YETA 23

1Te Pauloni 'ba e'yo amapi 'diyi ma mile garia okporᴜ, eri ‘yora, Ma adripi, ma asi otini kᴜ e'yo dria mani 'yele Mungu drilia 'diyisi ecazᴜ kpere andrᴜrisi. 2Anania kuhani ambo agapiri azi 'ba pa sopi eri ageia 'diyi dri eri ma ti sazᴜ. 3Paulo 'yo di eri tia, Munguni nga mi sani, mi abi cole evisirile te alealerᴜ onzikanyarᴜri'i! Mi ri va e'yo mani lizᴜ ekile azitani 'yolerile, te mi azi 'ba ma sa ma azita nderini 'yole kᴜrile a'disi ya? 4'Ba pa sopi eri ageia 'diyi yi 'yo, Mi kuhani Munguni amborᴜ agapi-ri o'da ya? 5Paulo 'yo, Ma nini eri kuhani amborᴜ agapi rari'i 'dinini kᴜ, adripi; te e'yo siza kini, Mi ma 'yo e'yo onzi 'ba suru mini ma driliari ma ruaa kᴜ. 6Te Pauloni varia esele alᴜri Sadukayoni, esele aziniri Farisaini, eri oyᴜ uru 'ba e'yo amapi 'diyi ma eselia kini, Adripi mani, ma 'ba Farisaini, Farisaioᴜ mvi'i indi; yi e'yo mani li mani engata 'ba draza eseliari a'ile rarisi. 7Eri ka 'yo 'dini 'bo, awata eca 'ba Farisaini ma eselia 'ba Sadukayoni be; 'ba ongᴜlᴜmᴜrᴜ co yi esele ra. 8A’disikᴜ 'ba Sadukayoni yi a'ini engaza 'ba draza eseliari kᴜ, kani malaika, kani orindi kᴜ indi; te 'ba Farisaini yi adri a'i yini yi iri tro. 9Otreŋa efᴜ ambo; 'ba waraga sipi 'ba Farisainirᴜ 'diyi ma azi enga pa oso agata gazᴜ kini, Ama isuni e'yo onzi 'ba 'dirini kᴜ. Kani orindi kani malaika ka 'yo eri beni? 10Awatani fᴜle okporᴜrisi, opi asikarini azi asikari ma si va eri arizᴜ yi eseliasi, eri jizᴜ ofizᴜ kali asikari-nia, a'disikᴜ eri ovᴜ urisi 'ba ongᴜlᴜmᴜrᴜ ka mu eri osizᴜ kᴜ. 11Ini nderisi Opi so pa eri ageia, ‘yora, Mi ti asi kᴜ; ekile mini e'yo mani ma eti nzele Yerusale-muarile, mi ma nze e'yo mani ma eti Rumia indi. 12Angᴜ ka ati 'bo, 'ba Yahudini yi efi ti yi eselia oyo sozasi, kini yi ngani nyaka nya kᴜ, kani yi mvu kᴜ, de yi funi nga Pauloni kᴜ. 13'Ba oyo sopi 'diyi yi aga kali su ra. 14Yi mu kuhani amborᴜ vᴜ 'ba 'wara vᴜ indi, kini, Ama otri ama ngᴜlᴜpi oyo amborᴜsi ra, ama ngani nyaka nya kᴜ de ama funi nga Pauloni oko kᴜ. 15E'yo 'disi emi'i, tualᴜ 'ba e'yo amapi 'diyi be, emi omve opi asikarini eri ejizᴜ emi vᴜ ekile emini lele e'yo erini ndazᴜ kilili aga rarile. Te ama ovᴜ ngonde eri fuzᴜ de eri ecani ogogo kᴜ. 16Te Paulo amvipi ma mva eri e'yo yini eri mbazᴜri ra; e'yo 'disi eri mu fi kali asikarinia, e'yoni olᴜzᴜ Paulo tia. 17Paulo eri omve 'ba asikari tᴜrᴜ alᴜ driliari alᴜ i vᴜ, kini, Mi ji karilaᴜ 'diri opi asikarini vᴜ, eri le e'yo olᴜ eri tia. 18Eri 'du eri ji opi nderi vᴜ, kini, Paulo arurᴜri omve ma i vᴜ, zi ma ma eji karilaᴜ 'dori mi vᴜ, a'disikᴜ eri ovᴜ e'yo 'yoza be mi vᴜ. 19Opi asikarini bi eri dria, mu eri be kalaa, zi eri oyokolosi, Mi le ma be a'di e'yo 'yo ya? 20Eri 'yo, Ba Yahudini ede e'yo yi eselia mi zizᴜ Pauloni ejizᴜ 'ba e'yo amapi 'diyi ma drilia dru, ekile yini lele e'yo erini ndale kilili aga rarile. 21Te mi a'i e'yo yini zileri kᴜ; a'disikᴜ 'ba yini kali su dri be 'dipi yi eri mba geria. 'Ba 'diyi otri yi yi eselia oyosi kini, yi ngani nyaka nya kᴜ, ngani yi mvu kᴜ, de yi funi nga Pauloni kᴜ; curu'do yi ede yi ngonde, aziza mini tezᴜ. 22'Dini opi asikarini fe karilaᴜ nderi dri geri ra, eri azi kini, Mi ece 'ba alᴜni dri kini mi olᴜ e'yo 'diri ma dri ra 'dini kᴜ. 23Eri omve 'ba asikari tᴜrᴜ alᴜ drilia 'diyi iri i vᴜ, ‘yora, Emi oti asikari tᴜrᴜ iri ngonde, dri kozᴜ sawa na inisi muzᴜ Kaisariaa, asikari akanya dria 'diyi kali aziri, aju be 'diyi tᴜrᴜ iri. 24Emi ede akanya azini Pauloni jizᴜ, emi ji eri onyirᴜ gavena Felike vᴜ. 25Eri si waraga ekile 'dinile : 26Kilaudio Lusia zi gavena Felikeni Inzile Tᴜri ci ci. 27'Ba Yahudini bi 'ba 'dori, te yini 'yezᴜ eri fuzᴜrisi ma ca yi vᴜ asikari be eri pazᴜ, a'disikᴜ ma eri eri 'ba Rumini. 28Te mani lele e'yo eri esᴜzᴜri a'dini yari nizᴜrisi, ma ji eri 'ba e'yo amapi 'diyi drilia. 29Te ma isu yi esᴜ eri agata yini gale azita yini ma e'yosirisi, te esᴜza nde funi dri erini drazᴜ kani eri 'izᴜ jo arunia kᴜ. 30Ma ka e'yo yini agu 'dori mbazᴜri eri ra, coti ma pe eri ti mi vᴜ, ma azi 'ba eri esᴜpi 'diyi yi ma nze e'yo yini eri esᴜzᴜri mi drilia. Ma zi di mi ci ci. 31'Dini asikari, ekile erini yi azilerile, 'du Pauloni ji eri inisi Antipatria. 32Drᴜ yi kᴜ asikari akanya dria 'diyi muzᴜ eri beni, te yi mvi kali asikarinia. 33'Ba 'diyi ka ca Kaisariaa 'bo, yi fe waraga gavena dri, yi e'da Pauloni eri ma milia indi. 34Erini waraga nderi laria, eri zi eri enga angᴜ ngoa ya. Eri ka e'yo erini engazᴜ Kilikiaari eri ra, 35eri ‘yora, Ma nga e'yo mini nzeleri eri dria ra, 'ba mi esᴜpi 'diyi ka eca ra. Eri azi yi ma te eri ma agei jo amborᴜ Herodeniri ma alia.

will be added

X\