YETA 13

1Isu kanisa Antiokiaari ma alia nabi azini 'ba 'ba imbapi 'diyi indi, Baranaba pi, Simeoni yini omvele Nigerirᴜri pie, Lukio 'ba Kureneari pie, Manaeni adripi zopi tualᴜ Herode beri pie, Saulo pie. 2Yini azi ngaria Opi dri azini yini nyaka 'daria, Orindi Alatararᴜ ‘yora, Emi pe Baranaba pi ndᴜ Saulo be, yi ma nga azi mani yi omvezᴜri'i. 3Yini nyaka 'daria azini Mungu ziria 'boria, yi ti dri yi dria, kᴜ yi muzᴜ. 4'Dini, yini ovᴜle ti pezarᴜ Orindi Alatararᴜsirisi, yi si Selukiaa ; engazᴜ 'dale yi mu ogᴜrusi Kuporoa. 5Yini ovᴜria Salamisia, yi olᴜ e'yo Munguni pari 'ba Yahudini yi okᴜzᴜ 'diyi ma alia. Yohana ovᴜ yi be yi aza kozᴜ indi. 6Yini agaria angᴜ nde i lipi miri ma aliari ma eselesi dria cazᴜ kpere Pafoa 'boria, yi isu agu alᴜ oleoᴜrᴜ, nabi inzorᴜ 'ba Yahudini, runi Bara-Yesu'i. 7Eri ovᴜ tualᴜ Serigio Paulo opi 'ba Rumia 'diyini pele azi ngazᴜ angᴜ nderiari be. Opi nderi 'ba ondᴜarᴜni, eri omve Baranaba pi i vᴜ Saulo be, le e'yo Munguni erizᴜ. 8Te Eluma 'ba oleoᴜrᴜ nderi (rᴜ erini ma efi 'dini) arᴜ yi dri agatasi, lezᴜ opini ojazᴜ kazᴜ a'izᴜ kᴜ. 9Te Saulo 'bani omvele Paulo, gapi Orindi Alatararᴜsi treri, eri sᴜ mile ruania okporᴜ, 10eri 'yo ra kini, Lokiri ga mi alia tre e'yo onzi dria be, mi mva Satanini! Mi ari'bo e'yo onyirᴜni dria, mi kᴜni geri kililirᴜ Opiniri ojazᴜ kᴜ ya? 11Curu'do mi ne, dri Opini ovᴜ mi ruaa, mi mileni nga dra ra, mi ngani eco etu ndrezarᴜ cazᴜ o'du azinisi kᴜ. Coti apᴜrᴜsa azini angᴜ inirᴜ 'ba yi asᴜ eri dria, eri mu 'ba ndazᴜ i sezᴜ drisi. 12Te opini e'yo i 'yepiri ndreria eri a'i ra, eri ovᴜ taisi tᴜ imbata Opinisi. 13Te Paulo 'ba acipi eri be 'diyi be, yi fi oguru alia engazᴜ Pafoa cazᴜ Perigaa angᴜ Pamfuliania. Te Yohana eri kᴜ yi ra, da dri vile mvizᴜ Yerᴜsalemua; 14te yi aga engazᴜ Perigaa cazᴜ Antiokia angᴜ Pisidianima aliaria. Teo'du sabatoni-si yi fi pari 'ba Yahudini yi okᴜzᴜria^ yi ri va. 15Yini buku azitaniri laria nabini be 'boria, 'ba amborᴜ ovᴜpi jo 'bani okᴜzᴜri drilia 'diyi yi pe 'ba ti yi vᴜ, yi ‘yora, Adripi, emi ka ovᴜ e'yo asi omizani be imbazᴜ 'ba dri, emi 'yo. 16Paulo eri enga, erini yi ogaria drisi eri 'yo kini : Emi agupi Israelini azini emi 'ba Mungu rᴜpi 'diyi, emi eri. 17Mungu suru 'diri Israeliniri ope ndra ama a'bipi, eri 'ba suru nde urᴜ ewu yini adrizᴜ angᴜ Misiri-niarisi, ofᴜ ndra yi wu okporᴜ inirisi. 