'ba alᴜni drale e'yo onzi ovᴜpi 'yezarᴜ aziza okori ma palaa 'diyi ma arioti ofezᴜrisi, 'ba ovᴜpi omvezarᴜ 'diyi ma isu aziza awita 'dani 'dani-rini. 16Te aziza afa awazᴜri ka ovᴜ indi, ma ni 'ba afa azipiri ma drata oko. 17A'disikᴜ aziza afa awazᴜri ovᴜ okpo be kiri 'ba nderini drale 'borisi, te eri ovᴜ okpo kokorᴜ de nga 'ba eri azipirini ovᴜria idrirᴜ. 18E'yo 'dirisi e'yo aziza okori indi ovᴜni e'dozarᴜ ari kokorᴜ kᴜ. 19'Dini Musa ka de azita dria olᴜzᴜ 'ba dria ma tia ekile azitani 'yolerile 'bo, eri 'du koanzi ma ari, ndri ma ari pie, kabilo 'biko ekarᴜri pie, ediko bi pie, eri oya eri ani buku nde ma dria azini 'ba nde ma dria dria, 20kini, 'Di ovᴜ ari e'yo aziza Munguni azile emi vᴜrini. 21'Dinile eri oya ari bere pi ma dria, afazᴜ dria azi inzitani ngazᴜ 'diyi be. 22Azini ekile azitani 'yolerile, eca ogogo afa dria ovᴜ 'bazarᴜ alarᴜ arisi, azini ari raza kokorᴜ wutani yo. 23E'yo 'dirisi le eceta afa 'bua 'diyini ma ovᴜ 'bazarᴜ alarᴜ edeta 'diyisi, te le afa 'bua 'diyi ma ngᴜlᴜpi ma ovᴜ 'bazarᴜ alarᴜ edeta afa 'diyi agapi ra 'diyisi. 24A'disikᴜ Kristo fini pari alatararᴜ edele drisi ovᴜpi ecetarᴜ pari adarᴜri ecezᴜria kᴜ, te eri fi 'bu adaria, i e'dazᴜ curu'do Mungu ma milia amasi. 25Fini i ma ngᴜlᴜpi fezᴜ edetarᴜ pale kakaᴜ, ekile atalaᴜ edeta edepi agapi rarini file Pari Alatararᴜri ma alia eli vᴜsi eli vᴜsi, ari ovᴜpi erinirᴜ kᴜri berile kᴜ; 26ka ndra ovᴜ 'dini, te'do isu eri ovᴜ ecandizarᴜ pale kakaᴜ engazᴜ ewu nyaku eti 'bazᴜria. Te curu'do eri e'da di i 'bo pale alᴜ ewuni asizᴜria, e'yo onzi wuzᴜ erini i ma ngᴜlᴜpi fele edetarᴜ'irisi. 27Azini ekile erini ovᴜle 'bazarᴜ 'ba dri drazᴜ pale alᴜ, vᴜtinia fizᴜ e'yo liza ma aliarile, 28'dinile Kristo indi, ovᴜ-pi fezarᴜ edetarᴜ pale alᴜ 'ba kakaᴜ ma e'yo onzi 'duzᴜ, nga i e'da pale iririsi, ezata kokorᴜ, pata ejizᴜ 'ba eri ma dri tepi 'diyi dri.

will be added

X\