YETA 20

1Omba nde ka i de ra, Paulo omve 'ba Yesu vᴜti bipi 'diyi, omi yi asi, zi yi ci ci, fᴜ muzᴜ Makedoniaa. 2Eri ka aci kala 'dasi eri omi yi asi e'yo kakaᴜsi, ca Girikia. 3Eri ka ovᴜ 'dale mba na 'bo, eri 'ye zo ogurusi Suriaa, te 'ba Yahudini yi otᴜ e'yo eri ruaa eri bizᴜ, e'yo 'disi eri ovᴜ onyirᴜ eri ma milia mvizᴜ geri Makedoniaarisi. 4'Ba mupi eri be cazᴜ kpere Asiaa 'diyi yi 'di: 'ba Beroyaari Sopatero Puro mvi'i, 'ba Tesalonikia 'diyi Arisitariko pi Sekundo be, 'ba Derebea 'diyi Gayo pi Timoteo be, 'ba Asiaa 'diyi Tukiko pi Turofimo be. 5Te 'ba 'diyi mu ama drilia, yi te ama Troaa; 6te ama'i, ama enga Filipia o'du omu Mikate Akufi Kokorᴜrini 'diyi ma vᴜtia, fizᴜ oguru alia zozᴜ; o'du towi ka yi de ra ama ca yi vᴜ Troaa, ama ovᴜ 'daa o'du aziri. 7O'du alᴜ sabato ma vᴜtiarisi, amani ama okᴜria tualᴜ mikate nyoria, Pauloni leria dri kozᴜ dru, eri 'yo yi be, olᴜzᴜ izᴜ jizᴜ kᴜzᴜ iniaayii. 8Tala kakaᴜ ovᴜ jo urulerᴜ nde amani ama okᴜzᴜ aleniari ma alia. 9Karilaᴜ alᴜ runi Eutiko eri ri derisaa. De Pauloni e'yo olᴜria izᴜrᴜ, o'du 'be eri dii; o'du ka eri aga ra, eri e'de va engazᴜ jo na urulerᴜria, 'ba eri e'dupi 'diyi isu eri dra 'bo. 10Te Paulo eri esi va eri vᴜ, a'bu i eri dria, amvu eri, 'yozᴜ kini, Emi ga lulu kᴜ, te eri nga idrirᴜ. 11Paulo ka tu uru eri onyo mikate, nya ra, vᴜtinia eri nze e'yo yi be izᴜ cazᴜ kpere angᴜni atiria, 'dini eri mu ra. 12Yi eji karilaᴜ nderi idrirᴜ, isu asi omiza amborᴜ tᴜ ani. 13Te ama'i, ama mu drile ogurᴜa, ama zo muzᴜ Asoa, pari amani ngale Paulo 'duzᴜria; erini e'yo edele 'dinilerisi, kini i ngᴜlᴜpini nga mu pasi. 14Eri ka dri fu ama be Asoa, ama ofi eri ogurᴜa, ama zo cazᴜ Mitulenea. 15Engazᴜ 'dale drᴜsi ama zo cazᴜ Kio vᴜ ogogo; drozi ama ca Samoa; drozi azi 'dasi ama ca Miletoa. 16Te Paulo ega i asia i ma aga Efesoni ra, i kazᴜ ecezᴜ Asiaa kᴜ; a'disikᴜ erini lele cale Yerᴜsalemua mbele eri ka eco ra, ovᴜzᴜ 'dale o'du Pentekositoni-sirisi. 17Miletoarisi eri pe 'ba ti Efesoa, omve 'ba 'wara kanisani 'diyi i vᴜ. 18Yi ka eca eri vᴜ, eri 'yo yi tia kini: Emi ngᴜlᴜpi ni adriza mani ovᴜzᴜ emi eseliari ma e'yo engazᴜ mani ndra ma pa 'bazᴜ Asiaa o'du dria ecazᴜ kpere curu'do, 19mani azi Opmi ngazᴜ asi e'yere be dria, mindresi, obeta ecapi ma vᴜ e'yo 'ba Yahudini 'diyini otᴜle ma ruaa 'diyisiri ma alia; 20emi ni kini ma rᴜni e'yo ecopi emi aza kopi 'diyi