EBRANIANI 11

1A'ita ovᴜ e'yo amani tele asi tezasi 'diyi ma adari'i, azini vini e'yo amani ndrele kᴜ 'diyi ma e'yo ecezᴜri'i. 2Te ama a'bipi 'wara 'diyini ovᴜle a'ita berisi, nze ndra e'yo yini ma eti onyirᴜ. 3A'itasi ama ni 'bu pi nyaku be ovᴜ ndra 'bazarᴜ e'yo 'yoza Mungunisi, 'dini afa 'bani ndrele 'diyi ovᴜni ndra 'bazarᴜ afa yi e'dapi 'ba ma milia 'diyisi kᴜ. 4Aitasi Habili fe Mungu dri edeta onyirᴜ tᴜ aga Kaininiri ra, e'yo nderisi nze e'yo erini ma eti kini eri ovᴜ kililirᴜ, Munguni e'yo eti nzeria afa feza erini ma e'yosi; e'yo 'dirisi erini draria 'bo ti, eri e'yo olᴜ 'dani. 5A'itasi 'du Enokani 'bua uru, eri ma ndre dra kᴜ beni; yi isuni eri kᴜ, a'disikᴜ Munguni eri 'dule 'borisi. Te de nga 'duni eri kᴜ, nze e'yo erini ma eti kini eri fe ayiko Mungu dri ra. 6Te a'ita kokorᴜ econi 'bani ayiko fezarᴜ eri dri kᴜ. A'disikᴜ 'ba emupi Mungu vᴜri ma a'i kini eri indi, azini eri adri orodri fe 'ba eri ndrupi 'diyi dri. 7A'itasi Noa, Munguni e'yo 'bani ndrele nga kᴜ 'diyi eceria eri dri, 'ba i asi e'yo nde ma dria, ede maburu ori'ba ini opazᴜ; a'ita 'dirisi eri 'ba e'yo liza nyaku ma dria, azini eri ofᴜ ovᴜzᴜ 'ba e'yo kililirᴜ 'bani isule a'itasiri nyapi awitarᴜrirᴜ. 8A'itasi Iburahimu, Munguni eri omveria, eri ra, mu angᴜ azini erini ngale a'ile awitarᴜria; eri fᴜ ra, te nini i mu ngoleari kᴜ. 9A'itasi eri ovᴜ ndra ani'borᴜ angᴜ azile eri driri ma alia, ekile angᴜ ovᴜpi erinirᴜ kᴜri ma aliarile, eri adri ndra ovᴜ hema ma alia tualᴜ Isaka pi be Yakobo pie, yi 'ba aziza nde a'ipi awitarᴜ tualᴜ eri be 'diyi. 10Te eri nda ndra aku ovᴜpi eti be, Munguni sile azini 'baleniri'i. 11A'itasi Sara ma ngᴜlᴜpi isu okpo ori tizᴜ, eli erini ka aga 'bo ti, erini a'ile 'ba aziza azipiri ovᴜ 'ba adarᴜrisi. 12E'yo 'dirisi engazᴜ agupi alᴜ ovᴜpi ekile 'ba drapi 'borileri ma alia, a'bianzi ezᴜ karakaraᴜ ekile 'bi'bio 'bua 'diyile, azini ekile cinya miri tiarile lakokorᴜ. 13'Ba 'diyi odra dria a'ita alia, de nga yi isuni aziza nde 'diyi ma e'yo kᴜ, te yi ndre yi engazᴜ ziri, nga yI zI ci ci ayIkosi, e'da kini yi ovᴜ ani'barᴜ azini 'ba emuza nyakua 'diyi. 14Te 'ba e'yo 'yopi 'dinile 'diyi ece kini yi ndru angᴜ yi ma ngᴜlᴜpinirᴜ. 15Te yi ka ndra asisile 'ba angᴜ yini kᴜleri ma e'yo egazᴜ, te'do yi isu pari mvIzᴜ 'bo. 16Te di curu'do yi angᴜ onyirᴜ agapi rari ndru avasi, 'di angᴜ 'buarii. E'yo 'disi Mungu ovᴜni drinzasi 'bani i omvezᴜ Mungu yinirᴜrisi kᴜ, 'dini erini aku edele yi dri 'borisi. 17A'itasi Iburahimu, erini ovᴜria o'bizarᴜ, eri fe Isakani edetarᴜ, adarᴜ 'ba aziza a'ipi avasi 'bori fe i mvi tile alᴜ ilipilirᴜri edetarᴜni; 18eri 'ba Munguni e'yoni 'yole eri ma e'yosi kini, Ori mini nga ovᴜ omvezarᴜ Isaka ma aliari'i. 19Eri a'i kini Mungu eco eri engazarᴜ, ka tro 'ba draza ma eselia ti; te adarᴜ eri isu eri dika ecetarᴜ ekile 'ba engapi 'ba draza ma eseliarile. 