YETA 3

1Te Petero pini turia hekalua Yohana be etu oromi 'bani adrizᴜ Mungu zizᴜrisi, 2isu de 'ba yi agu andrini osile acozarᴜri eji, yini adrile 'bale jotile hekaluni 'bani omvele Ndrizarᴜria, afa a'izᴜ 'ba fipi hekalua 'diyi driri'i. 3Eri ka Petero ne Yohana be yini 'yeria firia hekalua, eri a'i afa yi dri. 4Te Petero ndre eri okposi tualᴜ Yohana be, eri ‘yora, Mi lu ama vᴜ. 5Eri 'ba mile ini yi vᴜ, ega i nga afa isu yi dri ra. 6Te Petero 'yo, Dahabu kani mele ma dri yo, te afa ovᴜpi ma vᴜri ma fe mi dri; ru Yesu Kristo Nazaretiarinisi, mi nga, mi aci. 7Eri bi dri ndi erini, enga eri uru; coti pa erini pi isu okpo kirima ma fala be. 8Eri enga mbelekocici, eri so pa, 'ba aci aci; eri fi tualᴜ yi be hekalua, acizᴜ azini ombᴜ-zᴜ azini Mungu inzizᴜ. 9'Ba dria ndre eri, erini aciria azini Mungu inziria; 10yi ni eri ra, eri 'ba adripi afa a'ipi Jotile Ndrizarᴜ hekaluni ma aliari; yi adri titi azini osuta be tᴜ e'yo i 'yepi eri ruaarisi. 11Erini Petero pi biria Yohana be, 'ba dria yi nzᴜ tualᴜ yi vᴜ jobi-leko 'bani omvele Sulemaniniri ma etia, yi osu tᴜ. 12Te Petero ka e'yo 'di ndre, eri omvi e'yo 'ba nde 'diyi vᴜ kini, Emi agupi Israelini, emi ovᴜ osuta be 'dini a'disi ya? Emi ama ndre okposi a'disi ya, emini osuria okpo amani kani onyi amani fe acizᴜ agu 'diri drini ya? 13Mungu Iburahimuni azini Isakani azini Yakoboni, Mungu ama a'bipi-niri fe diza Mva erini Yesu dri; eri'i emini fele, emini gale Pilato ma miliasi etu erini 'yezᴜ eri trᴜzᴜrisiri. 14Te emi ga 'Ba Alatararᴜ Kililirᴜ Onyi beri si, emi a'i okposi Pilato ma trᴜ 'ba 'ba fupiri ra, 15emi fu idri E'ini ra, Munguni engale 'ba draza ma eselia, amani ovᴜzᴜ 'ba eri ma e'yo eti nzepi 'diyirᴜri'i. 16Ru erini a'ilerisi, ru eriniri fe okpo 'ba nde emini nele azini nile 'dori drini; a'ita Yesu a'izᴜri fc 'ba 'diri dri rua alarᴜ tᴜ emi dria ma milia. 17Te di, ma adripi, ma ni ra emi 'ye e'yo 'diri aniakosi, opi emini 'ye'dini indi. 18Te e'yo Munguni ndra ondrile nabi dria ma tisi kini Kristo erini ma nya candiri, Mungu fe e'yo nde ma eca 'dinile 'yeke. 19E'yo 'disi emi ma oja emi asi ovᴜzᴜ 'ba ndᴜrᴜ, 'dini emi nga ojita isu e'yo onzi eminisi, azini ewu emi asi omvizᴜ engapi Opi ma driliari ma nga eca beni; 20'dini indi eri ma pe Kristo ndra erini pele okokele emi driri ma ti, eri Yesu'i. 21Eco 'bu ma a'i eri cazᴜ ewu afa driani yi 'yezᴜ 'yeke ekile ndra Munguni 'yole 'ba alatararᴜ erini nabirᴜ 'diyi dria ma tisi engazᴜ nyaku eti 'bazᴜriarile. 22Musa 'yo ada, Opi Munguni nga nabi ofᴜ emi eselia ekile erini ma ofᴜlerile; emi ma eri eri ma ti e'yo dria erini ngale 'yole emi tia 'diyisi. 23Te 'ba dria e'yo nabi nderini 'yoleri eripi kᴜ 'diyi nga ovᴜ dri jazarᴜ 'ba ma eseliarisi ra. 24Adarᴜ nabi dria e'dozᴜ Samuelisi azini eri ma vᴜtia 'diyi 'yo 'dinile, yi ece e'yo yi 'yepi ewu 'dorisi 'diyi. 25Emi ovᴜ anzi nabini azini azizani, aziza nde Munguni azile emi a'bipi tia, erini 'yoria Iburahimu tia kini, A'bianzi mini alia ori'ba dria wudrikuruni 'diyi nga ovᴜ drileba be. 26Munguni Mvi ini engazᴜ dra ma alia 'boria, eri pe eri ti emi vᴜ okokele, emi dri drileba fezᴜ, emini emi ojazᴜ dria e'yo onzi emini kᴜzᴜ.

will be added

X\