EBRANIANI 3

1E'yo 'dirisi, adripi alatararᴜ omveta 'buari a'ipi tualᴜ 'diyi, emi ma ega Yesu 'ba ti epele azini atalaᴜ edeta edepi agapi ra a'ita amani e'daleriniri'i. 2Eri ovᴜ asI adarᴜ be 'ba eri 'bapi atalaᴜrᴜri vᴜ, kile Musani ovᴜle asi adarᴜ be jo Munguni ma alia driarile. 3Te la eri onyirᴜ diza isuzᴜ aga Musa ra, ekile 'ba jo sipirini inzita isule tᴜ jo nde agazurile. 4A'disikᴜ jo dria alᴜ alᴜ ovᴜ afa 'bani sileniri'i, te 'ba afa dria 'bapiri eri Mungu'i. 5Te Musa ovᴜ ndra asi adarᴜ be jo Munguni ma alia dria ekile atibole, e'yo yini ngale 'yole etu vilerisi 'diyi ma e'yo eti nzezᴜ; 6te Kristoni, ekile mvile, ovᴜ asi adarᴜ be jo Munguni ma drilia. Jo nderi ama'i, ama ka asi okporᴜ amaniri pi bi ci, ayiko e'yo tezaniri be, kpere ewu asizᴜria. 7E'yo 'dirisi, ekile Orindi Ala-tararᴜni 'yolerile, Andrᴜ emi ka o'duko erini eri, 8emi ma 'ba asi emini mbazarᴜ kᴜ ekile o'du awatanisirile, ekile o'du o'bita roko driarinisi-rile, 9emi a'bipini ndra ma o'bizᴜ yini ma oberiarile, yi ndre ndra 'yeta mani eli kali su. 10E'yo 'dirisi asi mani ve aokosi anzi nde 'diyi ma e'yosi, ma ‘yora, Yi ovᴜ abazarᴜ asi yini ma alia o'du dria; yi nini nga geri mani kᴜ. 11Ekile mani oyo sole adra manisi-rile, Yi ma fi ava liza mani ma alia alᴜni kᴜ. 12Emi te emi agei, ma adripi, 'ba azini alᴜ emi eseliari kazᴜ ovᴜzᴜ asi onzi a'ita kokorᴜri be kᴜ, Mungu idrirᴜri kᴜzᴜ. 13Te emi ma imba emi asi emi eselia o'du dria, de nga o'du omvele andrᴜri eri indi, 'ba azini alᴜ emi eseliari ma asi kazᴜ ovᴜzᴜ mbazarᴜ lokiri e'yo onzinisi kᴜ. 14A'disikᴜ ama eca ovᴜzᴜ 'ba Kristo isupi 'diyirᴜ 'bo, ama ka a'ita amani okokeleri bi ci kpere ewu asizᴜria, 15yini nga 'yoria 'dani, Andrᴜ emi ka o'duko erini eri emi ma 'ba asi emini mbazarᴜ kᴜ ekile o'du awatanisirile. 16Te 'ba e'yo eripi 'diyi ma eselia, 'ba awapi eri be 'diyi a'di piyi ya? Yi 'ba dria efᴜpi ndra Misiria Musasi 'diyi kᴜ ya? 17Azini asi erini ve aokosi eli kali su a'di piyi ma e'yosi ya? Ovᴜni 'ba e'yo ezapi, yi ma avᴜni o'dezᴜ roko dria 'diyi kᴜ ya? 18Te eri so oyo yi ma fi ava liza erini ma alia alᴜni kᴜ a'di piyi dri ya? Ovᴜni kiri 'ba e'yo eripi kᴜ 'diyi kᴜ ya? 19'Dini ama ndre econi yini fizarᴜ kᴜ, a'ita yinini ovᴜle yorisi.

will be added

X\