YETA 28

1Amani ama paria 'boria, ama isu angᴜ nde i lipi miriari ma ru ovᴜ Melita. 2Juru yi ko ama aza onyirᴜ tᴜ ekile 'bani 'yele zuzu kᴜrile, edᴜ aci ra, a'i ama dria, a'disikᴜ ozooni 'dile angᴜ ambiza berisi. 3Te Paulo ka eja owu 'bo, 'ba aci dria, 'boroa efᴜ acisi, ombe i drinia, ga eri ra. 4Juru 'diyi ka ndre urini i 'iria eri ma dria kelerᴜ, yi 'yo yi ma eselia, Inzo yo agu 'diri 'di 'bani ada. Erini i pazᴜ miri alia rari ti, e'yo liza kililirᴜri a'ini eri ma ovᴜ idrirᴜ kᴜ. 5Te eri ya uri nderi acia, 'yeni eri onzi kᴜ. 6Yi te eri rᴜani piria, kani erini e'dezᴜ va drazᴜ mbele; ka te izᴜ ti, ka ne e'yo 'yeni eri onzi kᴜ, yi oja yi asisile, 'yo ra eri ovᴜ mungu azini yani. 7'Ba amborᴜ angᴜ i lipi miria nderiari, runi Pubulio'i, angᴜ erini ovᴜ ogogo pari nderia. Eri a'i ama wa'dirᴜ asi ndrizasi, lazᴜ o'du na. 8Eri ovᴜ 'dinile, Pubulio ati ovᴜ azo be arika sᴜzᴜ arirᴜ rua driza be ; Paulo fi vᴜnia, zi Mungu tia, 'ba dri drinia, ati eri ra. 9E'yo 'diri ka i 'ye 'bo, 'ba azini azo be angᴜ i lipi miria ndeari 'diyi emu ra, eri ati yi ra. 10Yi fe ama dri inzita tᴜ; ama ka dri ko zozᴜ, yi o'ba afa amani lele 'diyi ogᴜrᴜ alia kakaᴜ. 11Mba na ka aga ra, ama fi oguru Alegezandariani alia zozᴜ; isu de ogurᴜ nderi te angᴜ i lipi miria nderia mba egbeni 'diyisi; eceta erini ovᴜ Agupianzi Ejorᴜ. 12Ama ca Surakusaa, la 'daa o'du na. 13Engazᴜ 'dale ama zo goligolirᴜ cazᴜ Regioa; o'du alᴜ ka aga ra, oli onyirᴜ enga alazarᴜ, o'du iririsi ama ca Puteolia. 14'Dale ama isu adripi, yi omi ama ovᴜzᴜ yi be o'du aziri. 'Dini ama ca Rumia ndo. 15Adripi nde ka ama e'yo eri 'bo, yi nga 'dale emuzᴜ dri fuzᴜ ama be, ecazᴜ kpere pari Apioni 'bani afa jezᴜria, azini Omujo Na 'Diyia. Paulo ka yi ndre 'bo, eri fe awa'difo Mungu dri, asini isu okpo. 16Ama ka fi Rumia, yi fe Pauloni la a'dule, asikari eri ma agei tepiri be. 17Eri eca 'dini, o'du na ka aga ra, eri omve 'ba ambo 'ba Yahudini drilia 'diyi yi okᴜzᴜ tualᴜ; yi ka yi okᴜ 'bo, 'yo yi tia, Ma adripi, ma 'yeni ndra onzi 'ba Yahudini vᴜ kani azita ama a'bipini vᴜ kᴜ, te ti, engazᴜ Yerusalemua fe ma arurᴜ 'ba Rumia 'diyi dri. 18Yi ka ndra e'yo mani li ra, le ma trᴜ ra, a'disikᴜ yi isuni e'yo onzi mani drazᴜri kᴜ. 19Te 'ba Yahudini ka ga si, e'yo 'di fe mani muzᴜ Kaisari vᴜ e'yo mani lizᴜni—te ma ovᴜni e'yo be suru mani esᴜzᴜ kᴜ. 20E'yo 'disi ma omve emi mani emi nezᴜ, e'yo 'yozᴜ emi be, a'disikᴜ asi teza Israelinisi ma ovᴜ ombezarᴜ anzirikᴜ 'dorisi. 21Yi 'yo eri tia, Ama isuni waraga engapi Yudiaa mi ma e'yo ecezᴜri alᴜni kᴜ, azini adripi ecani 'doa alᴜni kᴜ e'yo 'yozᴜ onzi mi ma e'yosi. 22Te ama le te e'yo mini egaleri eri mi tia ; te ama ni ra suruti 'dori ovᴜ o'dazarᴜ pari dri dria. 23Yi ka o'du pe eri dri ra, yi eca karakaraᴜ jo erini lazᴜria. Engazᴜ o'bitisi cazᴜ angᴜni biria ndrima ndrima 'dia 'di, eri ece yi dri suru Munguni ma e'yo, eri imba yi e'yo Yesunisi, iri tro azita Musani ma aliarisi. azini e'yo nabini silerisi. 24'Ba azini 'diyi a'i e'yo erini 'yoleri ra, 'ba azi 'diyi a'ini kᴜ. 25'Dini yini agata garia yi eselia ceni ceni, yi ko dri muzᴜ, Pauloni e'yo alᴜ 'di 'yoria 'boria: Orindi Alatararᴜ 'yo 'yeke emi a'bipi vᴜ nabi Isaya ma tiarisi, kini : 26Mi mu 'ba mani 'diyi vᴜ, mi 'yo 'dini, Erizarᴜni emi nga eri ra, te emi ngani va alᴜni kᴜ, nezarᴜni emi nga ne ra, te emi ngani ama kilili kᴜ. 27A'disikᴜ asi 'ba 'diyini eca osorᴜ tᴜ, bile yini ovᴜ dirinyarᴜ, obi yi mile 'bo; yi kazᴜ nezᴜ yi milesi kᴜ, yi kazᴜ erizᴜ yi bilesi kᴜ, yi kazᴜ e'yo nizᴜ yi asisi kᴜ, yi kazᴜ yi ojazᴜ dika mani yi atizᴜ kᴜ. 28E'yo 'disi emi ma ni ra, Mungu pe pata ini 'dori ma ti 'ba Jururᴜ 'diyi dri; yi'i yi nga eri ra. 29Eri ka e'yo 'diyi 'yo 'bo, 'ba Yahudini nga mvi yi vile, ri e'yo ozi yi ma eselia ceni ceni kakaᴜ. 30Eri la 'dale eli pi pi iri, i vile jo ini jeleniri ma alia, a'i 'ba dria ecapi eri vᴜ 'diyi, 31suru Munguni ma e'yo olᴜzᴜ, azini Opi Yesu Kristo ma e'yo imbazᴜ uri kokoru, te 'ba alᴜni ogani eri kᴜ.

will be added

X\