YETA 11

1Ba ti opele azini adripi ovᴜpi Yudiaa 'diyi, yi eri e'yo 'ba Jururᴜ 'diyini e'yo Munguni a'izᴜ indiri. 2Te Petero ka tu Yerusalemua, 'ba azini 'ba liza 'diyi ma eselia ga agata eri be, 3'yozᴜ kini, A'di e'yosi mi fi 'ba lile kᴜ 'diyi ma eselia nyaka nyazᴜ tualᴜ yi be? 4Te Petero 'ba e'yo ece yi dri alᴜ alᴜ kini: 5Ma ovᴜ ndra aku amborᴜ Yoparia Mungu zizᴜ; ma avani otiria ma ndre eceta alia afazᴜ ekile bongo walarᴜle, o'izarᴜ oji kalania su 'diyia, osile va engazᴜ 'buari; eri esi va ma vᴜ. 6Mani mile sᴜria ruania okposi, ma dro asisile drinia, ma ndre anyapa pa su be 'diyi dria, anyapa asea 'diyi be, afa acipi agatisi 'diyi, aria 'bua 'diyi be indi. 7Te ma eri o'dukoni 'yoria ma tia kini, Mi enga, Petero; mi li, mi nya. 8Te ma 'yo, 'Dini yo, Opi; te afa saarᴜ azini alatara kokorᴜ fini nga drio ma tilia alᴜni kᴜ. 9O'duko omvi e'yoni pale iririsi engazᴜ 'bua kini, Afa Munguni 'bale alatararᴜ 'diyi mi ma omve yi saarᴜ kᴜ. 10E'yo 'diri ovᴜ 'yezarᴜ 'dini pale na, vᴜtinia afa dria ovᴜ 'duzarᴜ dika 'bua. 11Mi ne, coti 'ba na tini epele ma vᴜ engapi Kaisariaa 'diyi yi oso pa jo amani ovᴜzᴜri ma drilialerᴜ. 12Orindi nga 'yo ma tia kini, Mi mu yi be 'ba ma esele cozᴜ kᴜ. Adripi azia 'diyi nga mu ma be tualᴜ, ama fi 'ba nderi ma joa. 13Eri nga ece ama dri e'yo erini malaika nezᴜ pa soria jo ini ma aliari, 'yo eri tia kini, Mi pe 'ba ti Yopaa Simoni yini omvele Peterori omvezᴜ; 14eri nga mi dri e'yo olᴜ mini ngazᴜ mi pazᴜ ani, mi'i tualᴜ 'ba mi vile joa 'diyi be dria beni. 15Mani 'baria 'yoria, Orindi Alatararᴜri nga esi va yi dria ekile ama dria okorile. 16Ma nga di e'yo Opini ndra 'yoleri ega, kini, Yohana fe ndra ini baputizi yisi, te emi'i, emi nga baputizi bi Orindi Alatara-rᴜsi. 17Awa'dini Mungu ka feta fe yi dri trotro erini fele ama dri amani Opi Yesu Kristo a'izᴜrisirile, ma a'di'i ya ecozᴜ Mungu ogazᴜ 'dini? 18Yi ka e'yo nderi eri 'bo, yi ovᴜ ciri, azini yi inzi Mungu 'yozᴜ kini, Ka'dini Mungu fe Juru dri asi ojazᴜ fizᴜ idria indi. 19Te 'ba ovᴜpi erezarᴜ inzata engapi Setefano ma e'yosirisi 'diyi, yi ca kpere Foenikia azini Kuporoa azini Antiokiaa, yi olᴜ e'yo kiri 'ba Yahudini dri a'dule. 20Te 'ba azini yi eselia, 'ba engapi Kuporoa azini Kurenea 'diyi, yini ecaria Antiokiaa yi 'ba e'yo 'yo 'ba Girikirᴜ 'diyi tia indi, Opi Yesuni olᴜzᴜ. 21Dri Opini ovᴜ yi be, 'ba ongᴜlᴜmᴜrᴜ kakaᴜ a'ipi 'diyi yi oja yi Opi vᴜ. 22E'yo yini ku cazᴜ kpere kanisa ovᴜpi Yerusalemuari ma bilia, yi pe Baranaba ma ti Antiokiaa. 23Erini ecaria, erini asi ndriza Munguni ndreria, eri ovᴜ ayikosi ; eri omi asi yini dria yi ma 'ba asi yini okporᴜ yi ebizᴜ Opi vᴜ 'dani ; 24erini ovᴜle 'ba onyi be, gazarᴜ Orindi Alatara-rᴜsi azini a'itasi trerisi. Te 'ba kakaᴜ o'ba yi Opi vᴜ. 25Te Baranaba fᴜ muzᴜ Tarisoa Sauloni ndazᴜ; 26ka eri isu 'bo, eri ji eri Antiokiaa. Eri eca 'dini, eli alᴜ pi ma alia yi eci yi ti tualᴜ 'ba kanisani be, yi imba 'ba karakaraᴜ ; 'ba e'do 'ba Yesu vᴜti bipi 'diyi ma rᴜ omve 'ba Kristonirᴜ okoni Antiokiaa. 27Ewu nderisi nabi esi engazᴜ Yerusalemua ecazᴜ Antiokiaa. 28'Ba alᴜ yi eselia eri ma rᴜ Agabo, eri so pa uru e'yo ondrizᴜ Orindisi kini liki amborᴜni nga 'de angᴜ wudrikurᴜ dria ma alia; eri eca 'dinile ewu Kilaudionisi. 29'Ba Yesu vᴜti bipi 'diyi 'ba asi yini afa feza ti pezᴜ adripi Yudiaa 'diyi vᴜ ekile yi alᴜ alᴜni ecolerile; 30yi 'ye 'dini indi, tini pezᴜ 'ba 'wara vᴜ Baranaba pi ma dria Saulo be.

will be added

X\