3 YOHANA 1

1Atalaᴜ, Gayo ovᴜpi lezarᴜ avasi, mani lele e'yo adarᴜ ma aliari vᴜ. 2'Ba mani leleri, ma zi Mungu tia 'dini e'yo mini dria ma ovᴜ onyirᴜ, azini mi rua ma ovᴜ alarᴜ, ekile mi orindini ovᴜle onyirᴜrile. 3Ma ovᴜ ndra ayikosi tᴜ, adripi ka eca e'yo mini adarᴜri ma eti nzezᴜ, ekile mini acile e'yo adarᴜ ma aliarile. 4Ma ovᴜni ayiko azini amborᴜ ayiko 'diri agapi rari be kᴜ, mani eriria kini anzi mani yi aci e'yo adarᴜri ma alia. 5'Ba mani leleri, azi mini 'yele adripi vᴜ, ka tro 'ba mini nile kᴜ 'diyi tiri eri azi adarᴜri'i. 6'Ba nde 'diyi nze leta mini ma e'yo ma eti kanisa ma milia. Mi nga 'ye onyirᴜ mi ka yi idri drile acita yini ma alia ekile dri fupi Mungu ma miliarile. 7A'disikᴜ Ru nde ma e'yosi yi fᴜ mu ra, afa alᴜni a'izᴜ 'ba jururᴜ dri kᴜ. 8E'yo 'dirisi ama ma a'i 'ba 'dinile 'diyi ra, 'dini ama ma ovᴜ 'ba azi ngapi yi be tualᴜ e'yo adarᴜsi 'diyi ani. 9Ma si e'yo azini kanisa vᴜ 'bo; te Diotrefe, lepi i 'bapi 'ba 'diyi ma driliari, a'ini ama kᴜ. 10E'yo 'dirisi, ma ka nga mu ra, ma nga azi erini 'yeleri ma e'yo ega, erini ama aji diria toko e'yo 'yoza onzikanyarᴜ 'diyisi. Te e'yo 'diri funi dri eri dri a'dule kᴜ, te eri ma ngᴜlᴜpi a'ini adripi 'diyi kᴜ, eri vini 'ba lepi yi a'ipi 'diyi oga indi, yi odrozᴜ kanisa ma aliasi amve. 11'Ba mani leleri, mi bi e'yo ovᴜpi onzirᴜri ma vᴜti kᴜ, te e'yo onyirᴜri'i. 'Ba 'yepi onyirᴜri eri 'ba Munguni, te 'ba 'yepi onziri ndreni nga Mungu kᴜ. 12'Ba dria nze Demeterio ma e'yo eti 'bo, e'yo adarᴜ ma ngᴜlᴜpi ece vini e'yo erini; ama e'yo erini ma eti nze ama'i indi, azini mi ni ra e'yo eti nzeza amani ovᴜ adarᴜ. 13Ma ovᴜ e'yo be kakaᴜ sizᴜ mi vᴜ, te ma leni yi sizᴜ mi vᴜ vino pisi kalamu be kᴜ; 14te ma le avasi mi ndrezᴜ mbele, azini ama nga e'yo 'yo milia milia. 15Asi anzurᴜ ma ovᴜ mi be. Mi agyi 'diyi zi mi ci ci. Mi ma zi ma agyi 'dayi ci ci rusi rusi.

will be added

X\