18Te ekile eli kali su 'dipi ma alia dria eri mba yi ma ta asi tezasi roko dria. 19Eri ka suru jururᴜ aziri angᴜ Kananini ma alia 'diyi ma dri ja 'bo, eri fe angᴜ 'ba nde 'diyini yi dri ovᴜzᴜ yinirᴜ ekile eli tᴜrᴜ su drini kali towile. 20E'yo 'diri ma vᴜtia, eri fe 'ba e'yo olipi 'diyi yi dri ecazᴜ nabi Samueli vᴜ. 21Vilerisi yi zi opi; azini Mungu fe yi dri Saulo Kisi mvi, 'ba suru Benyaminini, eli kali su. 22Eri ka eri nze ra, eri enga Daudini ovᴜzᴜ opi yini; eri nze eri ma e'yo eti 'yozᴜ kini, Ma isu Daudi Yese mvini, eri 'ba ma asini lele ngapi e'yo dria mani leleri 'yepiri'i. 23Engazᴜ agu 'di ma ori ma alia, Mungu eji Israeli vᴜ 'Ba 'ba Papiri Yesu, ekile erini azile ndrarile. 24De eri ecani kᴜ, Yohana olᴜ baputizi asi ojazani ma e'yo 'ba Israelini 'diyi dri dria. 25Yohana ka 'ye acita erini de, eri 'yo, Emi ega ma a'di'i ya? Ma eri'i yo. Te emi ne, 'ba azini nga emu ma vᴜtia, mani dri fuzᴜ onyisi enyiriko eri ma paari ayuzᴜ kᴜri'i. 26Adripi, a'bianzi Iburahimuni azini 'ba Mungu rᴜpi ovᴜpi emi eselia 'diyi, epe pata 'diri ma e'yo ma ti ama vᴜ 'bo. 27Te 'ba ovᴜpi Yerᴜsalemua 'diyi 'ba yi dri cepi 'diyi be, yini 'ba 'diri nile kᴜrisi azini yini o'duko nabini ovᴜpi lazarᴜ sabato dria vᴜsi 'diyi vale kᴜrisi indi, yi fe e'yo 'diyi ma 'ye yi trotro, yini eri ndele e'yo lizasirisi. 28Yi isuni e'yo efi eri alia eri fuzᴜri kᴜ, te ti yi a'i Pilato ma fu eri. 29Te yi ka fe e'yo ovᴜpi sizarᴜ eri ma e'yosi 'diyi dria ma 'ye yi trotro 'bo, yi trᴜ eri pati rᴜaasi, yi sa eri 'bilia. 30Te Mungu enga eri 'ba draza ma eseliasira; 31eri e'da i o'du kakaᴜ 'ba engapi Galilia emupi eri be Yerusalemua 'diyi dri, 'ba 'diyi ovᴜ curu'do 'ba e'yo erini ma eti nzepi 'ba dri 'diyirᴜ. 32Te ama olᴜ e'yo bari emi dri aziza Munguni azile ndra ama a'bipi driri'i; 33eri fe aziza nderi ma 'ye i ama'i anzi yini dri erini Yesu engalerisi; ekile ovᴜpi sizarᴜ zaburi iriri ma aliarile indi, Mi ma Mvi'i, andrᴜ ma ti mi ra. 34E'yo erini eri engazᴜ 'ba draza ma eselia erini ngazᴜ mvizᴜ mazᴜ dika kᴜri, e'yo nderisi eri 'yo 'dinile, Ma nga e'yo onyirᴜ Daudini alatararᴜ azini adarᴜ 'diyi fe mi dri. 35E'yo 'dirisi eri 'yo zaburi azini ma alia indi, Mi ngani fe 'Ba