YETA 27

1Yi ka e'yo amani fizᴜ ogurua zozᴜ Italiaari li 'bo, yi fe Pauloni, 'ba arurᴜ azini 'diyi be, 'ba asikari tᴜrᴜ alᴜ enyati Augusitoni driliari dri, runi Yulio'i. 2Ama fi ogurᴜ Adramutioni 'yepi zopi aku miri tia Asiaa 'diyiari ma alia, ama ko dri zozᴜ miri alia. Arisitariko 'ba Makedoniani Tesalonikiari mu ama be. 3Dru 'dini ama ca Sidonia; te Yulio ovᴜ asi ndriza be Paulo vᴜ, fe geri eri dri sizᴜ muzᴜ agyi erini 'diyi vᴜ ande lizᴜ. 4Engazᴜ 'dale ama ko dri zozᴜ miri alia, ama aga zozᴜ Kuporo ma kalaa andralerᴜrisi, a'disikᴜ olini engale ama drilialerᴜ risi. 5Ama ka zo miri aliasi Kilikia pi ma eseliasi Pamfulia be 'bo, ama ca Mura aku Lukiaaria. 6'Dale 'ba asikari tᴜrᴜ alᴜ driliari isu oguru Alegezandariani muzᴜ Italia, te eri ofi ama alenia. 7Ama ka mu e'yere o'du kakaᴜsi, amani zoria ewarᴜ ama ca ogogo Kinidoa, te olini geri amani ogalerisi, ama aga zozᴜ Kirete ma kalaa andralerᴜrisi ogogo Salimonea. 8Amani zoria eri ma kalaasi ewarᴜ tᴜ, ama ca pari 'bani omvele Kuti Onyirᴜri, ogogo aku Lasearia. 9O'du kakaᴜ ka aga ra, zoza amanini ovᴜle ewarᴜ tᴜrisi, o'du nyaka 'dazᴜrini agale 'borisi, Paulo imba yi 10kini, Ma agupi, acita ogurusi 'dori nga eca onzi tᴜ, ogurᴜ pi afa alenia 'diyi pie ezazᴜ toko, ama ngᴜlᴜpi ma idri be. 11Te 'ba asikari tᴜrᴜ alᴜ driliari eri e'yo 'ba ogᴜru ti opipiri pini 'yole ogᴜru e'i beri, aga Pauloni 'yoleri ra. 12Kuti nderini ovᴜle onyirᴜ ogurᴜ dri ewu angᴜni ambizᴜrisi kᴜrisi, tᴜni 'ba kakaᴜ ega yini eri onyirᴜ fᴜzᴜ 'dia, yi nga te ca ani Foenikia ovᴜzᴜ 'dale ewu angᴜni ambizᴜrisi; eri kuti Kireteni, pari oli lipi abararᴜrini lizᴜ kᴜri. 13Oli engapi alazarᴜrini liria e'yere, yi ega yi eco 'yezᴜ yini lelerile, yi 'du afa oguru otizᴜ, yi aga Kiretea ogogo kutiasi. 14Ace were akuluku amborᴜ engapi amveri li yi ra, runi Eurakulo. 15Oli nderi ka oguru bi 'bo, ama econi tini opizᴜ olivᴜlerᴜ kᴜ, 'dini ama kᴜ ma dro ama ceni. 16Amani agaria angᴜ i lipi miri ma alia were omvele Kauda'iri ma kuti vᴜ ogogo, ama nga di ca o'bo bizᴜ ewasi ka; 17te ka eri ese uru 'bo, yi ayᴜ baka azakomarᴜ fezᴜ agazᴜ ogurᴜ ma etiasi, rᴜani ombezᴜ ci; te yini rᴜria kani yi nga ovᴜ 'bezarᴜ Suritisaa yani, yi trᴜ bongo olini ogurᴜ drozᴜri va, oli nga di ama dro tokorᴜ. 18Akuluku nderini ama drole okposirisi, dru 'dini yi 'ba afa ogurᴜni jile 'diyi o'be miria; 19drozi o'du nasi yi ngᴜlᴜpi ofᴜ afa ogᴜruni 'diyi, o'be yi drisi ceni. 20Etu pi 'bi'bio be ka asi di o'du kakaᴜ kᴜ, yi ombᴜpi olisirini ogᴜru oyaria tᴜ, vilerisi ama ega ama ngani di ama pa alᴜni kᴜ. 21O'du kakaᴜ yi ka nyaka nya kᴜ, Paulo so pa yi eselia, kini, Ma agupi, emi ka ndra e'yo mani 'yoleri eri ra, ka ndra angᴜ Kireteari kᴜ kᴜ, te'do emi isuni e'yo onzi 'dori, afa ezazᴜ toko 'doni kᴜ. 22Te curu'do ma emi imba, emi ma ovᴜ asi tezasi; a'disikᴜ 'ba emi eselia alᴜni ngani dra kᴜ, alᴜ oguruni drani. 