EFESOA 1

1Paulo 'ba Kristo Yesuni tini pele e'yo Munguni lelenirisiri, 'Ba alatararᴜ Efesoa ovᴜpi asi ada be Kristo Yesu ma alia 'diyi vᴜ: 2'Yeta anzutiri pi ma ovᴜ emi vᴜ asi anzurᴜ be engazᴜ Mungu Ata amani pi vᴜ Opi Yesu Kristo be. 3Mungu Opi amani Yesu Kristo ma Ata ma ru ma ovᴜ inzizarᴜ, eri'i asi ndriza orindini 'diyi dria fepi ama dri Kristo ma alia angᴜ 'buariari'i; 4eri ope ama eri ma alia de nga eri 'bani nyaku ma eti kᴜ, ama ma ovᴜ ani alatararᴜ azini e'yo kokorᴜ eri ma milia letasi. 5Eri 'ba ndra ama ndᴜ ovᴜzᴜ anzi i ma ngᴜlᴜpinirᴜ Yesu Kristosi, ekile e'yo ovᴜpi onyirᴜ eri ma milia erini lelenirile, 6amani ngazᴜ ani inzita fezᴜ 'yeta anzutiri erini dizarᴜ, erini fele ama dri avasi 'Ba Leleri ma aliari dri. 7Eri ma alia ama ovᴜ onzeza amani eri ma arisiri be, ezata amani wuzᴜ, ekile 'yeta anzutiri erini ma lonyini ovᴜle amborᴜrile; 8eri fe 'yeta anzutiri nderini ezᴜzᴜ ama vᴜ tᴜ, ondᴜa driasi e'yo vaza be, 9fezᴜ amani e'yo erini leleniri ma e'yo vale kᴜ zizarᴜri nizᴜ, ekile e'yo ovᴜpi onyirᴜ eri ma milia, erini egale drio Kristo ma alia 'yezᴜrile, 10ewunini nga-ria caria 'yekeria eri ma okᴜ afa dria tualᴜ Kristo ma alia, afa 'bua 'diyi pi afa nyakua 'diyi be dria eri ma alia. 11Te eri ma alia indi ama ofᴜ ovᴜzᴜ eri ma yilarᴜ 'bo, erini ama opele drio ekile eri'i e'yo dria 'yepi ini egale onyirᴜrilerini lelerile, 12'dini ama 'ba asi 'bapi a'itasi Kristo dria oko 'diyi ma fe ani 'bani inzita fezᴜ diza eriniri dri beni. 13Eri ma alia, emi alᴜ indi, yi ebi eceta emi 'ba e'yo adaniri—'di bani e'yo barᴜ emi pazᴜ 'diri—eripi Kristo a'ipi ra 'diyi ma ruaa, Orindi Alatararᴜ erini azile fezᴜrisi. 14Orindi nderi eri ekile afa kᴜle toborᴜ awᴜrᴜso amani ma e'yosi de nga onzeni afa nde ma ada kᴜrile, inzita fezᴜ diza eriniri dri. 15E'yo 'disi ma'i indi, ma ka a'ita emini Opi Yesu ma aliari pi ma e'yo eri, leta emini 'ba alatararᴜ 'diyi vᴜ driari be 'bo, 16ma kᴜni awa'difo 'yozᴜ emisi kᴜ, mani e'yo emini egaria zita mani ma alia, 17Mungu Opi amani Yesu Kristoni, Ata diza-rᴜri, ma fe emi dri orindi ondᴜani azini e'yo e'dazani, nita eri nizᴜri ma alia, 18te de eri fe diza mile emi asia 'diyi dri 'bo, emini ani e'yo teza omveta eriniri pi ma e'yo nizᴜ, awᴜrᴜso erini dizarᴜ 'ba alatararᴜ 'diyi ma aliari ma lonyi pie, 19okpo erini amborᴜ tᴜ agapi dria ra 'ba eri a'ipi 'diyi vᴜri pie, ekile okpo erini e'yo 'yezᴜrini 'yele okporᴜ, 20erini 'yele ani okposi Kristo ma alia, erini eri engaria 'ba draza ma eselia, eri fezᴜ rizᴜ va i ma dri ndiria angᴜ 'buariarile. 21Te eri fe eri ma ri va dri ceza opirᴜri pi ma drilia dria, ecoza pie, okpo pie, opi nyaza pie, azini ru dria 'dale ewu 'dorisi 'diyi pie a'dule kᴜ, te ru ngale 'dale ewu ecapirisi 'diyi pie indi; 22eri o'ba afa dria eri ma palaa va, eri fe erini ovᴜzᴜ afa dria ma drilia kanisa ma drirᴜ; 23kanisa nde ovᴜ eri ma rua, gaza tre eri'i afa dria gapi tre e'yo driasiriniri'i.

will be added

X\