Alatararᴜ miniri ma ma kᴜ. 36Te Daudi ka ndra azi nga a'bianzi ewu erinisi 'diyi dri ekile Munguni edelerile 'boria, eri ko o'du ra, sa eri tualᴜ a'bipi erini 'diyi be, ma ra; 37te eri'i Munguni engale 'ba draza ma eseliari, 'ba nderi mani kᴜ. 38Agupi ma adripirᴜ 'diyi la, emi ma ni di e'yo 'diri ani, ama olᴜ emi tia kini e'yo onzi ovᴜ wuzarᴜ 'ba nde. 'dori ma e'yosi, 39te 'ba 'dirisi yi la 'ba dria eri a'ipi 'diyi kililirᴜ, e'yo dria emini ecole ovᴜzarᴜ lazarᴜ kililirᴜ azita Musanisi kᴜ 'diyi ma alia. 40E'yo 'disi emi ma ne onyirᴜ, e'yo nabini 'yoleri kazᴜ ecazᴜ emi vᴜ kᴜ : 41Emi ne, emi 'ba e'yo onzopi afᴜsi 'diyi, emi ma ovᴜ taisi, emi ma afi ra; a'disikᴜ ma 'ye 'yeta ewu eminisi, 'yeta nderi emi ngani a'i alᴜni kᴜ, 'ba ka tro olᴜ emi dri ti. 42'Bani efᴜria, yi 'ba matᴜ yi vᴜ yi ma olᴜ e'yo 'diyi yi tia sabato ecapirisi. 43'Ba okᴜzaa 'diyini yi erezᴜ 'borisi, 'ba Yahudini kakaᴜ azini 'ba Mungu rᴜpi engazᴜ suru azinia yi ojapi 'ba Yahudinirᴜ 'diyi yi bi Paulo pi ma vᴜti Baranaba be ; te yi'i, yi 'yo yi be yi asi imbazᴜ yi . ma ebi yi asi ndriza Munguni be 'dani. 44Sabato ecapirisi 'ba aku amborᴜ nderi ma alia 'diyi eca ekile dria e'yo Munguni erizᴜ. 45Te 'ba Yahudini yi ka 'ba ongᴜlᴜmᴜrᴜ ndre, yi ovᴜ ma'yalasi tre, yi 'ba agata ga e'yo Pauloni olᴜlerisi, yi eri o'da o'da. 46Te Paulo pi Bara-naba be yi 'yo e'yo uri kokorᴜ, 'yozᴜ kini, Adani, e'yo Munguni ma ovᴜ olᴜzarᴜ emi dri oko raka. Te 'dini emini e'yo nderi zele 'dalerisi, emini egale kini sini emi idri 'dani 'dani isuzᴜ kᴜrisi, emi ne, ama oja ama 'ba Jururᴜ 'diyi vᴜ. 47Opini azita fele ama dri 'dinirisi, Ma 'ba mi ovᴜzᴜ dizale 'ba Jururᴜ 'diyi dri, 'dini mi ma ji e'yo patani wudrikuru ma kalatini asiria. 48'Ba Juruni yi ka e'yo nderi eri ra, yi ovᴜ ayikosi, yi inzi e'yo Opini ; te 'ba dria opele idri 'dani 'dani isuzᴜ ra 'diyi, yi a'i ra. 49E'yo Opini eri ku wakaka angᴜ nderia dria. 50Te 'ba Yahudini yi mu okᴜ 'wara inzita yini ma vᴜti bipi avasi 'diyi vᴜ, azini agupi amborᴜ aku nderia 'diyi vᴜ indi, yi esᴜ yi bile inzata fezᴜ Paulo pi dri Baranaba be, dro yi angᴜ yini ma eseliasi ra. 51Te 'ba 'diyi yi we irifᴜra yi ma paari va yi vᴜ, yi mu Ikoniaa. 52'Ba Yesu vᴜti bipi 'diyi yi ga ayikosi tre, Orindi Alatararᴜrisi indi.

will be added

X\