YETA 10

1'Ba alᴜ ovᴜpi Kaisariaari, runi Korinelio, eri ovᴜ 'ba amborᴜ enyati asikari tᴜrᴜ alᴜni yini omvele Italianiri ma driliari'i. 2Eri ovᴜ 'ba inzita be Mungu rᴜpi 'ba eri vile joa 'diyi be driari, eri adri afa fe 'ba aliorᴜ dri tᴜ, azini eri zi Mungu tia 'dani. 3Ogogo sawa oromirisi eri ndre eceta alia kilili malaika Mungunini efᴜzᴜ i vᴜ 'yozᴜ i tia, Korinelio! 4Eri sᴜ mile ruania, asi erini mbᴜ ciri urisi, eri ‘yora, Opi, e'yo ngoni ya? Eri 'yo eri tia, Zita mini afa feza mini fele 'diyi be yi tu uru Mungu drilia, Mungu ega e'yoni 'dani ani. 5Curu'do mi pe 'ba ti Yopaa, mi omve Simoni yini omvele Peterori; 6eri la omurᴜ Simoni 'ba enyi edepiri vile joa, akᴜ erini ovᴜ ogogo miri tia. 7Malaika e'yo 'yopi eri beri ka mu 'bo, eri omve ati'ba iri azini asikari Mungu inzipiri, 'ba yi ebipi azi ngapi eri dri 'diyi ma eselia; 8erini e'yo 'diri dria eceria yi dri 'boria, eri pe yi ti Yopaa. 9Te drusi yini muria geria^ yini ecaria ogogo aku amboria, Petero eri tu uru jo dri senderᴜria Mungu zizᴜ, ekile etu aziarile. 10Abiri fu eri, eri le nyaka nya; yini enya ovaria, avani oti ra, 11eri ndre 'bu ovᴜ zizarᴜ, ndre vini afa ekile bongo walarᴜle, o'izarᴜ oji kalania su 'diyia, osile va engazᴜ 'buari. 12Eri ma alia afa dria ovᴜpi pa su be 'diyi, afa acipi agatisi nyakua 'diyi, azini aria 'bua 'diyi be. 13Te o'duko eca eri vᴜ kini, Mi enga, Petero; mi li, mi nya. 14Te Petero ‘yora, 'Dini yo, Opi; te ma nyani nga afa saarᴜ alatara kokorᴜ 'diyi drio kᴜ. 15O'duko eca eri vᴜ dika pale iririsi kini, Afa Munguni 'bale alatararᴜ 'diyi, mi ma omve yi saarᴜ kᴜ. 16E'yo 'diri ovᴜ 'yezarᴜ 'dini pale na, coti afazᴜ nderi ovᴜ 'duzarᴜ 'bua. 17Te Peteroni e'yo egaria i asia ti, kini eceta ini ndrele 'dori ma efi ngoni ya, mi ndre, agupi Korinelioni tini epele 'diyi, yini jo Simonini ziria 'boria, yi oso pa kalitilea. 18Yi oyᴜ zizᴜ kani Simoni yini omvele Petero'iri la omurᴜ 'doa yani. 19Te Peteroni eceta ini ndreleri ma e'yo egaria, Orindi 'yo eri tia kini, Mi ndre, agu na yi mi nda. 20Mi nga, mi si va, mi mu yi be 'ba ma esele cozᴜ kᴜ, a'disikᴜ ma epe yi ti ma'i. 21Petero eri si va 'ba 'diyi vᴜ, eri 'yo ra kini, Emi ndre, 'ba emini ndaleri ma'i; emi eca 'doa a'disi ya? 22Yi ‘yora, Korinelio 'ba amborᴜ asikari tᴜrᴜ alᴜ drilia, 'ba onyirᴜ Mungu rᴜpi, suru Yahudini driani runi idule idu inzitasiri, malaika alatararᴜ Munguni ece eri dri eri ma pe 'ba ti mi vᴜ jo 'doria, e'yo erizᴜ mi tia. 23'Dini omve yi ma efi joa, 'ba yi wa'dirᴜ. Drᴜsi eri enga, eri mu yi be, te adripi Yopaa 'diyi ma azi yi mu yi be indi. 24Drozi 'dini yi fi Kaisariaa. Korinelio ovᴜ yi ma dri teria, isu eri omve ori'ba ini azini agyi ini 'diyi tualᴜ 'bo. 25Te eri nga eca 'dini, Peteroni firia Korinelio nga di dri fu eri be, nga i eco va eri palaa eri inzizᴜ. 