olᴜzᴜ emi tia alᴜani kᴜ, emi imbazᴜ 'ba dria ma milia azini jo vᴜsi jo vᴜsi indi, 21asi ojaza Mungu vᴜri ma e'yo eti nzezᴜ 'ba Yahudini pi vᴜ, 'ba Giirikini be, azini a'ita Opi amani Yesu Kristo a'izᴜri ma eti nzezᴜ indi. 22Te curu'do emi ne, ma mu Yerusale-mua, orindi mani ovᴜ ombezarᴜ, ma nini e'yo ngapi ecapi ma vᴜ 'daleri kᴜ; 23pe 'di, Orindi Alatararᴜ nze e'yo ma dri aku amborᴜ dria ma alia, 'yozᴜ anzirikᴜ candi be yi ma te te. 24Te ma milia idri mani ovᴜni e'yo amborᴜ kᴜ, azini ma lani eri ekile afa ajeambosi ma ngᴜlᴜ-piniri kᴜ, te ma le aga dria acita mani dezᴜ ayikosi, azini azi Opi Yesuni fele ma dri e'yo bari 'yeta anzᴜtiri Munguniri ma eti nzezᴜri dezᴜ indi. 25Curu'do emi lu, ma ni ra emi dria mani acizᴜ suru Munguni olᴜzᴜ emi eselia 'diyi, emi ngani ma mile ndre dika kᴜ. 26E'yo 'disi ma e'yo eti nze emi tia andrᴜ 'do, ma mani alarᴜ, 'ba alᴜni ma ari ovᴜni ma dria kᴜ, 27ma rᴜni ndra e'yo dria Munguni eceleri olᴜzᴜ emi dri kᴜ. 28Emi te emi ngᴜlᴜpi pi ma agei, kabilo o'birᴜ Orindi Alatara-rᴜrini emi 'bale yi drilia yi andrizᴜ 'diyi be dria, 'dini emi ma oce kanisa Munguni erini jele i dri ari i ma ngᴜlᴜpinisiri. 29Ma ni ra, ma ka emi kᴜ ra nguru onzi 'diyi nga efi emi eselia, ngani ovᴜ yikisi kabilo ongᴜlᴜmᴜrᴜ 'diyi vᴜ kᴜ; 30te emi ma ngᴜlᴜpi ma eselia 'ba nga enga e'yo goligolirᴜ 'yozᴜ, 'ba Yesu vᴜti bipi 'diyi obezᴜ sezᴜ yi ma vᴜti bizᴜ. 31E'yo 'disi emi ma ovᴜ mile be, emi ma ega 'dani kini eli na ma alia etu be ini be rra ma kᴜni emi alᴜ alᴜ ma asi imbazᴜ mindre be kᴜ. 32Curu'do ma kᴜ emi Mungu dri, azini 'yeta anzutiri eriniri ma e'yo ecopi emi sizarᴜ urᴜ awᴜafa fezᴜ emi dri 'ba alatararᴜ dria 'diyi ma eseliari dri indi. 33Ma 'bani 'ba azini ma afa ma li kᴜ, kani dahabuni, kani meleni, kani bongoni. 34Emi ngᴜlᴜpi ni ra ma 'ye azi mani ma drisi, afa fezᴜ ma dri azini 'ba ovᴜpi ma be 'diyi dri indi. 35E'yo dria ma alia ma ece emi dri geri, 'dini emi eco azi ngazarᴜ okporᴜ 'dinile 'ba okpo kokorᴜ 'diyi ma aza kozᴜ, emini e'yo Opi Yesuni 'yoleri egaria; eri 'yo e'yo nde kini, Drileba 'ba afa fepirini aga 'ba afa a'ipiriniri ra. 36Eri ka 'yo 'dini 'bo, eri osi kᴜmᴜti va, eri zi Mungu tia yi be dria. 37Yi dria owᴜ tᴜ, o'de Pauloni ombelea, ndrᴜ eri ma o'bolo avasi, 38te candi agapiri ovᴜ yi dri e'yo erini 'yole kini yi ngani i mile ne dika kᴜrisi. Yi ji eri kᴜ ogᴜrua.

will be added

X\