23Te ini 'dorisi malaika Munguni so pa ma ageia, Mungu mani ovᴜzᴜ erini mani inzile azisi indiri, 24kini, Paulo, mi rᴜ kᴜ ; mi ma so pa Kaisari drilia; mi ne, Mungu fe 'ba mupi mi be 'diyi dria mi dri 'bo. 25'Dini, ma agupi, emi ovᴜ di asi tezasi. a'disikᴜ ma ovᴜ a'itasi Mungu vᴜ e'yoni nga i 'ye ekile te erini 'yole ma tia 'borile. 26Te ama ma nga ovᴜ 'bezarᴜ angᴜ azini i lipi miri ma aliari ma dria. 27Te ini mᴜdri drini suri ka eca ra, olirikoni ama drole 'dale 'dole miri Adria ma alia, iniayii 'ba ogurᴜ ma azi ngapi 'diyi ega yi eca angᴜ a'wi tia ogogo. 28'Dini yi 'ba yi ali o'bi, yi isu yi ali ovᴜ wu o'biza kali su; ka mu drile were yi 'ye dika, isu alini ovᴜ wu o'biza kali na. 29Yini ovᴜria urisi kani olirikoni nga ama o'be kata dria, yi o'be aya oguruni pa sozᴜ 'diyi su tro oguru ma ndulea, angᴜ atiza tezᴜ. 30'Ba oguru ma azi ngapi 'diyi o'bi apa ogurᴜ aliasi, isu yi osi o'bo yia 'bo, yi 'yo lokirisi yi nga aya oguruni pa sozᴜ 'diyi 'be ogᴜru ma drilialerᴜ; 31Paulo 'yo 'ba asikari tᴜrᴜ alᴜ driliari pi ma tia asikari be, 'Ba 'diyi ka ovᴜ oguru alia kᴜ, emi econi emi opazarᴜ kᴜ. 32Asikari yi nga di baka o'boni li, kᴜ eri 'de yia. 33Angᴜni 'baria atiria, Paulo 'ba matᴜ yi vᴜ dria nyaka nyazᴜ, kini, Andrᴜ o'du mᴜdri drini su emini tezᴜ ovᴜzᴜ nyaka nyakokorᴜ, afa aji o'bikokorᴜri'i. 34E'yo 'disi ma matᴜ 'ba emi vᴜ, emi nya nyaka fo; 'diri nga emi rᴜa aza ko, a'disikᴜ 'ba alᴜni ma dribiefi ngani avi alᴜni kᴜ. 35Erini 'yoria 'dini, eri 'du mikate, eri fe awa'difo Mungu dri 'ba dria milia, nyo eri, e'do nya oko. 36'Ba dria ma asi ovᴜ ayikosi, nya yini nyaka indi. 37Te ama dria ovᴜpi ogᴜru alia 'diyi, ama 'ba tᴜrᴜ iri kali aziri drini azia. 38Yi ka tra nyakasi 'bo, yi 'be anya yia ogᴜrᴜ ka mu nzi kᴜ. 39Te angᴜni atiria, yi nini angᴜ nderi kᴜ, te yi ne yioji azini cinya beri ; yi eci ti tualᴜ kani yi eco oguru nderi jizᴜ 'dale yani. 40Yi li aya oguruni pa sozᴜ 'diyi ma baka, kᴜ yi yia, yi ayᴜ baka pati oguru ti opizᴜ 'diyini; yi 'i bongo drilialerᴜ olini ogurᴜ drozᴜri uru dika, oli dro yi cinya nderi vᴜ. 41Te yini ecaria pari yi miri irini yi ecizᴜria, oguru sᴜ i ti cinya alia; oguru drile ebi i ci oyakokorᴜ, te nduni e'do i nyo, yi ombᴜzani eri fule okposirisi. 42Asikari yi le 'ba arurᴜ 'diyi ofuzᴜ, 'ba alᴜni kazᴜ yi sazᴜ apazᴜ kᴜ; 43te 'ba asikari tᴜrᴜ alᴜ driliari, erini leria Pauloni paria, eri oga e'yo yini lele 'yeleri si. Eri azi 'ba ecopi yi sapi 'diyi ma mbᴜ yia, ma ca amve okoni, 44te 'ba joloko acepi 'diyi ma zo bau dria, kani afa oguru vile azini 'diyi ma dria. Eri nga di eca 'dini, yi nga yi opa dria ca nyakua.

will be added

X\