26Te Petero enga eri uru, ‘yora, Mi so pa uru; ma'i ma alᴜ 'bani. 27Erini e'yo 'yoria eri be eri fi, eri isu 'ba kakaᴜ okᴜzarᴜ; 28eri 'yo yi tia, Emi'i, emi ni ra azita a'ini 'ba Yahudini dri ti ecizᴜ 'ba jururᴜ be, kani muzᴜ yi vᴜ kᴜ ; te Mungu ece ma dri ma ma omve 'ba alᴜni saarᴜ kani alatara kokorᴜ kᴜ. 29E'yo 'disi ma emu ani agata kokorᴜ, 'bani ma omveria. Ma zi emi tia ani, emi omve ma a'disi ya? 30Te Korinelio ‘yora, O'du su aga curu'do e'yo nderi ma vᴜtia 'bo. Etu ekile 'dipile o'du nderisi, ma ovᴜ ndra Mungu ziria sawa oromi-risi jo mania; mi ne, agu bongo be emvendrindriri so pa ma ageia 31'yozᴜ kini, Korinelio, zita mini ovᴜ erizarᴜ azini afa feza mini ovᴜni avizarᴜ Mungu dri kᴜ. 32E'yo 'disi mi pe 'ba ti Yopaa, mi omve Simoni yini omvele Petero'iri; eri la omurᴜ Simoni enyi edepiri vile jo ovᴜpi ogogo miri tiaria. 33E'yo 'disi ma pe 'ba ti mi vᴜ coti, te mi 'ye onyirᴜ mini emulerisi. Curu'do ama ovᴜ dria 'doa Mungu ma milia, e'yo dria Opini azile mi driri erizᴜ. 34Te Petero zi i tile e'yo 'yozᴜ: Adarᴜ ma va ra Mungu openi 'ba kᴜ, 35te suru dria ma eselia eri adri 'ba i rᴜpi e'yo onyirᴜ 'yepiri a'i ra. 36Emi ni e'yo erini ti pele anzi Israelini vᴜ, e'yo bari asi anzurᴜni olᴜzᴜ Yesu Kristosiri (eri ovᴜ Opi 'ba dria 'diyini), 37emi ni e'yo nde ovᴜpi olᴜzarᴜ angᴜ Yudiani ma alia dria, engazᴜ Galilia baputizi Yohanani olᴜleri ma vᴜtiari. 38E'yo nderi ece e'yo Munguni Yesu Nazaretiari pezᴜ odᴜ osᴜzᴜ drinia Orindi Alatararᴜsi, okposi indiri; eri aci pari dri dria e'yo onyirᴜ 'yezᴜ, azini 'ba dria Satanini inzale ombele ci 'diyi ma rua atizᴜ, Munguni ovᴜle tualᴜ eri berisi. 39Ama ovᴜ 'ba e'yo dria erini 'yele angᴜ Yahudini ma alia azini Yerusalemua 'diyi ma eti nzepi 'diyirᴜ. Yi fu eri yini eri diria pati rᴜaa ; 40te Mungu enga eri dika o'du narisi, azini e'da eri indi; 41'ba dria milia kᴜ, te ama 'ba Munguni opele ovᴜzᴜ 'ba e'yo eti nzepi 'diyirᴜ 'diyi ma milia, ama'i 'ba nyapi mvupi tualᴜ eri be erini engaria 'ba draza ma eselia 'boria 'diyi. 42Te eri azi amani e'yo olᴜzᴜ 'ba vᴜ, e'yo eti nzezᴜ, kini agu 'diri eri 'ba Munguni pele ovᴜzᴜ 'ba idrirᴜ pi ma e'yo lizᴜ 'ba draza 'diyi be indiri. 43Nabi dria yi nze 'ba 'diri ma e'yo eti, kini, 'ba dria eri a'ipi 'diyi yi isu e'yo onzi wuza eri ma rusi ra. 44Peteroni nga e'yo 'diri 'yoria, Orindi Alatararᴜ esi va 'ba dria e'yo 'diri eripi 'diyi dria. 45Te 'ba a'ipi ovᴜpi lizarᴜ ecapi tualᴜ Petero be 'diyi yi osu tᴜ feta Orindi Alatararᴜnirini i osᴜle 'ba Jururᴜ 'diyi ma dria indirisi. 46A'disikᴜ yi eri yini e'yo 'yoria ti ndᴜ ndᴜsi Mungu ru inzizᴜ. Vᴜtinia Petero omvi e'yo kini, 47A'di eco yi ogazᴜ baputizi fezᴜ 'ba 'diyi drini ya, yi'i Orindi Alatararᴜ a'ipi ekile amani a'ilerile 'diyi? 48Eri nga di azi baputizi fezᴜ yi dri Yesu Kristo ma rusi. Vᴜtinia yi 'ba matᴜ eri vᴜ ma ovᴜ nga yi be o'du were ka.

will be added

X\