YETA 24

1O'du towi ka aga 'bo, kuhani agapiri runi Anania, eca tualᴜ 'ba 'wara 'diyi be, azini Teritulo 'ba e'yo nzepi ti alasiri. Yi nze e'yo Pauloni esᴜzᴜ gavena drilia; 2yi ka Pauloni omve ra, Teritulo 'ba eri esᴜ kini : Te misi, Felike inzile tᴜri, ama ovᴜ asi ambiza be tᴜ, azini milemba minirisi e'yo onzi dria ovᴜ edezarᴜ onyirᴜ suru 'dori dri, 3amani e'yo 'diyi isule o'du dria pari dri driarisi, ama ovᴜ awa'clifo be tᴜ. 4Te di ma leni mi andezᴜ e'yo azinisi kᴜ, te ma matᴜ 'ba mi vᴜ, mi eri e'yo amani were asi onyirᴜ minirisi. 5Te ama isu agu 'dori ovᴜ 'ba onzini ekile dra onzi ndindiarᴜle, eri 'ba fepi 'ba Yahudini ombᴜzᴜ amve wudrikuru dria ma eseliari, eri ovᴜ 'ba ambo suru Nazaretini fᴜpi amveri ma driliari. 6Eri 'ye ndra o'bi hekalu ezazᴜ e'yo onzisi indi, te ama bi eri, ama le ndra e'yo erini li ekile azita amanini vᴜsi. 7Te opi amborᴜ Lusia eca ra, eri pa eri ama dria okpo amborᴜsi, 8eri azi 'ba eri esᴜpi 'diyi ma mu mi drilia. Eco mini e'yo amani eri esᴜzᴜri nizarᴜ dria, mi ngᴜlᴜpini eri oziria. 9'Ba Yahudini yi efi ti tualᴜ e'yo yini eri esᴜzᴜrisi, yi a'i e'yo 'diyi dria ovᴜ 'dini. 10Gavena ka Pauloni aku drisi e'yo 'yozᴜ, Paulo omvi e'yo tinia kini: Mani e'yo mini ovᴜzᴜ 'ba e'yo lipi suru 'diri drilia eli kakaᴜsiri nile rarisi, ma e'yo mani ma eti nze uri kokorᴜ ayikosi. 11Mi eco nizarᴜ o'du agani nga mᴜdri drini iri kᴜ, mani tuzᴜ uru Yerusalemua Mungu inzizᴜri ma vᴜtia; 12yi isuni ma agata garia 'ba azini be alᴜni kᴜ, kani awata feria 'ba ongᴜlᴜmᴜrᴜ eselia kᴜ, kani hekalu alia, kani jo 'ba Yahudinini yi okᴜzᴜri ma alia, kani aku amborᴜa kᴜ. 13Te e'yo yini curu'do ma esᴜzᴜri yi econi efini ecezarᴜ mi dri adarᴜ kᴜ. 14Te ma e'yo 'diri e'da mi vᴜ, Geri yini omvele suru mbᴜpi amve nderisi, ma Mungu ama a'bipini inzi'i, te ma a'i e'yo azitani dria azini e'yo nabini sileri dria; 15ma ovᴜ asi tezasi Mungu alia 'dini, 'ba kililirᴜ 'diyi azini 'ba kililirᴜ kᴜ 'diyi iri tro yi nga enga ra, ekile 'ba nde 'diyi ngᴜlᴜpini a'ile 'dini indirile. 16E'yo 'disi ma o'bi ma agei te 'dani, ovᴜzᴜ asi otiza kokorᴜ Mungu ma milia, 'ba ma milia indi. 17Elini agale kakaᴜ 'borisi, ma eca afa feza fezᴜ suru mani dri, edeta edezᴜ indi. 18Mani e'yo 'diri 'yeria, yi isu ma hekalua de ma ovᴜ edezarᴜ alarᴜ, 'ba ongᴜlᴜmᴜrᴜ kokorᴜ, otreŋa kokorᴜ indi. Te 'ba Yahudini azini engapi Asiaa 'diyi— 19eco onyirᴜ 'ba 'diyi ma ovᴜ 'doa ma esᴜzᴜ mi drilia yi'i, yi ka ovᴜ e'yo be ma vᴜ. 20Ka 'dini yo, 'ba 'doyi ma ngᴜlᴜpi ma ece e'yo onzi yini isule ma vᴜ mani pa soria 'ba e'yo amapi 'diyi ma driliari. 21Te kiri o'duko alᴜ mani 'yole 'dori, mani oyᴜle mani pa soria yi eseliari kini, Engata 'ba draza eseliari ma e'yosi emi e'yo mani li andrᴜ. 22Te Felikeni Geri nderi ma e'yo nile fudri cirisi, eri ici yi ma dri, kini, Lusia opi ambo asikarini ka eca ra.. ma nga e'yo emini li ndo. 23Eri azi 'ba asikari tᴜrᴜ alᴜ driliari ageini tezᴜ, kani bani ma kᴜ erini geri were indi, azini ma oga agyi erini 'diyi ma alᴜni emuzᴜ azi ngazᴜ eri dri kᴜ. 24Te o'du azini ka aga 'bo, Felike eca okᴜ erini Drᴜsila be, eri Yahudi ezoni; omve Pauloni, eri eri ma tia e'yo 'bani Kristo Yesuni a'izᴜri. 25Pauloni onyi pi ma e'yo eti nzeria, ava ruani dri sizᴜri pie, e'yo liza emupiri pie, Felike ma asi nga oti urisi oti oti, 'yo ra kini : Curu'do mi mu nga andrᴜ; ayᴜŋa ka ovᴜ ma drilia yo, ma nga mi omve ndo. 26Eri ega kani Pauloni nga i dri afa fe yani. E'yo 'disi eri omve eri pale kakaᴜ ti ecizᴜ eri be. 27Te eli iriri ka aga 'bo, Porikio Fesito nga eca angᴜ nyazᴜ Felike ma paria; te Felike kᴜ Pauloni arurᴜ, erini lele ayiko fezᴜ 'ba Yahudini dririsi.

will be added

X\