EBRANIANI 13

1Leta adripini yi lezᴜri ma ovᴜ 'dani. 2Emi ma avi omu a'izᴜ avasi wa'dirᴜ kᴜ, te geri 'dinilerisi 'ba azini a'i ndra malaika omu yinirᴜ, nikokorᴜ. 3Emi ma ega 'ba arᴜjoa 'diyi ma e'yo, ekiile 'ba ovᴜpi arujoa yi be tualᴜ 'diyile; emi ma ega vini 'ba ovᴜpi inzazarᴜ 'diyi ma e'yo, ekile emi ngᴜlᴜpini ovᴜle rua berile. 4E'yo okᴜ bizani ma ovᴜ inzizarᴜ 'ba dria ma eselia, azini e'yo agupi pini yi ecizᴜ okᴜ beri ma ovᴜ ezazarᴜ kᴜ; a'disikᴜ Munguni nga 'ba mile aci be 'diyi pi ma e'yo li 'ba ali o'bapi 'diyi beni. 5Ava silingi lezᴜri ma ovᴜ emi ma asisilea kᴜ, afa emini ovᴜzᴜ yi be 'diyi ma fu dri emini ra; a'disikᴜ eri ma ngᴜlᴜpi ‘yora, Ma ngani ece mi aza kozᴜ kᴜ, ma ngani mi kᴜ kᴜ indi. 6Ka'dini ama 'yo ani asi tezasi, Opini 'ba ma aza kopiri, ma ngani rᴜ kᴜ; 'ba eco ma rᴜaa a'di 'yezarᴜ ya? 7Emi ma ega 'ba emi dri cepi, e'yo Munguni olᴜpi emi tia 'diyi ma e'yo; emi ma ega adriza yini ma kalati asizᴜri ma e'yo, emi bi a'ita yini ma vᴜti. 8Yesu Kristo ojani i kᴜ, aje, andrᴜ, kpere 'dani 'dani. 9Imbata andini o'dirᴜ ndᴜ ndᴜ 'diyi ma se emi kᴜ; te eri onyirᴜ asini okpo isuzᴜ 'yeta anzᴜtirisi, afa nyazasi kᴜ, 'ba acipi e'yo 'diyi ma alia 'diyi isuni ani orodri kᴜ. 10Ama ovᴜ pari edeta edezᴜri be, te 'ba bere ma azi ngapi 'diyi econi nyakaniri nyazarᴜ kᴜ. 11Te anyapa atalaᴜ edeta edepi agapi rarini yi ma ari ejile pari alatararᴜ ma alia edetarᴜ e'yo onzi edezᴜ 'diyi ma avᴜ ovᴜ vezarᴜ pari hema asozᴜri ma tia amve. 12E'yo 'dirisi Yesu indi ovᴜ ecandizarᴜ aku tilia amve, eri ma 'ba ani 'ba alatararᴜ i ma ngᴜlᴜpi ma arisi beni. 13E'yo 'dirisi ama ma fᴜ eri vᴜ pari hema asozᴜri ma tia amve, drinza nyazᴜ eri be. 14Te 'doa ama ovᴜni aku ovᴜpi 'dani 'daniri be kᴜ, te ama aku ngapi ovᴜpi ndori ndrᴜ'i. 15Yesusi ama ma ede ani edeta inzitaniri Mungu dri etuzu etuzu, 'di efi ama tile eri ma ru e'dapi 'diyini 'yaleri'i. 16Te emi ma avi e'yo onyirᴜ 'yezᴜ azini afa feza fezᴜ 'ba dri kᴜ, a'disikᴜ Mungu le edeta awa'dinile 'diyi tᴜ. 17Emi eri 'ba emi dri cepi 'diyi ma e'yo, emi ma ovᴜ yi ma palaa inzitasi ; yini emi orindi ma agei tele.. ekile 'ba ngapi afa ma kalafe ecepi 'diyilerisi. Yi ma 'ye 'diri ayikosi, te candisi kᴜ; yi ka 'ye candisi, ngani ovᴜ orodrirᴜ emi dri kᴜ. 18Emi zi Mungu amasi, te ama ni adarᴜ ama ovᴜ asisile alarᴜ be, ama le acizᴜ alarᴜ e'yo dria ma alia. 19Ma matᴜ 'ba emi vᴜ aga ra emi ma 'ye 'dinile, ma ma mvi ani emi vᴜ mbelerᴜ beni. 20Te Mungu asi anzurᴜni Opi amani Yesu 'ba kabilo ocepi amborᴜ nderi engapi 'ba draza ma eselia, aziza 'dani 'daniri ma arisiri, 21ma ede emi ovᴜzᴜ fudri ci afa onyirᴜ driasi e'yo erini leleri 'yezᴜ, e'yo ovᴜpi onyirᴜ eri ma miliari 'yezᴜ ama alia, Yesu Kristosi ; diza ma ovᴜ eri vᴜ 'dani ewule ewule. Amena. 22Te ma azi emi tia, adripi, emi ma a'i e'yo asi omizani 'dori, te ma si waraga emi dri e'yo weresi 'do. 23Emi ma ni, trᴜ adripi amani Timoteoni 'bo ; eri ka eca mbele, ma nga emi ndre eri be tualᴜ. 24Emi zi 'ba emi dri cepi 'diyi dria ci ci, 'ba alatararᴜ 'diyi be dria. 'Ba engapi Italiaa 'diyi zi emi ci ci. 25'Yeta anzutiri ma ovᴜ emi be dria. Amena.

will be added

X\