GALATIAA 6

1Adripi, 'ba azini ka e'de ezata ma alia, emi ovᴜpi Orindi be 'diyi ma omvi 'ba 'dinile 'diri kililirᴜ asi afᴜ kokorᴜrisi. Mi ma ngᴜlᴜpi ma ovᴜ vini mile be, kazᴜ muzᴜ mi obezᴜ indi kᴜ. 2Emi o'du emi agyi ma e'yo nzizarᴜ 'diyi emi eselia, 'dini emi nga azita Kristoni 'ye 'yeke ani. 3'Ba azini ka ega i 'ba amboni, de eri 'ba tokoni, eri i ma ngᴜlᴜpi ici'i. 4'Ba dria alᴜ alᴜ ma o'bi 'yeta i ma ngᴜlᴜpiniri oko, 'dini eri nga ovᴜ e'yo i ipizᴜri be i ma ngᴜlᴜpisi a'dule, te 'ba azi ma e'yosi kᴜ. 5A'disikᴜ 'ba dria alᴜ alᴜni nga e'yo nziza i ma ngᴜlᴜpiniri 'du i'i ceni. 6'Ba imbale e'yo Mungunisiri ma eci ti 'ba i imbapiri be afa onyirᴜ ma fezasi dria. 7Emi ici emi kᴜ; 'ba econi Mungu 'bazarᴜ aparakarᴜ kᴜ, afa ngoni ngori aguni rileri, 'di afa erini ngale loleri'i. 8'Ba afa ripi i ma rᴜasiri nga ruasi dri jaza lo'i; te 'ba afa ripi Orindisiri nga Orindisi idri 'dani 'daniri lo'i. 9Ama ma ande azi onyirᴜ ma 'yezasi kᴜ, a'disikᴜ ewuni ka eca ra ama nga afa lo ra, ama ka ande kᴜria. 10'Dini amani pari isuria, ama ma 'ye onyirᴜ 'ba dria vᴜ, agapiri ori'ba a'ita be 'diyi vᴜ. 11Emi ndre ma si waraga emi vᴜ nukuta 'wara 'wara 'diyisi ma ngᴜlᴜ-pi ma drisi ma'i. 12'Ba dria lepi e'dapi onyirᴜ ruasi 'diyi, yi omi emi agele lizᴜ, te lᴜ yi kazᴜ inzata isuzᴜ pati alaza Kristonisi kᴜ beni. 13Te 'ba agele lile ra 'diyi mbani azita ma ta yi'ini kᴜ, te yi le emi ma li agele yi ma ipi yi afᴜsi rua eminisi ani. 14Te ma ma ipi ma afᴜsi alᴜni kᴜ pe lᴜ pati alaza Opi amani Yesu Kristonirisi a'dule, pati alaza nderisi ma vᴜrisini di nyaku 'bo, nyaku vᴜrisini di ma indi. 15Te agele lizᴜri pi agele lizᴜ kᴜri be yi iri tro afa toko, te lᴜ 'ba 'bazᴜ o'dirᴜri'i. 16'Ba dria acipi azita 'di vᴜsi 'diyi, asi anzurᴜ pi ma ovᴜ yi vᴜ yiki be, azini 'ba Israelini Mungu vile 'diyi vᴜ. 17Engazᴜ curu'do 'ba alᴜni ma ecandi ma kᴜ; a'disikᴜ mani acile nyibeleko Yesuni be ma ruaarisi. 18'Yeta anzutiri Opi amani Yesu Kristoni ma ovᴜ orindi emini be, adripi. Amena.

will be added

X\