20A'itasi Isaka fe asi ndriza Yakobo pi dri Esau be, e'yo ngapi ecapi ndo 'diyisi. 21A'itasi Yakobo, erini 'yeria draria, fe asi ndriza anzi Yusufuni dri alᴜ alᴜ, azini eri inzi Mungu, erini i atiria lote ini ma dria. 22A'itasi Yusufu, ewu erini drazᴜri ka eca ogogo 'bo, eri olᴜ e'yo Israeli anziyini fᴜzᴜri, azini eri fe azita fala ini ma e'yosi. 23A'itasi 'ba Musani tipi 'diyi, erini osiria, ozi eri mba na, yini ndrele eri ovᴜ odekᴜa ndrizarᴜrisi ; yi rᴜni azita opini kᴜ. 24A'itasi Musa, eri ka zo 'bo, leni 'ba ma omve i Farau zi ma mvirᴜ kᴜ; 25eri pe ini inzata isuzᴜ 'ba Munguni be tualᴜ, aga ovᴜzᴜ ayiko isule ewu were e'yo onzisiri beri ra. 26Eri la drinza isule Kristosiri ovᴜzᴜ lonyi amborᴜ aga afa onyirᴜ Misiria 'diyi ra, te eri lu orodri Munguni ngale ofeleri vᴜ. 27A'itasi eri kᴜ Misiri ra, rᴜni adra opini kᴜ; te eri ovᴜ okporᴜ 'dani erini Mungu 'bani ndrele kᴜri ndrele rarisi. 28A'itasi eri 'ba omu agaza 'ba drilesiri pi ari oyaza be, 'ba amuruaanzi dri japiri ma elo yi rua kᴜ beni. 29A'itasi yi zo Miri Ekarᴜri ra, ekile angᴜ a'wirᴜ ma driarile; te 'ba Misiria 'diyini o'biria zoria, miri emvᴜ yi ra, odra ra. 30A'itasi abi kalirᴜ Yerikoari asᴜ i va, 'ba ka aci yi ma ageia o'du pale aziri 'bo. 31A'itasi okᴜ awuoᴜrᴜ Rahabu jani dri 'ba e'yo eripi kᴜ 'diyi be tualᴜ kᴜ, erini 'ba angᴜ ma orile gapi 'diyi a'ile asi anzurᴜsirisi. 32Ma nga drinia e'yo ngonini 'yo ya? Etu ngani dri fu ma dri kᴜ, ma ka e'yo Gideoni pini olᴜ, Baraki pie, Samisoni pie, Yefeta pie, Daudi pie, Samueli pie, 'ba nabirᴜ 'diyi pie dria 33a'itasi yi aga opi nyaza 'diyi ombasi ra, yi 'ye e'yo kililirᴜ, yi isu e'yo aziza, yi bi kami 'diyi ma tile ci, 34yi inyu okpo acini, yi opa yi sei ma sia, yi o'ba yi okporᴜ yini de ovᴜria okpo kokorᴜria, yi ovᴜ okpo be omba ma alia, yi odro juru yi otipi ombaa 'diyi ra. 35Okᴜ yi isu 'ba yini odrapi 'bo 'diyini engaria dika. Oco 'ba azini 'diyi kai, te yi a'ini 'ba ma trᴜ yi kᴜ, yi ma a'i ani engata agapi rari beni. 36'Ba azini 'diyi isu cota, kali pisi nini be, ovᴜ vini ombezarᴜ 'bazarᴜ arujoa indi. 37O'be yi onisi, asi yi sosi, o'bi yi ra, ofu yi seisi; yi aci saarᴜ kabilo enyi be ruaa, azini ndri ma enyi be, yi ovᴜ afa kokorᴜ, inza yi ra, 'ye yi onzi ra 38nyaku 'dori ma onyi funi dri onyi yiniri be kᴜ—yi aci saarᴜ roko dria, azini oni dria, oni gᴜle pi ma alia, 'bile nyakua 'diyi be. 39Nze 'ba 'diyi dria ma e'yo eti onyirᴜ a'ita yinisi, te yi isuni aziza ma e'yo kᴜ, 40Munguni afa onyirᴜ agapi rari edele drio amasirisi, 'dini yi ma ovᴜ 'bazarᴜ ovᴜzᴜ fudri ci ama kokorᴜ kᴜ.

will be added

X\