YETA 1

1Waraga oko mani sileri ma alia, Teofilo, ma ece e'yo dria Yesuni e'dole 'yele azini imbale 2ecazᴜ kpere o'du erini tuzᴜ ururia 'diyi; de nga eri tuni kᴜ eri fe azita Orindi Alatararᴜsi 'ba erini ti opele 'diyi dri oko. 3'Ba nde 'diyi dri eri ece i ngᴜlᴜpi idrirᴜ candi ini nyaleri ma vᴜtia, eceta adarᴜ karakaraᴜsi, i ecezᴜ 'ba nde 'diyi milia o'du kali su e'yo suru Mungunirini olᴜzᴜ. 4Te yini yi okᴜria tualᴜ eri be eri fe yi dri azita kini yi ma nga Yerusalemuasi kᴜ, te yi ma te aziza Atani; Aziza nde, eri kini, emini ndra erile ma vᴜ 'bori; 5te ada Yohana fe ndra baputizi yisi, te ace o'du were emi nga baputizi a'i Orindi Alatararᴜsi. 6E'yo 'disi yi ka yi okᴜ tualᴜ, yi zi eri tia kini, Opi, mi curu'do Israeli dri suru opini omvi ra ya? 7Eri omvi e'yo yi tia, Di e'yo emini yo, ewu kani eli Atani pele ovᴜzᴜ okpo ini ma alia ini lelerile 'diyi nizᴜ. 8Te emi nga okpo isu Orindi Alatararᴜ ka eca emi dria ra, emi nga e'yo mani ma eti nze Yerusalemua, Yudiaa dria, azini Samariaa, cazᴜ kpere nyaku ma kalatini asiria. 9Eri ka e'yo 'diyi 'yo 'bo, yini eri ndreria eri ovᴜ 'duzarᴜ uru, iriti a'bᴜ eri yi milia. 10Yini ndreria uru 'dani 'bua erini muria, emi ne, 'ba iri bongo be emverᴜ yi oso pa yi ageia, 11yi 'yo, Emi 'ba Galilia 'diyi, emi oso pa luzᴜ uru 'dani a'di e'yosi ya? Yesu engapi emi eselia muzᴜ 'bua 'diri, eri nga eca dika ekile emini eri ndrele muria 'buarile. 12Yi mvi Yerusalemua engazᴜ oni omvele Mizeituniriarisi ; oni nde ovᴜ ogogo Yerusalemu ageia ekile acita sabatonile. 13Yi ka fi ra yi tu jo uru pari yini adrizᴜri ma alia; Petero pi Yohana pie, Yakobo pie, Andarea pie, Filipo pi Toma be, Baritolomayo pi Matayo be, Yakobo Alifayo mvi pi Simoni Zelote pie, Yudasi Yakobo mvi pie. 14'Ba 'diyi dria yi ovᴜ asi alᴜsi Mungu zizᴜ, okᴜyi be, azini Mariamu Yesu ma andri pie, adripi erini pie. 15Etu nde 'dayisi Petero eri so pa adripi ma eselia ('ba yi okᴜpi ngᴜlᴜrᴜ 'diyi ma kalafe ovᴜ ekile tᴜrᴜ alᴜ kali irile), eri 'yo kini, 16Adripi mani, e'yo siza ma 'ye i tro-tro ekile e'yo Orindi Alatararᴜni ecele ndra oko Daudi ma tisi Yudasi 'ba Yesuni bipi 'diyi ma dri cepirisirile. 17Eri ovᴜ ndra lazarᴜ ama be, azini eri isu azi 'dori ma esele indi. 18('Ba nderi je nyamᴜko e'yo onzi erini ma oyasi; eri eco i va o'buzarᴜ, eri ma ale afi ra, fini efᴜ amve mee. 19E'yo nderi ku 'ba adripi Yerusalemua 'diyi vᴜ dria, 'dini yi 'da nyamᴜko 'diri ma ru Akeledama'i ani, efiniri Nyamᴜko Arini.) 20Te eri ovᴜ sizarᴜ buku Zaburini ma alia, Eri vile aku ma eca andrᴜrᴜ, 'ba azini ma la alenia alᴜni kᴜ; azini 'Ba azini ma nga azi eri pariani. 21E'yo 'disi 'ba ovᴜpi tualᴜ ama be o'du dria Opi Yesuni efiria azini fᴜria ama eselia, 22engazᴜ Yohanani baputizi feria ecazᴜ o'du Yesuni engazᴜ ama eselia muzᴜ 'buaria—'ba 'diyi ma eselia ama ma pe 'ba alᴜ ovᴜzᴜ tualᴜ ama be e'yo Yesuni engazᴜri ma eti nzezᴜ. 23Yi ope 'ba iri, Yusufu omvele Barasabari, ru erini aziniri Yusito'i, azini Matia. 24Yi zi Mungu tia kini, Mi Opi 'ba ma asi nipi driari, mi ece 'ba alᴜ mini pele 'ba iri 'diyi ma eselia 25azi 'ba ti opelerini Yudasini ndra kᴜle muzᴜ i parisi ra 'dori bizᴜri'i. 26Yini odrisi 'beria, odrisi 'de Matia ma dria ; la eri tualᴜ 'ba ti opele mᴜdri drini alᴜ 'diyi be.

will be added

X\