GALATIAA 4

1Te ma 'yo 'dini, karimvani ovᴜzᴜ nga mvarᴜrisi eri coni i esele ati'bo be ndᴜ ndᴜ kᴜ, ka tro ovᴜ afa dria ma opirᴜni ti ; 2te eri ovᴜ 'ba eri ma agei tepi 'diyi pi ma palaa 'ba afa ta mbapi 'diyi be, de nga ewu eri ma atini peleri ecani kᴜ. 3'Dinile ama'i indi, amani de ovᴜria anzirᴜ ama ovᴜ ndra ati'borᴜ e'yo drio nyakuni 'diyi ma palaa. 4Te ewu ka eca fu dri 'bo, Mungu pe Mvi ini ma ti osizarᴜ okᴜ dri, osizarᴜ azita ma palaa, 5eri ma onze 'ba ovᴜpi azita ma palaa 'diyi ani, ama ma isu e'yo ama 'bazᴜ anzi erinirᴜri beni. 6Te emini ovᴜle anzinirisi, Mungu pe Orindi i ma Mviniri ma ti ama asia, wᴜzᴜ kini, Aba, efini Ata'i. 7'Dini curu'do mi ovᴜni ati'borᴜ 'dani kᴜ, te mvani; te mi ka ovᴜ mvani, mi di 'ba awᴜrᴜso isupi Mungusiri'i. 8Ewu 'dasi emini ndra Mungu niria kᴜria, emi ovᴜ ndra ati'barᴜ adroᴜ ovᴜpi mungurᴜ kᴜ 'diyi ma palaa; 9te curu'do emini Mungu niria 'boria, te agapiri Munguni emi niria 'bo, emi asi vile dika e'yo drio okpo kokorᴜ azini aliorᴜ 'diyi vᴜ, emini lezᴜ ovᴜzᴜ ati'borᴜ yi dri dika, ngoni ngoni ya? 10Te emi o'du pi inzi, mba pie, ewu pie, eli pie dria! 11Ma ovᴜ urisi emisi, kani ma inza ma emisi toko yani. 12Ma matᴜ 'ba emi vᴜ, adripi, emi ma ovᴜ mani ovᴜlerile, a'disikᴜ mani ovᴜle emilerisi. Emi 'yeni ndra ma vᴜ onzi alᴜni kᴜ; 13te emi ni ra kini ma olᴜ ndra e'yo bari emi tia okorisi ma ruani ovᴜle okpo koko-rᴜrisi; 14te ka tro ndra e'yo ma ruaari o'bi emi o'bi o'bi ti, emi 'bani ma edematararᴜ kᴜ, emi onzoni ma kᴜ, te emi a'i ndra ma ekile malaika Mungunirile, ekile Kristo Yesule. 15Ayiko ndraka emini emi omvezᴜ drilebarᴜri curu'do ngoa ya? Te ma 'ba e'yo emini ma eti nzepiri kini, ka ndra 'ye 'di eco rani, emi 'ye ndra emi mileefi nze fezᴜ ma dri. 16Ma eca di ari'bo eminirᴜ, mani e'yo adari olᴜle emi tiarisi ya? 17Yi nda emi avasi ra 'bo, te de e'yo onyirᴜsi kᴜ; te yi le emi ti li kᴜ amve, emi ma nda yi avasi beni. 18Te 'ba ka emi nda avasi e'yo onyirᴜsi etuzu 'yeke, te ma ovᴜ lᴜ mani ovᴜria emi be indirisi ka a'dule kᴜ. 19Anzi nyiri nyiri mani, mvaazo 'ye ma dika emisi de nga Kristo 'bani i emi alia kilili kᴜ! 20Ma ka te ovᴜ curu'do emi be indi, o'duko mani ojazᴜ, 'yeke tᴜ, a'disikᴜ ma nini ma ma 'ye emisi ngoni yari kᴜ. 21Emi olᴜ ma tia, emi lepi ovᴜpi azita ma palaa 'diyi, emi erini azita nde kᴜ ya? 22Te eri ovᴜ sizarᴜ kini Iburahimu ovᴜ agianzi be iri, alᴜri zamva ati'borᴜrini, aziniri okᴜ karirᴜrini. 23Te yi ti mva zamva ati'borᴜrini e'yo ruanisi, te mva okᴜ karirᴜriniri e'yo azizanisi. 24E'yo 'diyi yi ecetarᴜ: okᴜ iri 'diyi yi aziza iri. Alᴜri engapi oni Sinaia, anzi otizᴜ ati'barᴜri; 'diri Hagari'i. 25Hagari nde eri oni Sinai Ara-buaari'i; sirᴜ kile Yerusalemu curu-'dorile, a'disikᴜ yi anzi ini be ati'barᴜ. 26Te Yerusalemu ovᴜpi ururi eri karirᴜ, eri ama andri'i. 27Te eri ovᴜ sizarᴜ, Mi ma ovᴜ ayikosi, mi okᴜ ondorᴜ mva tipi kᴜri la; mi oyᴜ uru, mi otre, mi mvaazoni e'dule kᴜri'i ; a'disikᴜ okᴜ kᴜle andrᴜari ma anzi yi kakaᴜ aga okᴜ agupi berini 'diyi ra. 28Te ama'i, adripi, ama anzi azizani ekile Isakale. 29Azini ekile etu 'dasi 'ba tile e'yo ruanisirini 'ba tile Orindisiri inzalerile, eri ovᴜ 'dinile curu'do. 30Te e'yo siza 'yo ngoni ya? Kini, Mi dro zamva ati'borᴜri pi mvi be amve; te zamva ati'borᴜri ma mvi ma nya awᴜrᴜso tualᴜ okᴜ karirᴜri ma mvi be alᴜni kᴜ. 31Ka'dinile, adripi, ama ovᴜni zamva ati'borᴜri ma anzi kᴜ, te okᴜ karirᴜri ma anzi.

will be added

X\