YETA 25

1Te Fesito ka fi angᴜ ini nyaleri ma alia 'bo, o'du na ka aga ra, eri enga Kaisariaa muzᴜ Yerᴜsalemua. 2Kuhani amborᴜ 'diyi pi ambo Yahudini 'diyi be, yi esᴜ Pauloni eri vᴜ, zi eri tia matᴜsi, 3a'izᴜ eri dri asi ndriza erinisi eri ma pe Paulo ma ti Yerusalemua, a'disikᴜ yi le eri mba geria eri fuzᴜ. 4Te Fesito omvi yi tia yi Paulo ma agei te 'dale Kaisariaa, te ace were i ngᴜlᴜpini nga mu 'dale. 5'Dini, eri ‘yora, 'ba 'wara emi eselia 'diyi ma si mu ma be, agu nde ka ovᴜ e'yo onzi be, yi ma esᴜ eri. 6Eri ka ovᴜ yi ma eselia o'du agani aro kani mᴜdri kᴜ, eri si Kaisariaa; dru 'dini eri ri va ogᴜŋa e'yo lizᴜri dria, azi Pauloni ejizᴜ. 7Eri ka eca ra, 'ba Yahudini ibipi esipi Yerusalemua 'diyi oso pa eri ageia eri esᴜzᴜ e'yo onzi kakaᴜ nzizarᴜ 'diyisi, te yi econi e'yo nde 'diyi ma adani ecezarᴜ kᴜ. 8Pauloni e'yo i ma ngᴜlᴜpini nzeria, kini, Ma 'yeni onzi azita 'ba Yahudinini vᴜ, kani hekalu vᴜ, kani Kaisari vᴜ alᴜani kᴜ. 9Te Fesito, erini lezᴜ ayiko fezᴜ 'ba Yahudini dri, eri omvi e'yo Paulo tia kini, Mi le mu Yerᴜsalemua, 'dale mani e'yo mini lizᴜ ra ya? 10Te Paulo kini, Ma pa so ogᴜŋa e'yo lizᴜ Kaisariniria ; onyirᴜni eri ma li e'yo manini; ma 'yeni e'yo onzi 'ba Yahudini vᴜ alᴜni kᴜ, ekile mini nile onyirᴜrile. 11Ma ka te ovᴜ 'ba onzi 'yepiri, kani ma ka e'yo mani ecozᴜ drazᴜ rari 'ye, ma gani dra kᴜ; te e'yo yini ma esᴜzᴜri ka ovᴜ toko, 'ba alᴜni ecopi ma fepi yi ma driani yo. Ma le mani mu drile Kaisari vᴜ. 12Te Fesito ka e'yo 'yo 'ba e'yo lipi eri vᴜtia 'diyi be tualᴜ 'bo, eri omvi e'yo kini, Mi le mini mu Kaisari vᴜ 'bo; mi nga mu Kaisari vᴜ ra. 13Te o'du azini ka aga 'bo, opi ambo Agiripa eca Kaisariaa Berinike be, Fesitoni zizᴜ ci ci. 14Yini ovᴜria 'dale o'du kakaᴜ, Fesito olᴜ e'yo Pauloni opi nderi tia kini, 'Ba alᴜ Felikeni kᴜle 'doa arurᴜri indi; 15mani ovᴜria Yerusalemua, kuhani amborᴜ azini 'ba 'wara 'ba Yahudi-nini yi esᴜ eri ma vᴜ, yi zi ma tia e'yo erini lizᴜ eri ndezᴜ. 16Ma omvi e'yo yi tia 'dini, ama 'ba Rumini adrini 'ba alᴜni fe kᴜ, de nga 'ba nde yini esᴜleri otᴜni pa 'ba eri esᴜpi 'diyi be milia milia kᴜ, de nga eri isuni pari asᴜ 'bani sᴜle eri ruaari ma e'yo omvizᴜ kᴜ. 17E'yo 'disi yi ka yi okᴜ 'doa tualᴜ, ma teni kᴜ, te dru ma ri va ogᴜŋa e'yo lizᴜri dria, ma azi agu nderi ejizᴜ. 18'Ba eri esᴜpi 'diyi ka pa oso ra, esᴜni eri alᴜni ekile mani egale yi nga esᴜrile kᴜ; 19te yi ga agata eri be e'yo ndᴜ ndᴜsi geri yini adroᴜ yini nzizᴜ ri ma e'yosi, azini e'yo 'ba alᴜ Yesu drapi 'bo Pauloni 'yole eri idrirᴜri ma e'yosi indi. 20Te e'yo 'diyi ma efi ndazᴜrini ma ndelerisi, ma zi eri ma tia ka le mu Yerusalemua yi nga e'yo erini li 'dale. 21Te Pauloni zizᴜ ma tia 'ba ma mba i ma ta, i le ini muzᴜ e'yo ini lizᴜ Opi inzile tu agapi rari vᴜrisi, ma fe azita yini eri ta mbazᴜ ecazᴜ o'du mani ecozᴜ eri ti pezᴜ Kaisari vᴜria. 22Agiripa 'yo Fesito tia, Ma'i ma le te agu nderi eri alᴜ indi. Kini, Dru mi nga eri eri ra. 23'Dini dru Agiripa pi Berinike be eca inzita amborᴜ be, fizᴜ pari e'yo erizᴜria opi ambo asikarini 'diyi be, azini 'ba amborᴜ aku ambo ndea 'diyi be indi. Te Fesito fe azita Pauloni ejizᴜ. 24Fesito eri ‘yora, Opi ambo Agiripa, azini emi 'ba dria ovᴜpi ama be tualᴜ 'doa 'diyi, emi ne agu 'dori; 'ba ongᴜlᴜmᴜrᴜ Yahudini dria 'ba matᴜ ma vᴜ eri ma e'yosi, Yerusalemua azini 'doa, otrezᴜ kini sini erini ovᴜzᴜ idrirᴜ dika kᴜ. 25Te ma isu eri 'yeni e'yo onzi erini drazᴜ alᴜni kᴜ. Eri ngᴜlᴜpi zi muzᴜ opi inzile tᴜ agapi rari vᴜ e'yo erini lizᴜni, ma li eri ma ti pezᴜ ani. 26Te e'yo erinisi ma ovᴜni e'yo ada be sizᴜ opi mani vᴜ kᴜ. E'yo 'disi ma eji eri emi drilia, te agapiri mi drilia, Opi ambo Agiripa, 'dini ka eri ozi 'bo ma nga eco e'yo azini si beni. 27Te ma milia eri efi kokorᴜ 'ba arurᴜ ma ti pezᴜ e'yo onzi erini ecekokorᴜ.

will be added

X\