EBRANIANI 12

1E'yo 'dirisi ama'i indi, 'ba e'yo eti nzepi ongᴜlᴜmᴜrᴜ karakaraᴜ iritile 'diyini ama acele kururisi, ama ma trᴜ afa nzizarᴜ dria, e'yo onzi ama bipi mbeleri be, ama ma nzᴜ ongusi asi tezasi abala ovᴜpi 'bazarᴜ ama driliari ma alia, 2ama ma 'ba mile amani Yesu vᴜ, eri ambo a'ita amani e'dopi azini 'bapi ovᴜzᴜ fᴜdri ciri'i, ayiko ovᴜpi 'bazarᴜ eri ma driliari ma e'yosi eri 'du candi 'bani eri dizᴜ pati ruaari asi tezasi ra, eri asini drinzani ma e'yosi kᴜ, azini eri ri va ogᴜŋa Munguniri ma dri ndiria 'bo. 3Te emi ma ega Yesuni o'data 'ba e'yo onzi 'yepi 'diyini eri o'dazᴜ onzi 'dinileri 'duzᴜ asi tezasiri ma e'yo, emi kazᴜ ovᴜzᴜ andezarᴜ kani ava kokorᴜ asi emini ma alia kᴜ. 4Emini a'di 'diria e'yo onzi be, emi 'dini omba kpere cazᴜ arini raria nga kᴜ. 5Te e'yo olᴜza 'yopi emi tia ekile anzi tiarileri avi emi dri, kini, Mva mani, mi 'ba cota Opini mi imbazᴜri e'yo werele kᴜ, eri ka ega mi dria, mi ma ovᴜ ava kokorᴜ asi mini ma alia kᴜ. 6A'disikᴜ Opini adri 'ba erini lele avasiri co eri imbazᴜ, eri adri anzi dria alᴜ alᴜ erini a'ile 'diyi oco ra. 7Emi a'i cota asi tezasi imbata isuzᴜ. Mungu 'ye emi vᴜ ekile anzi vᴜrile; te mva atini cole eri imbazᴜ kᴜri ngori ya? 8Te emi ka ovᴜ cota emi imbazᴜ 'ba driani isuleri be kᴜ, ka'dini de di emi alianzirᴜ, emi ovᴜni karianzini kᴜ. 9Te di, ama ovᴜ ama atapi e'yo ruanisi 'diyi be ama cozᴜ imbatarᴜ, ama adri yi inzi ra. Ka'dini agapiri ama ngani Ata orindini inzi ovᴜzᴜ ani idri be kᴜ ya? 10Adarᴜ 'ba nde imba ndra ama o'du were ekile erini ovᴜle onyirᴜ yi ma miliarile, te eri'i, eri ama imba ama 'yezᴜ onyirᴜ, ama ma ovᴜ ani 'ba alatara erini a'ipi 'diyirᴜ. 11Cota ama imbazᴜri dria ovᴜni ayikorᴜ ama inilia ewu curu'dorisi kᴜ, te candirᴜ; te vilerisi eri nga efi e'yo kililirᴜni asi anzurᴜ beri ka 'ba cota ndeni imbaleni 'diyi dri. 12E'yo 'dirisi emi enga emi dri akazarᴜ 'diyi ra, emi fe okpo kᴜmᴜti okpo kokorᴜ 'diyi dri, 13azini emi ede geri kililirᴜ pa emini dri, 'dini fala ovᴜpi acozarᴜri ma nze i i pariasi kᴜ, te ma ovᴜ ani atizarᴜ beni. 14Emi ndru ovᴜzᴜ asi anzurᴜ be 'ba dria vᴜ; azini ovᴜzᴜ asi alatararᴜ be, te 'ba alᴜni ovᴜpi 'dinile kᴜri econi Opi ndrezarᴜ kᴜ. 15Emi ma ndre onyirᴜ 'ba alᴜni kazᴜ ecezᴜ 'yeta anzutiri Mungunisi kᴜ; ola asi onzini kazᴜ idizᴜ candi fezᴜ kᴜ, 'ba kakaᴜ yi kazᴜ yi ezazᴜ e'yo nderisi kᴜ; 16'ba mile aci beri, kani 'ba e'yo Munguni 'bapi tokori kazᴜ ovᴜzᴜ emi eselia kᴜ, ekile Esau 'ba e'yo erini ovᴜzᴜ mva okorirᴜri fepi ozipi nyaka nyale vᴜ alᴜrisirile. 17Te emi ni ra vilerisi eri ka le asi ndriza nde a'i awitarᴜ ndo, yi ga eri si, eri isuni pari asi ojazani kᴜ, eri ka tro eri ndru asi driasi mindresi ti. 18'Dini emi ecani oni 'bani ecole elole drisi, vepi acisiri pi vᴜ kᴜ, iriti inicicirᴜri pie, angᴜ biza pie, oliriko pie, 19gᴜka awᴜ pie, o'duko e'yo 'yopiri pie ; 'ba o'duko nde eripi 'diyi 'ba ndra matᴜ ma 'yo e'yo azini 'dinile 'diyi yi tia kᴜ. 20Te yi econi e'yo ovᴜpi azizarᴜ, kini, Ka anyapani ti, ka oni elo, ma o'be eri onisi ra, 'diniri a'izarᴜ kᴜ. 21Te afa e'dapi yi ma miliarini ovᴜle uriurirᴜ tᴜrisi, Musa kini, Ma ovᴜ urisi tᴜ, ma ruani ya ya. 22Te emi eca oni Zioni pi vᴜ 'bo, aku Mungu idrirᴜrini, Yerusalemu 'buari pie, malaika karakaraᴜ lakokorᴜ 'diyi pie, 23okᴜza kanisa amuruaanzi yi ma ru sile 'bua 'diyiniri pie, Mungu 'ba dria ma e'yo lipiri pie, orindi 'ba kililirᴜ ovᴜpi 'bazarᴜ ovᴜzᴜ fudri ci 'diyini pie, 24Yesu 'ba 'ba ecipi Mungu be aziza o'dirᴜsiri pie, ari oyaza e'yo onyirᴜ tᴜ e'yo Habili ma arini 'yoleri agapi rari 'yopiri pie dria. 25Emi ndre onyirᴜ emi ma ga 'ba e'yo 'yopiri ma ti kᴜ. Te 'ba ndra 'ba yi ma bilendu lipi nyakuari ma ti gapi si 'diyi ka ndra eco apazarᴜ kᴜ, ama ka ama oja vile 'ba e'yo 'yopi 'buari ma ti gazᴜ ama nga apa ngoni ngoni ya? 26O'duko eriniri oya ndra nyaku etu 'darisi; te curu’do eri azi kini, Ace nga pale alᴜ dika ma nga ni kiri nyakuni oya a'dule kᴜ, te 'bu indi. 27E'yo 'yole kini, Ace nga pale alᴜ dika, 'diri ece kini eri nga afa oyale ra 'diyi nze ekile afa ovᴜpi 'bazarᴜ 'diyile, 'dini afa oyale kᴜ 'diyi ma ace ani 'dani beni. 28E'yo 'dirisi amani opi nyaza ecopi oyapi kᴜri isulerisi ama ma ovᴜ 'yeta anzutiri be, amani ecozᴜ ani azi ngazᴜ Mungu dri erini lelerile, inzita pisi rᴜta be; 29te Mungu amaniri ovᴜ aci afa vepiri'i.

will be added

X\