EBRANIANI 7

1Te Melekizedeki 'diri, opi Salemua, atalaᴜ edeta edepi Mungu Urᴜ Tᴜrini, dri fupi Iburahimu be erini emviria yini 'ba opirᴜ 'diyi ofuzᴜ 'bori ma vᴜtia, asi ndriza fepi eri dri, 2Iburahimuni vini afa dria ma esele mᴜdri ma azi alᴜri awazᴜ eri driri. Okorisi eri opi e'yo kililirᴜrini (ru erini ma efi 'dini) azini vini eri opi Salemuari, efini opi asi anzurᴜni; 3ata kokorᴜ, ayia kokorᴜ, a'bi kokorᴜ, ovᴜpi o'du erini e'dozᴜri be kᴜ, azini asiza idriniri be kᴜ indi, te ovᴜpi ekile Mvi Mungunileri, eri ovᴜ atalaᴜ edeta edepirirᴜ 'dani. 4Te emi ega nga, 'ba 'diri ovᴜ amborᴜ tᴜ ngopi, Iburahimu ama a'bi amborᴜni afa opaza ma esele mᴜdri ma azi alᴜri fezᴜ eri driri ya! 5Adarᴜ Levi ma anziyi azi edeta edezᴜri bipi 'diyi ovᴜ azita be afa ma esele mᴜdri ma azi alᴜ a'izᴜ 'ba vᴜ, adarᴜ adripi yini vᴜ, ekile azitani 'yolerile, 'ba nde 'diyi ka ovᴜ Iburahimu ma orini ti. 6Te 'ba yini eri ma a'bi lazᴜ yi ma eselia kᴜri, eri a'i afa ma esele mᴜdri ma azi alᴜ Iburahimu vᴜ, azini fe asi ndriza 'ba ovᴜpi aziza beri dri. 7'Ba econi agata gazarᴜ e'yo 'dirisi kᴜ, 'ba wereri adri asi ndriza isu 'ba ambo eri agapi rari vᴜ. 8'Doa 'ba ecopi drapi 'diyi adri afa ma esele mᴜdri ma azi alᴜri a'i ra; te 'dale, 'ba yini eri ma e'yo eti nzele kini eri idrirᴜri a'ini. 9Azini ama eco 'yozarᴜ, Levini indi, 'ba afa ma esele mᴜdri ma azi alᴜ a'ipiri fe afa ma esele mᴜdri ma azi alᴜ 'bo, geri Iburahimu ma aliarisi; 10te eri ovᴜ ndra nga i a'bi ma rua alia, de Melekizedekini dri furia eri beria. 11Te azi 'ba Levini edeta edezᴜri ka ndra eco 'ba 'bazᴜ dri fuzᴜ ci (te 'ba isu ndra azita azi nde 'dirisi), ka'dini atalaᴜ edeta edepi azini efᴜpi ekile peza Melekizedekini pezᴜrile, ovᴜpi omvezarᴜ peza Aronini pezᴜ-rile kᴜri ma enga a'disi ya? 12'Dini azi atalaᴜni edeta edezᴜri ka ovᴜ ojazarᴜ, azita ma oja i indi ada. 13A'disikᴜ 'ba yini e'yo 'diri 'yozᴜ erisiri eri suru andini, te 'ba alᴜni engapi suru nde 'diri ma aliari azi pari edeta edezᴜriari ngapini yo. 14A'disikᴜ 'ba dria ni adarᴜ kini Opi amani enga Yuda alia; te Musa 'yoni atalaᴜ edeta edepi 'diyi ma e'yo suru nderi ma tia alᴜni kᴜ. 15Te e'yo 'diri ovᴜ nizarᴜ onyirᴜ aga ra, atalaᴜ edeta edepi aziniri ka enga ekile peza Melekizedekini pezᴜrile, 16ovᴜpi 'bazarᴜ azita e'yo rᴜani azizᴜrisi kᴜ, te okpo idri ecopi depi kᴜrinisiri. 17A'disikᴜ yi nze e'yo erini ma eti 'dini, Mi ovᴜ atalaᴜ edeta edepirirᴜ 'dani 'dani, ekile peza Melekizedekini pezᴜ-rile. 18'Dini yi 'ba azita okori tokorᴜ erini ovᴜle okpo kokorᴜ azini orodri kokorᴜrisi 19(a'disikᴜ azita nde 'bani afa alᴜni dri fuzᴜ ci kililirᴜ kᴜ) ; azini yi ofi asi teza onyirᴜ aga ra, amani ani esizᴜ Mungu vᴜ ogogori. 20Eri ovᴜni oyo soza kokorᴜ kᴜ. 21Te 'ba 'dayi ovᴜ 'bazarᴜ atalaᴜ edeta edepi 'diyirᴜ oyo soza kokorᴜ, te eri'i ovᴜ 'bazarᴜ oyo soza be, ekile 'ba e'yo 'yopi eri ma tiarini 'yolerile, kini, Opi so oyo 'bo, eri ngani i oja kᴜ, Mi ovᴜ atalaᴜ edeta edepirirᴜ 'dani 'dani. 22Te e'yo 'dirisi Yesu eca toborᴜ aziza agapi rari azizᴜ. 23Adarᴜ atalaᴜ edeta edepi 'dayi ovᴜ kakaᴜ, a'disikᴜ dra oga yini ovᴜko 'dani 'danini; 24te eri'i, erini ovᴜle 'dani 'danirisi, eri ovᴜ azi edeta edezᴜ ecopi i depi kᴜri be. 25E'yo 'dirisi indi eri eco 'ba sipi Mungu vᴜ ogogo erisi 'diyi opazarᴜ teke teke, erini ovᴜle idrirᴜ 'dani 'dani Mungu zizᴜ yi dririsi. 26Te atalaᴜ edeta edepi agapi ra 'dinileri fu dri amasi 'yeke, eri alatararᴜ, asi onzi kokorᴜ, ondi kokorᴜ, i esele copi 'ba e'yo ezapi 'diyi be ndᴜ, ovᴜpi 'bazarᴜ uru aga 'bu rari. 27Leni eri ma ede edeta o'du vᴜsi o'du vᴜsi, kile atalaᴜ edeta edepi agapi ra 'dayile, okorisi i ma ngᴜlᴜpi ma e'yo onzi edezᴜ, vilerisi 'ba ma e'yo onzi edezᴜ ndo, 'dini kᴜ; eri 'ye 'di pale alᴜ fudri e'yo driasi ra, erini ndra i ngᴜlᴜpi feria edetarᴜ. 28A'disikᴜ azitani adri 'ba ovᴜpi okpo kokorᴜ 'diyi ope 'bazᴜ atalaᴜ edeta edepi agapi ra 'diyirᴜ; te e'yo oyo soza nderini, ecapi azita nde ma vᴜtiari, eri 'ba Mvi ecopi dri fupi ci kililirᴜ 'bo 'dani 'danirᴜri'i.

will be added

X\