YETA 18

1Vilerisi eri fᴜ Ateneasi, ca Korintoa. 2Eri isu 'ba Ya-hudini alᴜ engapi Pontoari rᴜni Akula'i, eri eca nga o'dirᴜ okᴜ erini Pirisila be engazᴜ Italiaa, a'disikᴜ Kilaudioni azita fele 'ba Yahudini dri dria yi ma fᴜ Rumiasi rarisi. Paulo mu yi vᴜ; 3eri ovᴜ yi be azi yinini ovᴜle alᴜrisi, yi nga azi tualᴜ yini ovᴜle iri tro 'ba hema edepi 'diyirᴜrisi. 4Eri imba sabato vᴜsi dria jo 'ba Yahudini yi okᴜzᴜ-ria, 'ba Yahudini ma dri esezᴜ 'ba Girikini be, yi ma a'i beni. 5Sila pi ka eca engazᴜ Make-doniaasi Timoteo be, e'yo ti Paulo ma asia tre e'yo olᴜzᴜ, e'yo eti nzezᴜ 'ba Yahudini dri kini Yesuni Kristo'i. 6Yi ka e'yo erini onzo ra, ka o'da indi, eri oya bongo ini, 'yo yi tia kini, Ari emini ma ovᴜ emi ngᴜlᴜpi dria! Ma'i, ma alarᴜ. Engazᴜ curu'do ma nga mu 'ba Jururᴜ 'diyi vᴜ. 7Eri nga, eri mu fi Tito Yusito vile joa, eri 'ba Mungu inzipiri; jo erini ovᴜ pari 'ba Yahudini yi okᴜzᴜri vᴜ ogogo. 8Te Kirisipo ambo jo 'bani yi okᴜzᴜri ma driliari a'i Opini, 'ba eri vile joa 'diyi be dria; azini 'ba Korintoa 'diyi kakaᴜ, yini e'yo eriria yi a'i ra, bi baputizi indi. 9Opi 'yo Paulo tia inisi ecetasi kini, Mi rᴜ kᴜ, te mi olᴜ 'dani, mi ovᴜ ciri kᴜ; 10a'disikᴜ ma ovᴜ mi be, 'ba alᴜni ecopi a'di 'dipi mi be mi 'yepi onzini yo; te 'ba mani aku 'dori ma alia 'diyi kakaᴜ. 11Eri ovᴜ 'dale eli alᴜ drinia mba azia, e'yo Munguni imbaria yi eselia. 12Ewu Galioni 'ba Akayaa 'diyi ma dri cezᴜrisi, 'ba Yahudini enga Paulo rᴜaa asi alᴜsi, ji eri ogᴜŋa e'yo lizᴜri ma drilia, 13'yozᴜ kini, 'Ba 'diri eri 'ba obe Mungu inzizᴜ . ekile azitani a'ile kᴜrile. 14Te Paulo ka 'ye le tile ini zi e'yo 'yozᴜ, Galio 'yo 'ba Yahudini 'diyi ma tia kini, Ka te ovᴜ ezatani kani e'yo onzi tᴜri, emi 'ba Yahudini, te'do eri onyirᴜ mani emi erizᴜ; 15te ka ovᴜ agata gaza e'yo tokonisi, e'yo runisi azini azita emi ngᴜlᴜpini ma e'yosi, emi ma ngᴜlᴜpi ma ne e'yo 'diri emi'i; ma leni ovᴜ 'ba e'yo 'diyi lipirirᴜ kᴜ. 16Eri dro yi ogᴜŋa e'yo lizᴜriasi ra. 17'Ba dria bi Sositene, ambo jo 'bani yi okᴜzᴜri ma driliari, co eri ogᴜŋa e'yo lizᴜri ma drilia. Te Galio 'bani asi e'yo nderi ma dria kᴜ. 18'Di ma vᴜtia Paulo ovᴜ 'dale o'du kakaᴜ, vᴜtinia eri zi di adripi ci ci, mu ra, eri fi ogurᴜ alia zozᴜ Suriaa tualᴜ Pirisila azini Akula be. Eri fa dribi ini Kenkereaa, erini oyo solerisi. 19Yi ka ca Efesoa eri kᴜ yi 'dale; te eri ma ngᴜlᴜpi fi jo 'ba Yahudini yi okᴜzᴜria e'yo olᴜzᴜ 'ba Yahudini be. 20Te yi ka eri zi ovᴜzᴜ nga yi be dika, eri leni kᴜ; 21te eri zi yi ci ci, mu ra, kini, Mungu ka le ra ma nga emvi emi vᴜ dika. Eri fi ogurᴜ alia engazᴜ Efesoa. 22Eri ka ca Kaisariaa 'bo, eri tu 'ba kanisani zi ci ci, nga di si Antio-kiaa. 23Erini ovᴜria 'dale o'du izᴜ were 'boria, eri enga acizᴜ pari dri dria angᴜ Galatiaari pi ma eselia Ferugiaari be, eri fe okpo 'ba Yesu vᴜti bipi 'diyi dri dria. 24'Ba Yahudini engapi AIege-zandariaari, rᴜni Apolo, eca Efesoa. Eri 'ba e'yo nipi tᴜri, eri okporᴜ e'yo sizasi indi. 25Eri ovᴜ 'ba imbale geri Opinirisiri; orindi erini di di eri ma asia, eri 'yo e'yo Yesuni imbazᴜ kililirᴜ, te eri ni kiri baputizi Yohanani. 26Eri 'ba e'yo olᴜ uri kokorᴜ jo 'ba Yahudini yi okᴜzᴜria; te Pirisila pi ka e'yo erini 'yoleri eri Akula be ra, yi 'du eri, imba eri geri Mungunirisi kililirᴜ aga okori ra. 27Erini leria zozᴜ Akayaa, adripi omi eri ma asi 'yezᴜ 'dinile, yi si waraga 'ba Yesu vᴜti bipi 'dayi dri eri a'izᴜ. Eri ka ca 'bo, eri ko 'ba a'ipi 'yeta anzutiri Mungunisi 'diyi ma aza tᴜ, 28a'disikᴜ eri nde 'ba Yahudini teketeke agata gazasi 'ba dria ma milia ayii, ecezᴜ geri e'yo siza ma aliarisi Yesuni Kristo'i.

will be added

X\