EBRANIANI 2

1E'yo 'dirisi ama ma 'ba asi amani e'yo amani erileri ma dria aga ra, ama kazᴜ sizᴜ vile e'yo nderi kᴜzᴜ kᴜ. 2A'disikᴜ e'yo ndra malaikani 'yoleri ka ovᴜ ndra okporᴜ, te ezata dria azini eritaako dria ka ndra panga kililirᴜri isu, 3ka'dini ama ka pata amborᴜ 'dopi 'donileri 'ba afa tokole' ama nga apa ngoni ngoni ya? Pata nde Opini ndra e'dole olᴜleni, 'ba eri eripi 'diyini e'yoni 'bale okporᴜ ama driri’i, 4Munguni indi e'yo eti nzeria yi be tualᴜ, eceta piyisi, tali pie, azi okporᴜ ndᴜ ndᴜ 'diyi pie, erini Orindi Alatararᴜ awaria yi dri erini lelerile. 5Te eri 'bani angᴜ wudrikuru ngapi emupi amani e'yoni 'yoleri va malaika ma palaa kᴜ. 6Te 'ba azini nze e'yo eti pari azinia, kini, 'Ba eri a'di afani, mini e'yoni egazᴜ 'dini ya? Kani mvi 'bani eri ngonirᴜ, mini eri andrizᴜ ani ya? 7Mi 'ba eri malaika ma vᴜtia were, mi 'ba diza pi inzita be eri ma dria ekilazale, mi 'ba eri opirᴜ azi mi drini 'yeleni 'diyi ma drilia; 8mi 'ba afa dria va eri ma palaa. Erini afa dria 'baria va eri ma palaa 'dini, eri kᴜni afa alᴜni 'bakokorᴜ eri ma palaa kᴜ. Te curu'do ama ndreni nga afa dria ovᴜ 'bazarᴜ eri ma palaa 'dinile kᴜ. 9Te ama Yesu lu, eri ovᴜ ndra 'bazarᴜ malaika vᴜtia were, ecandiza dratani ma e'yosi, te curu'do 'ba diza pi inzita be eri ma dria ekilazale, 'dini 'yeta anzutiri Mungunirisi eri ma o'bi dra ma aji 'ba driasi. 10'Dini afa driani ovᴜle 'bazarᴜ eri ma e'yosi, azini geri eri vᴜrisirisi, Munguni anzi kakaᴜ ejiria diza ma alia, e'yo 'di eco erisi onyirᴜ ambo yi dri cepi pata ma aliari 'bazᴜ ovᴜzᴜ kililirᴜ geri ecandizanirisi. 11'Di-ni 'ba yi 'bapi alarᴜri azini 'ba 'bale alarᴜ 'diyi yi dria enga 'ba alᴜ vᴜ. E'yo 'dirisi eri ovᴜni drinzasi yi omvezᴜ adripirᴜ kᴜ, 12kini, Ma nga ru mini olᴜ ma adripi 'diyi ma tia, ma nga ongo ngo mi inzizᴜ 'ba ongᴜlᴜmᴜrᴜ ma eselia. 13Azini dika, Ma nga a'ita mani 'ba eri alia. Azini vini dika, Mi ndre, ma'i, anzi Munguni fele ma dri 'diyi be. 14Anzi ma rua ari berini ovᴜle alᴜrisi, eri'i indi eri 'du afa 'diyi tro tro, 'dini dratasi eri ma oja 'ba ovᴜpi okpo dratani beri ovᴜzᴜ tokorᴜ, 'di 'ba asᴜ sᴜpiri'i; 15azini eri ma otrᴜ 'ba dria dra ma urini ombele ati'barᴜ, ewu yini ovᴜzᴜ idrirᴜ ma alia dria 'diyi indi. 16Adarᴜ eri bini wura malaikani kᴜ, te eri bi ori Iburahimuni ma wura. 17E'yo 'dirisi eri ma ovᴜ 'bazarᴜ tro tro adripi erini 'diyile e'yo driasi, eri ma ovᴜ atalaᴜ edeta edepi agapi rari e'yo Mungunisi, yiki be azini asi adarᴜ be, 'ba 'diyi ma e'yo onzi edezᴜ. 18'Dini erini ndra candi isule obetasi 'borisi, eri eco 'ba ovᴜpi obezarᴜ 'diyi ma aza kozarᴜ ra.

will be added

X\