YETA 12

1O'du nde 'diyi ma eselia opi Herode 'ba 'ba kanisani azini 'diyi inza okporᴜ i drisi. 2Eri fu Yakobo adripi Yohananiri seisi; 3ka ndre 'ba Yahudini ovᴜ ani ayikosi eri 'ye Peteroni bi vᴜni indi. 'Diri ovᴜ o'du 'ba Yahudini mikate akufi kokorᴜri nyazᴜ 'diyi ma eselia. 4Eri ka eri bi 'bo, eri 'ba eri arujoa, fe eri asikari mᴜdri drini azia 'diyi dri ageini tezᴜ su su; eri ega eri ofᴜzᴜ amve 'ba ma drilia omu Agaza 'ba drilesiri ka i de raria. 5'Dini yi te Petero ma agei arujoa; te 'ba kanisani 'diyi ri Mungu zi eri dri asi driasi. 6Ini nde Herodeni 'yezᴜ eri ofᴜzᴜ amverisi, Petero ovᴜpi otizarᴜ anzirikᴜ irisirini o'du koria asikari iri eselia, isu de asikari pa sopi jotilea 'diyi yi arᴜjo agei te; 7mi ndre, malaika Opini so pa eri ageia, te diza aza angᴜ jo aliza nderi alia; eri sa Peteroni ejea eri orᴜzᴜ, kini, Mi nga mbele! Anzirikᴜ eri dri otizᴜri nga di ayi va. 8Malaika 'yo eri tia kini, Mi a'di mi opile, mi su enyiriko mini mi paa. Eri 'ye 'dinile. Eri 'yo tinia, Mi 'be bongo mini mi ruaa, mi emu di ma vᴜtisi. 9Eri efᴜ ra, mu eri vᴜtisi ; te eri nini kᴜ kani e'yo malaikani 'yeleri ovᴜ adarᴜ kani yo, eri ega i ndre afa ndrezani. 10Yini asikari arujo agei tepi esele okori agaria iriri be 'boria, yi eca kalitile ayarᴜ 'bani efᴜzᴜ aku amborᴜriaria. Kalitile nderi zi i ceni, yi fᴜ amve aga geri ariti alᴜ; coti malaika kᴜ eri ra. 11Petero ma asi ka emvi 'bo eri 'yo kini, Curu'do ma ni adarᴜ Opi epe malaika ini ma ti ma pazᴜ Herode ma driani, azini e'yo dria 'ba Yahudini egale 'yele ma vᴜri ma alia indi. 12Eri ka e'yo 'di iyiki ra, eri mu ca Maria vile akua, eri Yohana yini omvele rᴜ azinisi Marako'iri ma andri'i, pari 'ba kakaᴜni yi okᴜzᴜ Mungu zizᴜria. 13Eri ka jotile kpo ra, zamva runi Roda'i emu eri alu. 14Erini niria eri Petero ma o'duko, eri zini jotile ayiko dri kᴜ, te eri fi ongusi, 'yo ra Petero so pa amve jotilea 'daa! 15Yi 'yo eri tia kini, Mi aza aza. Te eri 'yo yi tia 'dani okposi kini eri 'dini. Awa'dini yi ‘yora, Eri ovᴜ malaika erini! 16Te Petero ri jotile kpo 'dani; te yini ziria yi ndre eri, yi ovᴜ taisi. 17Te eri oga drisi yi dri e'yo 'yoko si, eri ece yi dri e'yo Opini eri ofᴜzᴜ arᴜjoari. Eri 'yo kini, Emi olᴜ e'yo 'diri Yakobo pi dri adripi be indi. Eri ko dri muzᴜ pari azinia. 18Angᴜni atiria 'boria, o'yoŋa ovᴜ asikari ma eselia ambo Pete-roni muzᴜ ngoa yari ma e'yosi. 19Herode ka eri nda ti, eri ozi asikari arujo agei tepi 'diyi e'yo yini lizᴜ, eri azi yi ofuzᴜ. Te eri enga Yudiaa sizᴜ Kaisariaa, eri te 'dale. 20Asi Herodeni ovᴜ adrasi 'ba Turoa azini 'ba Sidonia 'diyi be; yi eca eri vᴜ asi alᴜsi, azini yi ka Blasito 'ba azi ngapi opi vile joa 'diyi ma driliari 'ba yi agyirᴜ 'bo, yi a'i asi anzurᴜ adra dezᴜ, a'disikᴜ 'ba yi vile angᴜa 'diyi adri nyaka yini isu opi vile angᴜa. 21O'du pelerisi Herode su bongo ini opiniri, erini riria va ogᴜŋa dria e'yo aziria yi tia. 22'Ba ongᴜlᴜmᴜrᴜ yi otre o'duko urusi kini, 'Di o'duko munguni, 'baniri yo! 23Coti malaika Opini co eri ra, a'disikᴜ eri feni diza Mungu dri kᴜ ; o'bu nya aleni, dra ra. 24Te e'yo Munguni zo dika, ezᴜ tre. 25Baranaba pi emvi engazᴜ Yerusalemuarisi Saulo be, yi ka azi yini de 'bo; yi e'du Yohana yini omvele ru azinisi Marako'iri emvizᴜ yi be.

will be added

X\