GALATIAA 1

1Paulo 'ba ti peleri—ti pezaniri engani 'ba vᴜ kᴜ, ovᴜni geri 'ba vᴜrisi kᴜ, te Yesu Kristosi, azini Mungu Ata eri engapi 'ba draza eseliarisi indi— 2adripi dria ovᴜpi ma be 'diyi pie, Kanisa Galatiaa 'diyi vᴜ: 3'Yeta anzutiri pi ma ovᴜ emi vᴜ asi anzurᴜ be engazᴜ Mungu Ata pi vᴜ Opi Yesu Kristo be, 4eri fe i ngᴜlᴜpi azi onzi amanisi, eri ma onze ama ewu onzi curu'dori ma alia beni, ekile Mungu ama Atani lelerile; 5diza ma ovᴜ eri vᴜ ewu vᴜsi ewu vᴜsi. Amena. 6Ma osu tᴜ emini emi ojale mbelerᴜ 'doni, 'ba emi omvepi 'yeta anzutiri Kristoni ma aliari kᴜzᴜ, e'yo barᴜ andiniri a'izᴜ 'dinirisi— 7eri andini yo, te 'ba azini emi asi ezapi 'diyi indi, yi le e'yo barᴜ Kristoniri ojazᴜ ndᴜ. 8Te ka tro ama'i, kani malaika 'buari ti, ka e'yo barᴜ andini olᴜ emi tia pe lᴜ kiri amani olule emi tia 'bori'i, eri ma ovᴜ trizarᴜ. 9Ekile amani 'yole oko 'borile, ma 'yo dika curu'do 'dini, 'Ba azini ka e'yo bari ma andi olᴜ emi tia'i, ka ovᴜ emini a'ile 'bori'i kᴜ, eri ma ovᴜ trizarᴜ. 10Curu'do ma le 'ba ma inzi ma, kani ma le Mungu ma inzi mani ya? Kani ma o'bi ayiko fezᴜ 'ba dri ya? Ma ka te ayiko fe 'ba dri 'dani, te'do ma ovᴜni ati'bo jeza Kristoni kᴜ. 11Te ma fe emi ma ni, adripi, kini e'yo bari mani olᴜleri engani 'ba vᴜ kᴜ. 12Ma a'ini eri 'ba vᴜ kᴜ, 'ba ada imbani mani eri Onizᴜni kᴜ indi, te Yesu Kristo ece eri ma dri ecetasini. 13Te emi eri adriza ndra mani inzita 'ba Yahudini ma aliari ma e'yo 'bo, kini ma adri ndra kanisa Munguni inza aga ra, ma eza eri ra; 14azini kini inzita 'ba Yahudini ma alia, ma aga agyi mani ovᴜzᴜ yi be anziazirᴜ suru mani ma alia 'diyi kakaᴜ ra, azita ama a'bipini idrile 'diyi ma avani ma vale tᴜ tᴜrisi. 15Te o'du Mungu ma pepi ndᴜ engazᴜ ma andri ma opojoa, ma omvepi 'yeta anzutiri erinisirini 16lezᴜ Mvi erini ecezᴜ ma alia, ma ma olᴜ ani e'yo bari erini 'ba Jururᴜ ma eselia benirisi, o'du 'dasi coti ma ecini ti e'yo nzezᴜ 'ba rua ari beri be kᴜ, 17ma tuni vini Yerusalemua 'ba ovᴜpi ti pelerirᴜ ma drilia oko 'diyi vᴜ kᴜ indi, te ma fᴜ mu Arabua ; ma nga emvi dika Damasikia ndo. 18Vilerisi, eli na ma vᴜtia, ma nga tu uru Yerusalemua Kefani nizᴜ, ma nga ovᴜ eri be o'du mᴜdri drini towi. 19Te ma ndreni 'ba ti opele 'diyi ma azini alᴜni kᴜ, pe kiri lᴜ Yakobo Opi ma adri'i. 20(Mi ndre, Mungu ma milia, ma lini inzo e'yo mani sile emi vᴜ 'diyisi kᴜ!) 21Vᴜtinia ma mu angᴜ Suria pi ma ageia Kilikia beria ndo. 22Te kanisa Yudiaa ovᴜpi Kristo ma alia 'diyi nini ndra nga ma mile kᴜ; 23yi eri kiri bilesi a'dule kini, 'Ba ndra ama inzapiri, eri curu'do a'ita ndra erini ezaleri ma e'yo olᴜ'i. 24Yi fe diza Mungu dri e'yo manisi.

will be added

X\